ބައެއް ސްކޫލްތަކުގައިވެސް ދައުރުވަމުން ދާކަމަށް ސޯޝަލް މީޑިއާގައި އަޑު ފެތުރިފައިވާ ޒާތުގެ ގިނަ އަދަދެއްގެ މަސްތުވާ ތަކެތި އައްޑޫ ސިޓީއަށް އެތެރެކުރަން އުޅެނިކޮށް އަތުލައިގެންފިއެވެ.
އެ މަސްތުވާތަކެތި އަތުލައިގަނެފައިވަނީ މޯލްޑިވްސް ކަސްޓަމްސް ސާރވިސް އިން ނެވެ. ކަސްޓްމްސްއިން ބުނީ މަސްތުވާތަކެތި އަތުލައިގަނެފައި ވަނި ޕޯސްޓްގެ ޒަރީއާއިން އައްޑޫ ސިޓީއަށް އެތެރެކުރަން މަސައްކަތް ކުރަމުން ދަނިކޮށް ކަމަށެވެ.
އަތުލައިގަނެފައި ވަނީ އެކި ޑިޒައިންތަކުގެ 503.5 ގުޅަ އެވެ. ކަސްޓަމްސް އިން ބުނީ އާދިއްތަ ދުވަހު އަތުލައިގަނެވިފައިވާ ތަކެތި މަސްތުވާތަކެތީގެ ބާވަތެއް ކަމަށްވާ އެކްސްޓަސީއަށް ޕޮޒިޓިވް ވެފައިވާ ކަމަށެވެ.
ކަސްޓަމްސް އިން ބުނީ މަސްތުވާތަކެތި ހިމެނޭ އެ ޕާރުސަލާއެކު އެ ޕާރުސަލްގެ ވެރިފަރާތް ފުލުހުންނާ ހަވާލުކޮށްފައިވާ ކަމަށެވެ.
S. Gan Customs seizes 503.5 tablets, weighing 244.60grams while attempting to smuggle in a post parcel originated from Netherlands. (1/2) pic.twitter.com/KGQNDYeSNA
— Maldives Customs (@CustomsMv) October 16, 2017
The initial examination of seized tablets was positive for a party drug type Ecstasy. The case has now been handed-over to the @PoliceMv.
— Maldives Customs (@CustomsMv) October 16, 2017
"ނިއު ޑްރަގް އިން ސްކޫލްސް"ގެ ނަމުގައި ސޯޝަލް މީޑިއާގައި ފެތުރެމުންދާ އެފަދަ އެއްވެސް މައްސަލައެއް ނުވަތަ އެ މެސެޖްގައި ބަޔާންކޮށްފައިވާ ހާލަތަށް ނިސްބަތްވާ މައްސަލައެއް އެއްވެސް ސްކޫލަކުން ނުވަތަ ޓީޗަރެއްގެ ފަރާތުން އަދި ބެލެނިވެރިއެއްގެ އިތުރުން އާއްމު ފަރާތަކުން ވެސް ފުލުހުންނަށް ރިޕޯޓް ކޮށްފައި ނުވާ ކަމަށް ދާދިފަހުން ފުލުހުން ވަނީ ބުނެފަ އެވެ.
މީގެއިތުރުން ފުލުހުން ބުނެފައި ވަނީ ސޯޝަލް މީޑިއާގައި ދައުރުވާ އެމެސެޖްގެ އަސްލަށް ބަލާރު ވެސް އެއީ ހަގީގަތެއް އެކުލެވިގެންވާ މައުލޫމާތެއް ނޫން ކަމަށް ފުލުހުންނަށް ޔަގީންކުރެވޭ ކަމަށެވެ.
ސޯޝަލް މީޑިއާގައި ދައުރުކުރަމުންދާ އެ މެސެޖްގައި ބުނެފައި ވަނީ "ސްޓްރޯބެރީ ކްއިކް" ނަމަކަށް ކިޔާ ޑްރަގެއް ސްކޫލްތަކުގައި ދައުރުކުރަމުންދާ ކަމަށެވެ. އެގޮތުން ދަރިވަރުންނަށް ޗޮކްލެޓް ނުވަތަ ކޭންޑީއެއްގެ ގޮތުގައި މީހުން އެ ޑްރަގު ދެމުންދާ ކަމަށާއި އޭގެ ރަހަތައް ހުންނަނީ ކުޑަކުދިން ގަޔާވާ ކަހަލަ ރަހަތަކުގައި ކަމަށެވެ. އެހެންކަމުން ގޮތް ނޭނގޭ މީހުން ދޭ އެފަދަ ތަކެތި ބޭނުން ނުކުރުމަށް ދަރިވަރުންނަށް ވަނީ ނަސޭހަތްތެރި ވެފައެވެެ.
