ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ވެރިކަން އަޒުލުކުރުމަށް ރައްޔިތުންނަށް މިހާރު މަޖުބޫރުވެފައިވާ ކަމަށް ކެނދިކުޅުދޫ ދާއިރާގެ ކުރީގެ މެންބަރު އަހުމަދު އީސަ ވިދާޅުވެއްޖެއެވެ.
ރާއްޖެޓީވީން ގެނެސްދޭ ފުދިއްޖެ ފުނޑިއްޖެ ޚާއްސަ ކަވަރޭޖްގައި އަހުމަދު އީސަ ވިދާޅުވީ ރާއްޖޭގައި ހިންގާ ވައްކަންތަކާއި، ރައްޔިތުންނަށް ލިބެންޖެހޭ ޚިދުމަތްތަކާއި އަދިވެސް އެހެނިހެން ހުރިހާ ކަމެއް ސަރުކާރުން ދަނީ ރައްޔިތުންނަށް އޮޅުވާލަމުން ކަމަށެވެ.
އާސަންދައަށް ރައްޔިތުން ސަލާންޖަހަންޖެހޭ ހާލަތަށް ގޮސްފައިވާ ކަމަށާއި، ނަމަވެސް ރައީސް މުއިއްޒު ވެރިކަމަށް ވަޑައިގެންނެވީ އާސަންދަ ޚިދުމަތްފުޅާކޮށް، ދުބާއީ، ތައިލެންޑުން އާސަންދަ ޚިދުމަތް ރައްޔިތުންނަށް ދިނުމަށް ކަމަށެވެ. އަދި ޑޮލަރު ރޭޓް ދަށްކުރާނެ ކަމަށް ވިދާޅުވި ނަމަވެސް މިސަރުކާރުގައި ބްލެކް މާކެޓު ބޮޑުކޮށް، ޑޮލަރުގެ ރޭޓް ދުވަހަކު ވެސް ބޮޑުނުވާ މިންވަރަށް ބޮޑުކޮށްފައިވާ ކަމަށް އޭނާ ވިދާޅުވިއެވެ.
އަހުމަދު އީސަ ވިދާޅުވީ ރާއްޖޭގެ ހާލަތު އޮތްގޮތުން މިއަދު ރައްޔިތުންނަށް ގާނޫނު އަސާސީން ދީފައިހުރި ބާރުގެ ތެރެއިން މަގުމަތިން މިވެރިމީހާ އަޒުލުކުރުމަށް މަޖުބޫރުވެފައިވާ ކަމަށެވެ.
ރައްޔިތުންނަށް ގާނޫނު އަސާސީން ދީފައިހުރި ބާރުގެ ތެރެއިން ނުކުމެ މަގުމަތިން މިވެރިމީހާ އަޒުލުކުރަން ރައްޔިތުންނަށް މިހާރު ނުކުތުމަށް ރައްޔިތުންނަށް މަޖުބޫރުވެއްޖެ. އަޅުގަނޑަކީ ކަމު އޮތްގޮތަށް ނޫން ގޮތަކަށް ވާހަކަ ދައްކާ މީހެއް ނޫން. އަޅުގަނޑަކަށް ނޭނގޭ އެހެން މީހަކު ނުކުންނަނީ ކީއްކުރަންކަމެއް. އަޅުގަނޑު 31 ވަނަ ދުވަހު މަގުމައްޗަށް މިނުކުންނަނީ މުއިއްޒުގެ ވެރިކަން ބަދަލުކުރެވެންޏާ ކުރަން. ބަދަލުކުރެވޭނެ އެއްވެސް ގޮތެއް އޮވެއްޖެއްޔާ ކުރާނަން. މިއީ އަޅުގަނޑު އަމިއްލައަށް ދެންނެވި ވާހަކައެއް. ޕާޓީގެ ހައިސިއްޔަތުން ދެއްކެވި ވާހަކައެއް ނޫން އެނގޭތޯ. އަޅުގަނޑު މިނުކުންނަނީ ހަމައެކަނި ހަޅާލަވާލާފައި ގެއަށް ވަންނާކަށް ނޫން.ކެނދިކުޅުދޫ ދާއިރާގެ ކުރީގެ މެންބަރު އަހުމަދު އީސަ
މިސަރުކާރަށް ރައްޔިތުންގެ އަޑު ނީވޭކަން ފާހަގަކުރައްވައި އަހުމަދު އީސަ ވިދާޅުވީ ރައްޔިތުމީހާ ބާރަށް ހަޅޭލެވި ނަމަވެސް އަޑުނީވޭނެ ކަމަށާއި، މިސަރުކާރުގެ ސިޔާސީ ބޭފުޅުން ވެސް ތިއްބެވީ ރައްޔިތުންނަށް ޚިދުމަތްކޮށް، ރައްޔިތުންގެ ހާލަތު ރަނގަޅުކުރަން ނޫން ކަމަށެވެ.
ކުންފުނިތަކުން ވައްކަން ކުރަން މިއުޅޭ ގޮތުން ވައްކަން ކުރާ ގޮތުން ވެސް ހީވާން ފަށާފި މިހާރު މިމީހުން ވެސް ގަބޫލެއް ނުކުރޭ މާދަމާ އިރުއާރާއިރު މިވެރިކަން އޮންނާނޭ. އެހެންވީމަ އިރުއޮއްސުމުގެ ކުރިން އަތުޖެހުނު އެއްޗެއް ވިއްޔާ ނަގައިގެން ގެއަށް ދިއުމޭ އެންމެ ބުއްދިވެރި ގޮތަކީ އެގޮތަށް ކުންފުނިތަކުގެ ވެރިން އުޅޭތަން އަޅުގަނޑަށް ފެންނަން ފަށައިފި. ހުދު އަޅުގަނޑު ކައިރީގައި މިސަރުކާރުގެ އެކި މަގާމުތަކުގައި ތިއްބަވާ ބޭފުޅުން އައިސް އެބަ ދަންނަވާ ސަރުކާރުން ކުންފުނިތަކުން މިވެނި ކުންފުންޏަކަށް މިތަން މިލިއަން ރުފިޔާ ދިމްޔާތަށް ވައްދަން މަޖުބޫރުކޮށްފައި އެއޮތީ. ކޮންމެ މަހަކު މިކުންފުނިން މިހާވަރު ދިމްޔާތަށް ދޭންޖެހޭ. އެކުންފުނިން އެހާވަރު ދޭންޖެހޭ. ސީދާ ރައީސުލްޖުމްހޫރިއްޔާ ކަނޑައަޅުއްވަނީ.ކެނދިކުޅުދޫ ދާއިރާގެ ކުރީގެ މެންބަރު އަހުމަދު އީސަ
އަހުމަދު އީސަ ވިދާޅުވީ ރާއްޖޭގައި ވެރިކަން ކުރުމަށް އިންތިޚާބުކުރި ބޭފުޅާ ކުންފުނިތަކުން ވަގަށް ނަގާ އަދަދު ކަނޑައަޅާ ބޭފުޅަކަށް ބަދަލުވެފައިވާ ކަމަށެވެ. އެހެންކަމުން މިފަދަ ވެރިކަމެއް ދެމެހެއްޓުމަށް ހެޔޮނުވާނެ ކަމަށް އޭނާ ވިދާޅުވިއެވެ.
