އިރާގު ގައި ބޭއްވޭ 34 ވަނަ އަރަބި ލީގުގެ ސަމިޓަށް ލީޑަރުން ބަޣްދާދަށް ވަޑައިގެންފިއެވެ.

ހޮނިހިރު ދުވަހު ބޭއްވުމަށް ހަމަޖެހިފައިވާ ސަމިޓުގައި ޣައްޒާގެ މައްސަލަ އާއި ސަރަހައްދުގެ އެހެން ބޮޑެތި މައްސަލަތަކާ ބެހޭ ގޮތުން ލީޑަރުން މަޝްވަރާ ކުރެއްވުމަށް ވަނީ ހަމަޖެހިފައެވެ.

އެމެރިކާގެ ރައީސް ޑޮނަލްޑް ޓްރަމްޕް ގަލްފްގެ ތިން ގައުމަކަށް ކުރެއްވި ދަތުރުފުޅު ނިންމަވާލެއްވި ދަނޑިވަޅުގައި ބާއްވާ މި ސަމިޓުގައި ބައެއް އަރަބި ގައުމުތަކުގެ ވެރިން ބައިވެވެރިވެ ވަޑައިނުގަންނަވާ ކަމަށް ރިޕޯޓުތައް ބުނެއެވެ.

ޣައްޒާގެ މައްސަލަ އަށް ސަމިޓުގައި މަޝްވަރާ ކުރަން ހަމަޖެހިފައިވާއިރު، އެމެރިކާގެ ރައީސް ޑޮނަލްޑް ޓްރަމްޕް ވަނީ މުޅި ދުނިޔެއަށް ހައިރާންކަން ގެނުވި ވާހަކަފުޅެއް ޣައްޒާ އާ ބެހޭ ގޮތުން މިއަހަރުގެ ކުރީކޮޅު ދައްކަވާފައެވެ. އެއީ ޣައްޒާ ހިފައި، އެތަން "މެދުއިރުމަތީގެ ރިވިއެރާ އަށް" ބަދަލުކުރައްވާނެ ކަމަށް ވިދާޅުވުމެވެ. ޓްރަމްޕް މިހެން ވިދާޅުވެފައިވަނިކޮށް އަރަބި ލީޑަރުން މާރޗް މަހު ގާހިރާ ގައި ބޭއްވުނު ސަމިޓެއްގައި ޣައްޒާ އަލުން ބިނާކުރުމުގެ ޕްލޭނެއް އެކުލަވާލިއެވެ.

ފަލަސްޠީނުގެ ރައީސް މަޙްމޫދު އައްބާސް އަކީ ބަޣްދާދަށް ހުކުރު ދުވަހު ވަޑައިގެންނެވި ފުރަތަމަ އަރަބި ލީޑަރެވެ.

ނަމަވެސް ޑިޕްލޮމެޓިކް މަސްދަރެއް ބުނާގޮތުގައި ގިނަ ގަލްފް ޤައުމުތަކުން ބައިވެރިވާނީ މިނިސްޓަރުންގެ ފެންވަރުގައެވެ.

މި ސަމިޓުގެ އެޖެންޑާގައި އެންމެ ބޮޑަށް އިސްކަންދޭނެކަމަށް ލަފާކުރެވެނީ ޣައްޒާގެ ހަނގުރާމައަށެވެ. ސަމިޓު ބޭއްވޭއިރު، އިސްރާއީލުން ވަނީ ޣައްޒާ އަށް ދެމުންދާ ހަމަލާތައް ފުޅާކުރާނެ ކަމަށް ބުނެ، މުޅި ޣައްޒާ އިސްރާއީލުގެ ބާރުގެ ދަށަށް ގެނައުމުގެ ޕްލޭނެއް އިސްރާއީލުގެ ހަނގުރާމައިގެ ކެބިނެޓުން ފާސްކޮށްފައިވާ ކަމަށް ބުނެފައެވެ.

އދ.ގެ ސެކްރެޓަރީ ޖެނެރަލް އެންޓޯނިއޯ ގުޓެރެސް މި ސަމިޓުގައި ބައިވެރިވެ ވަޑައިގަންނަވާނެއެވެ. އަދި ޣައްޒާގައި އިސްރާއީލުން ހިންގާ ނުރައްކާތެރި ހަމަލާތަކާމެދު ވަރަށް ފާޅުގައި ފާޑުވިދާޅުވާ ބޭފުޅެއް ކަމަށްވާ ސްޕެއިންގެ ބޮޑުވަޒީރު ޕެޑްރޯ ސަންޗޭޒް މެހެމާނެއްގެ ގޮތުގައި ވާހަކަފުޅު ދައްކަވާނެކަމަށް ލަފާކުރެވެއެވެ.

އިރާޤުގެ ޚާރިޖީ ވަޒީރު ފުއާދު ޙުސައިން ވިދާޅުވި ގޮތުގައި ބަޣްދާދު ސަމިޓުގައި ޣައްޒާ އަލުން ބިނާކުރުމަށް މާރޗް މަހު ކައިރޯގައި ބޭއްވުނު ބައްދަލުވުމުގައި ނިންމުނު ނިންމުންތަކަށް ތާއީދުކުރާނެއެވެ. މިއީ ޓްރަމްޕްގެ ފާޑުކިޔުމާ ކުރިމަތިވި ހުށަހެޅުމުގެ ބަދަލުގައި ހުށަހެޅޭ ހުށަހެޅުމެކެވެ.

ބުރާސްފަތި ދުވަހު ގަތަރުގައި ހުންނަވައި ޓްރަމްޕް އަނެއްކާވެސް ވިދާޅުވީ އެމެރިކާ އިން ޣައްޒާ "ހިފައި" އެތަން "މިނިވަންކަމުގެ ސަރަޙައްދަކަށް" ބަދަލުކުރަން ބޭނުންފުޅުވާ ކަމަށެވެ.

ސަމިޓު ބޭއްވޭ އިރާޤަކީ ގިނަ އަހަރުތަކެއް ވަންދެން ހިނގި ނުރައްކާތެރި ހަނގުރާމަތަކާއި ހަމަނުޖެހުންތަކަށްފަހު ދާދިފަހުން އާންމު ޙާލަތަކަށް އައިސްފައިވާ ޤައުމެކެވެ. އެ ޤައުމުގެ ލީޑަރުން މި ސަމިޓަށް ބަލަނީ އިރާގަށް ހަމަޖެހުން އައިސްފައިވާ މަންޒަރު ދެއްކުމުގެ ފުރުޞަތެއްގެ ގޮތުގައެވެ.

ބަޣްދާދުގައި އެންމެ ފަހުން އަރަބި ލީގުގެ ސަމިޓެއް ބޭއްވުނީ 2012 ވަނަ އަހަރުއެވެ. އެއީ އެ ޤައުމުގެ އެތެރޭގައި ހަމަނުޖެހުންތައް އުފެދިފައިވާ ދަނޑިވަޅެއްގައެވެ. އަދި އެއީ އިރާޤާ އިންވެގެންވާ ސީރިއާގައި ހަނގުރާމަ ފެށިގެން ދިޔަ ދުވަސްވަރެވެ. ސީރިއާގެ ހަމަނުޖެހުންތަކަށް ނިމުމެއް އަތުވެދާނެ ކަމުގެ އުއްމީދު ލިބޭ އައު ބާބެއް ފެށުނީ މީގެ 6 މަސްދުވަސް ކުރިން، ގިނަ ދުވަސްތަކެއް ވަންދެން ވެރިކަން ކުރެއްވި ބައްޝާރު އަލް-އަސަދުގެ ވެރިކަން ވެއްޓުމާ ގުޅިގެންނެވެ.

މި ސަމިޓު ބޭއްވެނީ އީރާނާއި އެމެރިކާއާ ދެމެދު ނިއުކްލިއަރ މަޝްވަރާތައް ހިނގަމުންދާ ދަނޑިވަޅެއްގައެވެ.

ބުރާސްފަތި ދުވަހު ޓްރަމްޕް ވިދާޅުވީ އިރާނާ އެކު އެއްބަސްވުމަކާ "ކައިރިވަމުން" އަންނަ ކަމަށެވެ. ނަމަވެސް ހުކުރު ދުވަހު ޓްރަމްޕް އިންޒާރު ދެއްވީ އީރާނުން އަވަސް ނުވެއްޖެނަމަ "ނުރައްކަލެއް ހިނގާފާނެ" ކަމަށެވެ.