ރައީސް ޑރ.މުހައްމަދު މުއިއްޒުގެ ސަރުކާރުން ރިޔާސީ ދައުރު އިތުރު އަހަރުތަކަކަށް ދިގު ދަންމައިލުމަށް މަސައްކަތް ކުރާ ކަމަށާއި، ރައްޔިތުންގެ ފެންނަ ނުފެންނަ ވޯޓު ގަތުމަށްޓަކައި ފައިސާ ހޯދުމަށް މިހާރު މުޅި ދައުލަތް ލޫޓުވަމުންދާ ކަމަށް ތުހުމަތުކޮށްފިއެވެ.

ހުކުރު ދުވަހުގެ ރޭ އެމްޑީޕީން ކުރިއަށް ގެންދިޔަ ކަންމަތީ އެއްވުމުގައި ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވީ، ރައީސް މުއިއްޒު މިހާތަނަށް 4000ށް ވުރެ ގިނަ ވައުދުވެވަޑައިގެންފައިވާ ކަމަށް މައުލޫމާތު ލިބޭ ކަމަށާއި، މިވައުދުތައް ފުއްދުމަށްޓަކައި ހުރިހާ ރައްޔިތުން އަމަލީ މަސައްކަތަށް ނިކުތްނަމަވެސް ހަގީގަތަކަށް ނުވާނެ ކަމަށެވެ.

ރައީސް މުއިއްޒު ވެރިކަމަށް ވަޑައިގެންނެވީ ވެސް ހީލަތްތެރި ގޮތަކަށްކަން ފާހަގަކުރައްވައި މެންބަރު މައުރޫފް ވިދާޅުވީ މިހާރު ގައުމު ހިންގުމަށް ވެސް މަސައްކަތް ކުރަނީ އެގޮތަށް ކަމަށެވެ. އެމަނިކުފާނުގެ ހީލަތްތެރިކަން ރައްޔިތުންނަށް އެނގެންޖެހޭ ކަމަށް އޭނާ ވިދާޅުވިއެވެ.

މީގެ އިތުރުން މެންބަރު މައުރޫފް ވިދާޅުވީ ރިޔާސީ ދައުރު ދިގުދަންމާލުމަށް މިސަރުކާރުން މަސައްކަތް ކުރާ ކަމަށާއި، ފެންނަ ނުފެންނަ ވޯޓަކަށް ދާނެ ކަމަށެވެ. އަދި ރައްޔިތުންގެ އަތުން އެވޯޓު ގަތުމަށްޓަކައި ގިނަ ރައްޔިތުންނަށް ވަޒީފާތައް ދޭނެ ކަމަށާއި، މުޅި ދައުލަތް ލޫޓުވައި ބޮޑެތި ހިޔާނަތްތައް ހިންގައި އެކަމަށް ސަރުކާރުން ފައިސާ ހޯދަމުންދާ ކަމަށް މެންބަރު މައުރޫފް ވިދާޅުވިއެވެ.

މެންބަރު މައުރޫފް ވިދާޅުވީ ސަރުކާރުން ދޭ ފައިސާގައި ޖެހި، ރިޔާސީ ދައުރު ދިގުދަންމާލަން ރައްޔިތުން ރުހުން ދީފި ކަމަށްވާނަމަ ދިވެހިރާއްޖެ އަލުން އަނބުރާ ނުހޯދޭނެ ކަމަށެވެ. އަދި އެކަމަށް ރައްޔިތުން ވިސްނައި، ހޭލުންތެރިވެ ތިބުމަށް މެންބަރު މައުރޫފް ގޮވާލެއްވިއެވެ.