ގަބޫލުނުކުރެވޭ މިންވަރަށް ކަރަންޓު ބިލާއި، ފެން ބިލު ބޮޑު ކަމަށް ބުނެ، އެކަމުގެ ޝަކުވާ އާއްމު ރައްޔިތުން ކުރަން ފަށައިފި އެވެ.

ސަރުކާރުން ވަނީ ފެން ބިލާއި ކަރަންޓު ބިލުން ވެސް ރަމަޟާން މަހާ ގުޅިގެން 10 އިންސައްތައިގެ ޑިސްކައުންޓެއް ދީފައެވެ. ނަމަވެސް ފެން ބިލުގެ އިތުރުން ކަރަންޓު ބިލުތައް ބޮޑުވެ، އެކަމުގެ ޝަކުވާ އާންމުން ދަނީ ސޯޝަލް މީޑިއާގައި ހިއްސާކުރަމުންނެވެ. ބައެއް ގޭބީސީތަކުން ޑިސްކައުންޓްއާއެކު ވެސް ކަރަންޓު ބޭނުންކުރި މިންވަރު ދެ ގުނަވެފައިވާ ކަމަށް އެމީހުން ބުނެފައިވެ އެވެ.

ބައެއް މީހުން ބުނެފައިވަނީ ގޭގައި މީހުން ދިރިނޫޅޭ މަހެއްގައި ކަރަންޓު ބިލާއި ފެން ބިލު ބޮޑުވުމުން އެކަމާ ސުވާލު އުފެދޭ ކަމަށެވެ. މިކަން އެމްޑަބްލިޔުއެސްސީން އަދި ސްޓެލްކޯއިން ސާފުކޮށްދޭން ޖެހޭ ކަމަށާއި، މިއީ އޮޅުވާލުން ކަމަށް އެމީހުން ބުނެފައިވެއެވެ. އަދި ކަރަންޓު ބިލު ބޮޑުވެފައިވަނީ ހޫނު މޫސުމަށް ވެފައި، ގިނައިން ކަރަންޓު ބޭނުންކޮށްފައިވާތީ ކަމަށް ސްޓެލްކޯއިން ބުނާތީ، އެކަމަށް ވެސް ބައެއް މީހުން ރައްދު ދީފައިވެ އެވެ. އެގޮތުން ފެން ބިލު ވެސް ބޮޑު ވީ ހޫނުވުމުގެ ސަބަބުންތޯ ސުވާލު އުފައްދާފައިވެ އެވެ.

ހަމައެއާއެކު ރޯދައަށް ވަކި ބިލެއް ތައްޔާރުކުރާތީވެ، ފެބުރުވަރީ މަހުގެ ބިލު ވަނީ މާ ކުރިން ފޮނުވައިފައެވެ. އަދި ޖަނުއަރީ މަހުގެ ބިލާއި ފެބުރުވަރީ މަހުގެ ބިލް މާ ގާތްގާތުގައި އައުމުން އެކަމުގެ ކަންބޮޑުވުން ވެސް އާއްމު ރައްޔިތުން ކޮށްފައިވެ އެވެ. އަދި ބޭނުންނުކުރާ ޚިދުމަތަކަށް އަގު ނަގަނީ ކަމަށް ބުނެ ވެސް ބައެއް މީހުން ނުރުހުންފާޅު ކޮށްފައިވެ އެވެ.

މީގެ އިތުރުން ބިލުތައް ބޮޑު ކޮށްފައިވަނީ ރަމަޟާން މަހާއި ގުޅިގެން ސަރުކާރުން ދޫކުރި މަސްދަޅު ކޭސްތަކަށް ފައިސާ ހަމަޖެއްސުމުގެ ގޮތުން ކަމަށް ކަމަށް ވެސް ބައެއް މީހުން ތުހުމަތުކޮށްފައިވެ އެވެ.

ބިލުތައް ބޮޑުވެ، އާއްމު ރައްޔިތުންގެ ޝަކުވާ ބޮޑުވެފައިވާއިރު، ސްޓެލްކޯއިން ބުނީ ބިލު ހަދާފައިވަނީ ބޭނުން ކޮށްފައިވާ ކަރަންޓަށް ކަމަށެވެ.

ސްޓެލްކޯއިން ބުނީ އާއްމު ގޮތެއްގައި ކޮންމެ ރޯދަ މަހަކު ވެސް ކަރަންޓު ބޭނުންކުރާ މިންވަރު އިތުރު ކަމަށާއި، މިއަހަރުގެ ރޯދަ މަހު ކަރަންޓު ބޭނުން ކޮށްފައިވާ މިންވަރު އިތުރު ކަމަށެވެ. އަދި ވަކިން ޚާއްސަކޮށް ހޫނު މޫސުމާއެކު ވެސް ކަރަންޓު ބޭނުންކުރާ މިންވަރު އިތުރުވެފައިވާ ކަމަށް ސްޓެލްކޯއިން ބުނެ އެވެ.

ބިލުތައް ބޮޑުވެ، އާއްމު ރައްޔިތުންގެ ޝަކުވާތައް ބޮޑުވާނެތީވެ، ސްޓެލްކޯއިން ދިޔައީ ރޯދަ މަހުގެ ތެރޭގައި ކަރަންޓު ބޭނުންވާ މިންވަރު ފެންނަ ގޮތަށް އެ ތަފާސްހިސާބުތައް ސޯޝަލް މީޑިއާގައި އާއްމު ކުރަމުންނެވެ.

ފެން ބިލުތައް ބޮޑުވެފައިވާ މައްސަލައާ ގުޅިގެން އެމްޑަބްކިޔުއެސްސީގެ ބަހެއް ވަނީ ލިބޭ ގޮތް ނުވެފަ އެވެ.