މިސަރުކާރާމެދު ލައްކަ މީހުން ލައްކަ ވާހަކަ ދައްކައެވެ. ސަރުކާރަށް އަންނަން ދެއްކި ވާހަކަތަކާ ދިމާ އިދިކޮޅަށް ކަންކުރާތީއެވެ. އޭރުގެ ބަސްމަގާއި މިހާރުގެ އެބަސްމަގުގެ ރާގު ބަދަލުވިލެއް ބޮޑުކަމުންނެވެ. ވެރިކަމަށް އައިސްވެސް ދެންވެސް ދެއްކި ވާހަކަތަކާއި އެވާހަކަތަކުގެ ދިމާއިދިކޮޅު އަމަލުތަކުންނެވެ.

ސަރުކާރާ ދިމާލަށް "ކައްޒާބޭ"، "ބަހުލޫލް ސަރުކާރޭ" "އުނބޭ" ގޮވަނީ ސަރުކާރުގެ ކަންކަން އެހުރިގޮތުންނެވެ. އޭރާ މިހާރުގެ މިސާލުތައް އަދި ދެއްކިފައިހުރި ވާހަކަތަކާއި ކުޅެވިފައިހުރި ޑްރާމާތަކުގެ ވީޑިއޯ ފުޓޭޖްތައްވެސް ހިމަނައިގެންނެވެ. މިއީ ދޮގޭ ނުބުނެވޭހާ ސާފު ރީތިކޮށް ހަގީގަތް ބުނެދީގެންނެވެ.

އެބީދައިން ބަލާއިރު ނުކުރާނެ ކަމަށް ބުނި ކޮންމެ ކަމެއް މިހާރު އެވަނީ ކުރަންފަށާފައެވެ. ކަމަކަށްފަހު ކަމެއްކޮށް އެދަނީ އޭރު އެދެއްކީ ދޮގުވާހަކަ ތަކެއް ކަމަށް އަމިއްލައަށް ސާބިތު ކޮށްދެމުންނެވެ. ކައްޒާބޭ ގޮވާމީހުން އެގޮވަނީ އެހެންވެގެންނެވެ.

ސަރުކާރުން ކަންކަން ކުރުމުގައި އެގެންގުޅޭ މަކަރުވެރި ގޮތަކީވެސް ސަރުކާރުން ކިތައްމެ ނޫންކަމަށް ހެދުނަސް ބޮލެއް މައްޗަށްހުރި ކޮންމެ މީހަކަށް އެނގި ސާފު ކަމެކެވެ. އެކަމުގައި ގެންގުޅޭ ހީލަތްތެރި ގޮތަކީ އޮޅުވާލެވެން އޮތްއެއްޗެއް ނޫނެވެ. ބަހުލޫލޭ ގޮވަނީ އެކަމަށް ރިއާޔަތްކޮށެވެ.

އެބީދައިން ބަލާއިރު ސަރުކާރުން މިހާރު އެކުރަން އުޅޭ ފައިސާ ޗާޕުކުރަން ނިންމި ނިންމުމަކީ އޭގެ ދިރިހުރި މިސާލެކެވެ. އަޑަށް ބާރުލައިފާ ނުކުރާނެކަމަށް ބުނި އެކަން ކުރަން އެވަނީ ދަމާ އެއްރޮއްޖަކަށް ފޫގަޅައިގެން އެންމެބޮޑު މީހާވެސް ނުކުމެ ވަތައް ފައިބައިގެން މަސައްކަތް ފަށާފައެވެ. ފޮނިވެލާފައި ގައުމު މިހިންގީ ރުފިޔާ ފައިސާ ޗާޕު ނުކޮށޭ ދެންވެސް އެކަންކުރާނީ އެގޮތަށޭ ވިދާޅުވެ ކެނޑި ފޮންޏާއި ބައިސާތައް އެހެން ގޮތަކަށް އަނބުރާލައިގެން އެކަން ކުރަން އެއުޅެނީ ހީލަތްތެރި ގޮތަކަށެވެ. ފައިސާދީގެން ގެންގުޅޭ ނޫސްތަކާއި ފުށްޖަހާ ރީތިކޮށްދޭން ވަޒީފާ ދީފައިތިބި ސޯޝަލް މީޑިޔާ ގުރޫޕްތައް ލައްވައި ކިތައްމެ ރީތި އަނދުނެއް އެޅުވިއަސް ކުރަން އުޅޭ ކަމަކީ ނެތްފައިސާ ޗާޕުކުރުމެވެ. އަނެއްކާވެސް ޔޫޓާން އެއް ނަގާފައި ނުކުރާން ބުނި އެކަން އެވަނީ ކުރަން ނިންމާފައެވެ. ބަހުލޫލެއްހެން މަކަރާ ހީލަތުން އުނބަށް ޖަހައި ރުފިޔާ ފައިސާ ޗާޕުކުރަން އެދަނީ މަރުފަލި ޖަހަމުންނެވެ. ގައުމުގެ އިގްތިސޯދު އެނގިތިބި އަދި އެކަމުގެ އާޖުފާޖު ދަންނަ މީހުން އެކަންކުރަން ދެކޮޅުހެދީމާ މަޖްބޫރުން ބޭރުކޮށްގެންނެވެ.

ކޮންމެއަކަސް ސަރުކާރުން ބުނެއުޅޭ ވާހަކައެއް އޮވެއެވެ. ތިމަންމެން ކަންކުރާނީ ޓަރޝަރީ ފެންވަރަށެވެ. ހުޅުމާލެ ހޮސްޕިޓަލް ޓަރޝަރީ ކުރި ގޮތަށެވެ. 400 މިލިއަން ލިބޭ ގޮތައް ޓަރޝަރީ ފެންވަރުގައި ބަންކަރިން ފެށިގޮތަށެވެ. ހަމައެގޮތައް މަކަރާ ހީލަތާ ދެއްކިވާހަކައާއި ދިމާއިދިކޮޅަށް ފައިސާވެސް އެޗާޕު ކުރަނީ މުޅިން އެހެން ނަމެއްގައި ޓަރޝަރީ ފެންވަރަށެވެ.