ދިވެހި ރައްޔިތުން ބިކަވެ ނިކަމެތިވާތަން ބަލަން، ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) ނޯންނާނެ ކަމަށާއި، އެ ޕާޓީން ރައްޔިތުންގެ ޙައްޤުގައި ނިކުންނާނެ ކަމަށާއި، ދިވެހި ޤައުމު ސަލާމަތްކޮށް ހެޔޮވެރިކަމެއް ޤާއިމު ކޮށްދެއްވާނެ ކަމަށް ރައްޔިތުންގެ މަޖިލީހުގެ ކުރީގެ ނައިބު ރައީސް އަދި ހޯރަފުށީ ދާއިރާގެ ކުރީގެ މެމްބަރު އަޙުމަދު ސަލީމް (ސައްލެ) ވިދާޅުވެއްޖެ އެވެ.
ސަލީމް މިހެެން ވިދާޅުވީ ހުކުރު ދުވަހުގެ ރޭ އެމްޑީޕީން ކުރިއަށް ގެންދިޔަ "ފުދިއްޖެ ފުނޑިއްޖެ" އެއްވުމުގައި ބައިވެރިވެ ވަޑައިގެން ވާހަކަ ދައްކަވަމުންނެވެ. ސަލީމް ވިދާޅުވީ އެމްޑީޕީ ނިކުމެ އޮތީ ދިވެހި ޤައުމުގެ ދިފާއުގައި ކަމަށެވެ. އަދި ދިވެހި ޤައުމަކީ ދިވެހި ރައްޔިތުންގެ ޙައްޤެއްކަން ޤަބޫލު ކުރަން ޖެހޭނެ ކަމަށް ވެސް ސަލީމް ވިދާޅުވި އެވެ.
މީގެ އިތުރުން ސަލީމް ވިދާޅުވީ ދިވެހި ރާއްޖޭގައި ވެރިކަން ކުރައްވާ އެއްވެސް ބޭފުޅަކު، ދިވެހި ޤައުމަކީ އެ ބޭފުޅެއްގެ ޙައްޤެއް ނުވަތަ މިލްކެއް ކަމަށް ޤަބޫލު ކޮށްގެން ނުވާނެ ކަމަށެވެ. ދިވެހި ޤައުމުގައި ކޮންމެ ކަމެއްވާތަން ބަލަން އެމްޑީޕީން ނުތިބޭނެ ކަމަށް ވެސް ސަލީމް ވަނީ ވިދާޅުވެފަ އެވެ. ރައީސުލްޖުމްހޫރިއްޔާާ ޑޮކްޓަރު މުޙައްމަދު މުޢިއްޒުގެ އެންމެ އަރިހުގައި ތިއްބެވި ބޭފުޅުންގެ ވަރަ ކޮށާލި ނަމަވެސް، އެމްޑީޕީގެ ލަޝްކަރުގެ ވަރަ ކޮށާ ނުލެވޭނެ ކަމަށް ވެސް ސަލީމް ވަނީ ވިދާޅުވެފަ އެވެ.
ދިވެހި ރައްޔިތުންގެ ޙައްޤުގައި ހިނގަން ޖެހިއްޖެ ނަމަ އެކަން އެމްޑީޕީން ކުރާނެކަން ފާހަގަ ކުރައްވައި ސަލީމް ވިދާޅުވީ، ދިވެހި ޤައުމުގެ ޙައްޤުގައި އެމްޑީޕީން ނުކުރާނެ އެއްވެސް ކަމެއް ނޯންނާނެ ކަމަށެވެ. އެގޮތުން ދިވެހި ރައްޔިތުން ބިކަވެ، ނިިކަމެތިވާތަން ބަލަން އެމްޑީޕީ ނޯންނާކެން ފާހަގަ ކުރައްވައި ސަލީމް ވިދާޅުވީ، އެމްޑީޕީން މިހާރު މި ނިކުތީ ކަމަށެވެ. އެމްޑީޕީން ދެން ގެޔަށް ނުވަންނާނެ ކަމަށާއި، ދިވެހި ޤައުމު ސަލާމަތް ކުރާނެކަމަށް ވެސް ސަލީމް ވިދާޅުވި އެވެ.
އެމްޑީޕީ އޮތީ ދިވެހި ރައްޔިތުންނާ އެކު ކަމަށާއި، އެ ޕާޓީން ފަހަތަށް ނުޖެހޭނެކަން ފާހަގަކުރައްވައި ސަލީމް ވިދާޅުވީ، ދިވެހި ޤައުމުގައި ހެޔޮ ވެރިކަމެއް ޤާއިމު ކޮށްދެއްވާނެ ކަމަށެވެ.
ދިވެހި ރައްޔިތުން ބިކަވެ ނިކަމެތިވާތަން ބަލާކަށް، ދިވެހި ރައްޔިތުންގެ ޑިމޮކްްރަޓިކް ޕާޓީ ނޯންނާނެ. މިނިކުތީ، މިނިކުތީ، މިނިކުތީ. ދެން އަޅުގަނޑުމެން ނުވަންނާނަން. ދިވެހި ޤައުމު ސަލާމަތް ކުރާނަން. ދިވެެހި ޤައުމުގައި ހެޔޮ ވެރިކަމެއް އަޅުގަނޑުމެން ޤާއިމު ކުރާނަން. ތިބޭފުޅުންނާއެކު އަޅުގަނޑުމެން މިތިބީ. އަޅުގަނޑުމެން އެމްޑީޕީ ފަހަތަކަށް ނުޖެހޭނަން. އަޅުގަނޑުމެން މިތިބީ ދިވެހި ރައްޔިތުންނާ އެކުގައި. ދިވެހި ފުލުހުންނާ އެކުގައި، ދިވެހި ސިފައިންނާ އެކުގައި، ދިވެހި މަސްވެރިންނާ އެކުގައި، ޓެކްސީ ޑްރައިވަަރުންނާ އެކުގައި، ދަރިވަރުންނާ އެކުގައި، މައިންނާ އެކުގަައި، މުޅި ދިވެހި ރައްޔިތުންނާ އެކުގައި.ެައަޙުމަދު ސަލީމް / ރައްޔިތުންގެ މަޖިލީހުގެ ކުރީގެ ނައިބު ރައީސް
މީގެ އިތުރުން އެ އެއްވުމުގައި ބައިވެރިވެ ވާހަކަ ދެއްކެވި ގިނަ ބޭފުޅުން ވަނީ ރައީސް މުޢިއްޒުގެ މި ސަރުކާާރަށް ވަރަށް ބޮޑަށް ފާޑު ވިދާޅުވެ ވާހަކަ ދައްކަވައިފަ އެވެ. އެެގޮތުން މިދިޔަ އެއް އަަހަރު ތެރޭގައި މި ސަރުކާރުން ރައްޔިތުން މާޔޫސްކޮށްފައިވާ ކަމަށާއި، މަގު މައްޗަށް ނިކުންނަން ޖެހުނީ ސަރުކާރަށް ރައްޔިތުންގެ އަޑު އިއްވުމަށް ކަމަށް ވެސް އެ ބޭފުޅުން ވަނީ ވިދާޅުވެފަ އެވެ.
ހުކުރު ދުވަހުގެ ރޭ އާޓިފިޝަލް ބީޗު ސަރަހައްދުން ފެށި އެއްވުމުގައި ގިނަ އަދަދެއްގެ ރައްޔިތުން ވަނީ ބައިވެރިވެފަ އެވެ. އެ ހިނގާލުމުގައި ބައިވެރިވި ރައްޔިތުން ވަނީ ރައީސް މުޢިއްޒުގެ އިސްތިއުފާ އަށް ވެސް ގޮވައިފަ އެވެ.
