މިދިޔަ މަހުގެ 18 ވަނަ ދުވަހު ހ. ފެންޓޮނޯއީގޭގެ 9 ވަނަ ބުރިން ހައްވާ ޔުމްނު ރަޝީދު ވެއްޓުނުކަމަށް ބުނި ހާދިސާ ހިނގިރޭ ފެންޓޮނޯއީ ގޭގައި އިތުރު 4 މީހަކު ތިބިކަމަށް ޔުމްނުއާއި ހަވާލާދީ އޭނާގެ އާއިލާއިން ބުނެފިއެވެ.

ޔުމްނު ވެއްޓުނު ހާދިސާގައި ފުރަތަމަ ފަހަރަށް ޔުމްނުގެ ފަރާތުން މައުލޫމާތު ދިނުމަށް އޭނާގެ އާއިލާއިން ދިން އިންޓަރވިއުއެއްގައި ބުނީ ހައްވާ ޔުމްނު ރަޝީދު ވެއްޓުނު ހާދިސާއާއި ގުޅިގެން ސަރުކާރުގެ އެއްވެސް މުއައްސަސާއަކުން އެއްވެސް ވަރެއްގެ ތަހްގީގެއް ކުރިއަށް ގެންގޮސްފައެއް ނުވާ ކަމަށެވެ. އާއިލާއިން ބުނީ ޔުމްނު ބުނެފައިވަނީ އެގެއަށް ކުރިންވެސް ގޮސްގައިވާ ކަމަށެވެ.

އަދި ޔުމްނު އަމިއްލައަށް ފުއްމާލީކަމަށް ފުލުހުން ބުނި ވާހަކަ ދޮގުކޮށް ޔުމްނުގެ އާއިލާއިން ބުނެފައިވަނީ އެފަދަ ކަމެއް އަމިއްލައަށް ނުކުރާ ކަމަށެވެ.

މި މައްސަލައިގައި ޔުމްނު ވައްޓާލުމުގައި ބައިވެރިވުން އޮތްކަމުގެ ތުހުމަތުގައި ހައްޔަރުކޮށްފައިވާ ރައުދު އަހުމަދު ޒިލާލުގެ އިތުރުން އިތުރު 4 މީހަކު އެގޭގައި ތިބި ކަމަށް ޔުމްނު ބުނެފައިވެއެވެ. އަދި އޭނާ ވެއްޓުމުން އޭނާ އެތަނަށް ދޫކޮށްލީ ބަޔަކު ކަމަށް ޔުމްނު ވަނީ ބުނެފައެވެ. އަދި މި މައްސަލައިގެ މައުލޫމާތު ފުލުހުން އާންމުކޮށްފައިވަނީ ޔުމްނުގެ ބަޔާން ނުނަގައި ކަމަށް ވެސް ޔުމްނުގެ އާއިލާއިން ބުނެފައިވެއެވެ.

މީގެ އިތުރުން ރައުދުގެ އިތުރުން ފެންޓޮނޯއީގޭގައި ރައުދުގެ އިތުރުން ޔޫސުފް ޔައްސާރު އަބްދުއްޣަފޫރު ހުރިކަމަށް ޔުމްނު ވަނީ ބުނެފައެވެ. ޔައްސާރު އަކީ މިނިސްޓަރ އަމީންގެ ގޭގައި މަސްތުވާތަކެއްޗާއެކު ޕާޓީކުރި މީހުންގެ ތެރޭގައި ހިމެނޭ މީހެއް ކަމަށް ފުލުހުން ބުނާ އެކަކެވެ. ޔުމްނު ބުނެފައިވަނީ އޭނާ ފެންޓޮނޯއީ ގެއަށް ދިޔައީ ޔައްސާރުގެ ދައުވަތަކަށެވެ. އަދި އެގޭގެ ލޮކޭޝަން ވެސް ފޮނުވީ އޭނާ ކަމަށެވެ.

ފުލުހަށް ގެންގޮސް ވާހަކަ ދެއްކި އިރު ބުނަމުން ދިޔައީ އެގޭގައި ކެމެރާއެއް ނެތް ކަމަށާއި، އަދި އެގެޔަކީ ރެންޑަމް ގެއެއް ކަމަށް އާއިލާގެ ފަރާތުން ބުނެފައިވެއެވެ.

ޔުމްނުގެ އާއިލާއިން ބުނީ އޭނާ އެތަނަށް މަރަށް ދޫކޮށްލީ ބަޔަކު ކަމަށެވެ. ޔުމްނުގެ ދައްތު ބުނީ އޭނާ މި ވާހަކަތައް ހާމަކުރުމުން އޭނާގެ ދިރިއުޅުމަށް ވެސް ވަރަށް ބައިވަރު އަސަރުތަކެއް ކުރާނެ ކަމަށެވެ. ނަމަވެސް އިންސާފު ހޯދަން ބޭނުންވާ ކަމަށެވެ.

ޔުންމުގެ ދައްތަ ބުނީ ސުވާލަކަށް ވަނީ މި މައްސަލައިގައި އެކުލަވާލި ކޮމިޝަނުން އާއިލާއާއި އެއްވެސް މުއާމަލާތެއް ކޮށްފައި ނެތީ ކީއްވެގެންތޯއެވެ. އަދި ފުލުހުން މި މައްސަލައިގައި އިތުރު ސުވާލުތަކެއް ނުކުރާ ކަމަށާއި، ޔުމްނުގެ އަގު ވައްޓާލާ މުޅި ރާއްޖެއަށް އޭނާއަކީ ވަކިކަހަލަ މީހެއްކަމަށް އަންގައިދޭން މަސައްކަތް ކުރި ކަމަށެވެ. އަދި މައްސަލަ ބަލަން ތިބި މީހުން ހެދީ ދޮގު ކަމަށާއި، ސުވާލުކުރުމުންވެސް ހެދި ދޮގު ކަމަށެވެ.

މަސްތުގެ ހާލަތުގައި ޕާޓީކުރި ކަމުގެ ތުހުމަތު ކުރެވިފައިވާ 8 މީހެއްގެ ވަނަވަރު ވަނީ އާއްމުކޮށްފައެވެ.