އިންޑިއާގެ ބޮޑުވަޒީރު ނަރެންދުރަ މޯދީ ސްރީލަންކާއަށް ކުރައްވާ ދަތުރުފުޅުގައި ހަކަތައާއި ދިފާއީ ގުޅުން ބަދަހިކޮށް އިންވެސްޓްމަންޓްތައް ކުރިއެރުވުމަށް މަޝްވަރާކުރާނެކަން ހާމަވެއްޖެ އެވެ.

ހުކުރު ދުވަހުގެ ހަވީރު ވަޑައިގަތުމަށް ހަމަޖެހިފައިވާ މޯދީ އަކީ ސެޕްޓެމްބަރު މަހު ވެރިކަމާ ހަވާލުވެވަޑައިގަތުމަށްފަހު ލަންކާގެ ރައީސް އަނޫރާ ކުމާރާ ދިއްސާނަޔަކްގެ ދައުވަތަކަށް ވަޑައިގަންނަވާ ދުނިޔޭގެ ފުރަތަމަ ލީޑަރެވެ.

އިންޑިއާ އަކީ 2022 ވަނަ އަހަރުގެ މެއި މަހު ލަންކާގެ ދަރަނި ޑިފޯލްޓް ވުމުން ގާތްގަނޑަކަށް 1.36 ބިލިއަން ޑޮލަރުގެ ލޯނުތައް އަލުން އެކުލަވާލުމަށް އެއްބަސްވި ލަންކާގެ މުހިންމު ބައިލެޓަރަލް ލޯނު ދޫކުރާ ގައުމުތަކުގެ ތެރެއިން އެއް ގައުމެވެ.

މޯދީގެ މި ދަތުރުފުޅުގެ މަޤްޞަދަކީ ލަންކާ އާއި އިންޑިއާ އާއި ދެމެދު އޮންނަ ޒަމާންވީ ގުޅުން ބަދަހިކުރުން ކަމަށް ލަންކާގެ ރައީސް އޮފީހުން ނެރުނު ބަޔާނެއްގައި ބުނެފައިވެ އެވެ.

މި ދަތުރުފުޅުގައި ހަކަތަ، ޑިޖިޓަލައިޒޭޝަން، ސެކިއުރިޓީ، ހެލްތްކެއާ ފަދަ މުހިންމު ދާއިރާތަކާ ގުޅޭ އެއްބަސްވުންތަކުގެ އިތުރުން އިންޑިއާއިން ލަންކާއަށް ދަރަނި އަލުން އެކުލަވާލުމުގެ އެހީއާ ގުޅޭ އެއްބަސްވުންތަކުގައި ސޮއިކުރާނެ ކަމަށް ވެސް އެ ބަޔާނުގައި ބުނެފައިވެ އެވެ.

ޑިސެމްބަރު މަހު ނިއުދިއްލީގައި ބޭއްވި ފުރަތަމަ ބައްދަލުވުމުގައި ލީޑަރުން ވަނީ ލަންކާގައި އިންވެސްޓްމަންޓްތަކާއި އިންޑިއާއިން ލަންކާއަށް ލިކުއިފައިޑް ނެޗުރަލް ގޭސް ފޯރުކޮށްދިނުމާއި ކަރަންޓް ގްރިޑްތައް ގުޅުވައިދިނުމަށް އެހީތެރިވުމަށް ރާވާފައިވާ ކަންކަމާ ބެހޭ ގޮތުން މަޝްވަރާކޮށްފަ އެވެ.

މި މަޝްވަރާތަކުގައި އިރުމަތީ ޓްރިންކޮމާލީގައި ސަރަހައްދީ ހަކަތައާއި ސިނާއީ ހަބެއް ތަރައްގީކުރުމުގެ ވާހަކަވެސް ވަނީ ކުރިއަށް ގެންގޮސްފައެވެ. ޖެނުއަރީ މަހު ޑިސަނާޔަކޭ ވިދާޅުވީ އެކްސްޕޯޓަށް ފޯކަސްކޮށްގެން ޖޮއިންޓް ވެންޗާއެއްގެ ގޮތުގައި އެތަނުގައި ތެޔޮ ރިފައިނަރީއެއް އެޅުމުގެ މަޝްވަރާތައް ކުރަމުން އަންނަ ކަމަށް ލަންކާގެ މީޑިއާތަކުން ބުނެ އެވެ.

މި މަޝްރޫއު ނިމުމުން އިންޑިއާ އާއި ޗައިނާއާ ދެމެދު ވާދަވެރިކަން އުފެދިގެންދާނެ ކަމަށް ބެލެވެއެވެ. ލަންކާގައި މިހާރުވެސް ޗައިނާގެ ހަކަތަ ކުންފުނި ސިނޮޕެކް އިން ވަނީ ހަމްބަންޓޯޓާގައި 3.2 ބިލިއަން ޑޮލަރުގެ ތެޔޮ ރިފައިނަރީއެއް އެޅުމަށް އެއްބަސްވުމެއްގައި ސޮއިކޮށްފަ އެވެ.

ނިއުދިއްލީގައި ހިންގާ އިންޑިއަން އޮއިލް ކޯޕަރޭޝަނަކީ މިހާރުވެސް ދައުލަތުގެ ސިލޯން ޕެޓްރޯލިއަމް ކޯޕަރޭޝަނަށް ފަހު ދެވަނައަށް އެންމެ ބޮޑު ތެޔޮ ފޯރުކޮށްދޭ ކުންފުންޏެވެ.

މި ހަފްތާގެ މަޝްވަރާތަކުގައި ހުށަހަޅާފައިވާ ޓްރިންކޮމާލީ ރިފައިނަރީ ހިމެނޭނެތޯ އިންޑިއާގެ ފޮރިން މިނިސްޓްރީން އެއްވެސް އެއްޗެއް ނުބުނެ އެވެ.

އެ ދަތުރުގެ ކުރިން ނޫސްވެރިންނަށް މައުލޫމާތު ދެއްވަމުން އެ ކުންފުނިން ބުނީ ސިލޯން އިލެކްޓްރިސިޓީ ބޯޑާއި އިންޑިއާގެ ނޭޝަނަލް ތަމަލް ޕަވަރ ކޯޕަރޭޝަން (އެންޓީޕީސީ.އެންއެސް) ގެ 120 މެގަވޮޓްގެ ސޯލާ ޕަވަރ ޕްރޮޖެކްޓެއްގެ ބިންގާ އެޅުމުގެ ރަސްމިއްޔާތުގައި މޯދީ ބައިވެރިވާނެ ކަމަށެވެ.

އިންޑިއާގެ ފޮރިން މިނިސްޓްރީން ބުނީ ރާއްޖެއާއެކު ޑިފެންސް ކޯޕަރޭޝަންގެ އެއްބަސްވުމެއް ނިންމާލެވޭނެ ކަމަށް އުންމީދުކުރާ ކަމަށެވެ. ޑިސެމްބަރު މަހުގެ މަޝްވަރާތަކުގައި ލަންކާގެ ދިފާއީ ގާބިލްކަން އިތުރުކުރުމަށް ހަތިޔާރު ފޯރުކޮށްދިނުން ތަސައްވަރުކޮށްފައި އޮތެވެ.