ނޫސްވެރިން އުލުބައިންދަންޖެހޭ ކަމަށް ޕީއެންސީގެ ޕަރލަމެންޓަރީ ގްރޫޕުގެ ލީޑަރު އިބްރާހިމް ފަލާހު ދެއްކެވި ވާހަކަ ކުށްވެރިކުރި، އިބްރާހިމް ސައީދު (ކޭޑު) ސަރުކާރުގެ ވަޒީފާއިން ވަކިކޮށްފި އެވެ.

ބުރާސްފަތި ދުވަހު ކޭޑު ވަޒީފާއިން ވަކިކޮށްފައިވާއިރު، އޭނާ ހުންނެވީ މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަންގެ ސީނިއަރ ޕޮލިޓިކަލް ޑިރެކްޓަރ މަގާމުގައެވެ.

ރައީސް އޮފީހުން ފޮނުވާފައިވާ ސިޓީގައި ބުނެފައިވަނީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 115 ވަނަ މާއްދާގެ (ޅ) އިން ރައީސުލްޖުމްހޫރިއްޔާ ލިިބިދޭ ބާރުގެ ދަށުން ކޭޑު ވަޒީފާއިން ވަކި ކުރައްވާފައިވާ ކަމަށެވެ.

ކޭޑު ވަޒީފާއިން ވަކިކޮށްފައިމިވަނީ، މެންބަރު ފަލާހު ނޫސްވެރިންނާ ގުޅުވައި ދެއްކެވި ވާހަކަތައް ކުށްވެރިކުރިތާ 24 ގަޑިއިރު ނުވަނީސްއެވެ. އޭނާ ބުނެފައިވަނީ މެންބަރު ފަލާހު ނޫސްވެރިން މަރާލުމަށް ގޮވާލި މައްސަލަ ބަލަންޖެހޭ ކަމަށާއި، އަބަދު ބަރާއި ނުފޫޒު ދައްކައިގެން ނޫޅެވޭނެ ކަމަށެވެ. އަދި މެންބަރު ފަލާހު ދެކެ ބިރު ނުގަންނަ ކަމަށް ބުނެފައިވެއެވެ.

މެންބަރު ފަލާހު ދެއްކެވި ވާހަކަތަކާ ގުޅިގެން ވަރަށް ބޮޑަށް ފާޑުކިޔުން ވަނީ އަމާޒުވެފައެވެ. އެމްޑީޕީން ވެސް މެންބަރު ފަލާހުގެ ވާހަކަތައް ކުށްވެރިކޮށްފައިވާއިރު، އެމްޖޭއޭއިން ވަނީ ފަލާހާއި ޕީއެންސީން ނޫސްވެރިންގެ ކިބައިން މާފަށް އެދެންޖެހޭނެ ކަމަށް ބުނެފައެވެ.

މިނިވަން މީޑިއާ ނެތިކޮށްލަން ހުށަހަޅާފައިވާ ބިލަކާ ގުޅޭ ގޮތުން ވާހަކަދައްކަވަމުން މެންބަރު ފަލާހު ވިދާޅުވެފައިވަނީ އޭނާއާ ގުޅޭ ގޮތުން ބައެއް މީޑިއާތަކުން ދޮގު ހަބަރުތަކެއް ފަތުރާފައިވާ ކަމަށާއި، އެފަދައިން މަސައްކަތްކުރާ މީޑިއާގެ މުވައްޒަފުން "އުލުބައިންދަން" ޖެހޭ ކަމަށެވެ.

ފަލާހު މި ވާހަކަ ދެއްކެވި ނަމަވެސް، އޭނާ ވިދާޅުވި ފަދަ ދޮގު ހަބަރުތަކެއް އެއްވެސް މީޑިއާއަކުން ގެނެސްފައިނުވެއެވެ، އެ ވާހަކަތައް ދައުރުވެފައިވަނީ ހަމައެކަނި ސޯޝަލް މީޑިއާގައި ކަން ފާހަގަކުރެވެއެވެ.