2025 ވަނަ އަހަރަށް ފާސްކުރި ދައުލަތުގެ ބަޖެޓް 20 ބިލިއަން ރުފިޔާއިން ޑެފިސިޓް ވެގެންދާނެ ކަމަށް ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ ވިދާޅުވެއްޖެއެވެ.

ރާއްޖެޓީވީގެ ފަލަ ސުރުހީ ޕްރޮގްރާމުގައި ވާހަކަ ދައްކަވަމުން ޔައުގޫބް ވިދާޅުވީ މި އަހަރު ނިމިގެންދާއިރު، މި އަހަރު ފާސްކުރި ބަޖެޓް، 20 ބިލިއަނުން ޑެފިސިޓްވެގެންދާނެ ކަމަށެވެ. ޔައުގޫބު ވިދާޅުވީ މިއީ ޑެފިސިޓް ވާން އެންމެ ކުޑަ މިންވަރު ކަމަށެވެ. އަދި މިހާރު ފެންނަނީ އެ މަގަށް އެކަން ދާތަން ކަމަށާއި، ސަބަބަކީ ރިކަރަންޓް ޚަރަދު އަތް ނުފޯރާ ހިސާބެއްގައި ހުރުން ކަމަށެވެ. ޔައުގޫބް ވިދާޅުވީ 2025 ވަނަ އަހަރުގެ ބަޖެޓަކީ ރާއްޖޭގެ މިހާ ހިސާބަށް އައިއިރު، ދައުލަތަށް އެންމެ ބުރަ ބޮޑު ބަޖެޓެއްވެގެންދާނެ ކަމަށެވެ.

ޔައުގޫބް ވިދާޅުވީ މި ފާއިތުވި ހަފުތާތަކުގައި ފިނޭންސް މިނިސްޓްރީން އާންމުކުރި ރިޕޯޓުތަކަށް ބަލާއިރު ފެންނަނީ އާމްދަނީ އިތުރުވާތަން ކަމަށާއި، ކަންބޮޑުވާ ކަމަކީ، އާމްދަނީ އިތުރުވަނީ އާއްމު ރައްޔިތު މީހާ އަތުން ނަގާ ޓެކްސްއިން ކަމަށެވެ. ނަމަވެސް ތަރައްގީގެ އެއްވެސް މަސައްކަތެއް ކުރާތަން ނުފެންނަ ކަމަށެވެ.

ޔައުގޫބު ވިދާޅުވީ ޕީ.އެސް.އައި.ޕީ އަށް ކުރަން އޮތް ޚަރަދު ސަރުކާރުން ކުރަނީ ސިޔާސީ މުވައްޒަފުންގެ މުސާރަ ދިނުމަށް ކަމަށެވެ. ރިޕޯޓްތަކަށް ބަލާއިރު ހަފްތާއިން ހަފްތާއަށް 10 ޕަސެންޓް، 15 ޕަސެންޓް އިތުރުވަމުންދާ ތަން ފެންނަނީ ސީދާ މުސާރަ ދިނުމަށް ކަމަށާއި، މިއީ ކަންބޮޑުވާ މައްސަލައެއް ކަމަށް ޔައުގޫބް ވިދާޅުވިއެވެ.

ޔައުގޫބް ވިދާޅުވީ މުސާރަ ބޮޑުވާނަމަ އެކަމުން އެނގެނީ ކޮންމެ ހަފުތާއަކު، ކޮންމެ ދުވަހަކު ސިޔާސީ ގޮތުން މުވައްޒަފުން އިތުރުކުރަމުންދާ ތަން ކަމަށެވެ. އަދި ރައްޔިތުން ދައްކާ ޓެކްސް ފައިސާ ސީދާ ގޮތުގައި ދަނީ މި ސަރުކާރަށް ސަނާކިޔަން ނަގައި، ޢައްޔަންކުރާ ސިޔާސީ މުވައްޒަފުންގެ މުސާރައަށް ކަމަށް ޔައުގޫބް ވިދާޅުވިއެވެ.

ޔައުގޫބް ވިދާޅުވީ ރައްޔިތުންގެ އަތުން ފައިސާ ޓެކްސްއެއްގެ ގޮތުގައި ވިޔަސް އަދި އެހެން ގޮތުގައި ވިޔަސް ނެގުމުގެ ބޭނުމަކަށް އޮންނާނީ، ޤައުމު ހަމައަކަން އަޅުވާ ޤައުމު ބިނާކުރުން ކަމަށެވެ. އަދި ރައްޔިތުންގެ ބޯހިޔާވަހިކަމާއި ރައްޔިތުންނަށް ބޭނުންވާ ކަންކަން ކުރަން ޖެހޭ ކަމަށާއި، އެހެންނަމަވެސް، އޭގެ އެއްވެސް ކަމެއް ނުކޮށް ހުރިހާ ފައިސާއެއް ތަޅާ ބުރުވާލަނީ ސިޔާސީ މުވައްޒަފުންނަށް ކަމަށެވެ.