ޕެންޝަން އޮފީހާއި އެމްއެމްއޭ ބައިވެރިވެގެން ހިންގާ 2.5 ބިލިއަން ރުފިޔާގެ ބޮންޑުގެ މުއާމަލާތުން ލިބޭ ފައިސާ، ކުރިއަށް އޮތް ލޯކަލް ކައުންސިލް އިންތިހާބުގައި ހަރާމް ރިޝްވަތުގެ ގޮތުގައި ބޭނުން ކުރާނެ ކަމަށް އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވެއްޖެއެވެ.

ރައީސް މުއިއްޒު ހޯމަ ދުވަހުގެ ރޭ ހިންގާނެ ކަމަށް ކަށަވަރުކޮށްދެއްވި މި މުއާމަލާތަކީ، އެމްއެމްއޭއިން ފައިސާ ހޯދައިގެން ޕެންޝަން އޮފީހުން ގަންނަ ބޮންޑެކެވެ.

އެކްސްގައި ކުރެއްވި ޕޯސްޓެއްގައި ކުރީގެ ހޯމް މިނިސްޓަރު އިމްރާން އަބްދުﷲ ވިދާޅުވީ ޕެންޝަން އޮފީހުގެ ބޯޑަށް ބިރުދައްކައިގެން، އެ ތަނުގެ އިންވެސްޓްމަންޓެއް ކަމަށް ދޭހަވާ ގޮތަށް މި މުއާމަލާތް ހިންގަން އުޅުނަސް، މިއީ ސަރުކާރުގެ ހިންގުމުގެ ބޭނުމަށް ފައިސާ ޗާޕުކުރުުމެވެ.

އިމްރާން ފާހަގަކުރެއްވި ގޮތުގައި މި މުއާމަލާތުގެ ސަބަބުން ޕެންޝަން ސްކީމުގެ އަސްލު މަޤްޞަދު ގެއްލި، ޓެކުހެއްގެ ކުލަތައް ޖެހިގެންދާ ކަމެއް ކަމަށެވެ. އަދި މީގެ ސަބަބުން މި ސަރުކާރުގެ ޑޮލަރު މާރުކުރުމުގެ 'ދިއުޅިއެއްނުވާ' ސިޔާސަތު ފެއިލުވެފައިވާ ކަން ދޭހަކޮށްދޭ ކަމަށް ވެސް އޭނާ ވިދާޅުވި އެވެ.

ރައީސް މުއިއްޒު ވިދާޅުވެފައިވަނީ މި ފައިސާ ބޭނުންކުރާނީ ކޮންޓްރެކްޓަރުންނަށް ނުދެއްކި ހުރި ދެ ބިލިއަން ރުފިޔާ ދެއްކުމަށް ކަމަށެވެ. އެހެންނަމަވެސް އިމްރާން ވިދާޅުވި ގޮތުގައި މި މުއާމަލާތުގެ ސަބަބުން ޑޮލަރުގެ އަގު އިތުރަށް މައްޗަށް ދާނެއެވެ.

އިމްރާން ވަނީ މުއިއްޒު ވިދާޅުވެފައިވާ ގޮތާ ހިލާފަށް، ފައިސާ ޗާޕުކުރުމުން ޑޮލަރުގެ އަގު އިތުރަށް އުފުލޭނެ ކަމަށް ވިދާޅުވެފަ އެވެ.

ޕެންޝަން އޮފީހާއި އެމްއެމްއޭ ބައިވެރިވެގެން ހިންގާ މުއާމަލާތަކީ ފައިސާ ޗާޕުކުރުން ކަމަށް ގިނަ ބަޔަކު ބުނަމުން ގެންދާއިރު، ރައީސް މުއިއްޒު ވިދާޅުވެފައި ވަނީ މިއީ ފައިސާ ޗާޕުކުރުން ނޫން ކަމަށެއެވެ. އަދި މި ފައިސާ ބޭނުންކުރަނީ ކޮންޓްރެކްޓަރުންނަށް ނުދެއްކި ހުރި ދެ ބިލިއަން ރުފިޔާ ދައްކަން ކަމަށް ވެސް އެމަނިކުފާނު ވަނީ ވިދާޅުވެފަ އެވެ.

ރައީސް މުއިއްޒު މިފަދައިން ވިދާޅުވެފައިވީ ނަމަ ވެސް އިޤްތިޞާދީ މާހިރުން ވެސް ފާހަގަކުރާ ގޮތުގައި މި މުއާމަލަތަކީ ފައިސާ ޗާޕުކުރުމެވެ.

އަދި އެ މުއާމަލާތުގެ ސަބަބުން އެމްއެމްއޭގެ ޕަބްލިކް ބޭންކް އެކައުންޓު އޯވަރޑްރޯ ކުރެވި، އިޤްތިޞާދުގައި ދައުރުވާ ރުފިޔާގެ އަދަދު އިތުރުވެގެންދާނެއެވެ. މިއީ ސީދާ ފައިސާ ޗާޕުކުރުން މި ދާއިރާގެ ތަޖުރިބާކާރުން އަންނަނީ ބުނަމުންނެވެ.