ރައްޔިތުންނަށް އަދުލުވެރި ވެރިކަމެއް ކޮށްދެއްވާނެ ކަމަށް ވައުދުވެވަޑައިގެން ވެރިކަމަށް އައިސް ރައީސް ޑރ. މުހައްމަދު މުއިއްޒު ގެންދަވަނީ އަމިއްލަ އަންބޮޑި ބޮޑުކުރައްވަމުން ކަމަށް ރައްޔިތުންގެ މަޖިލީހުގެ މެދުހެންވޭރު ދާއިރާގެ ކުރީގެ މެންބަރު އަލީ އާޒިމް ވިދާޅުވެއްޖެއެވެ.
އަލީ އާޒިމް އެފަދައިން ވިދާޅުވީ އެމްޑީޕީގެ ހަރުގެ ޖަލްސާގައި ވާހަކަދައްކަވަމުންނެވެ.
އާޒިމް ވިދާޅުވީ ދިވެހިންނަކީ ނިކަމެތި އަދި އުނދަގޫ އަދި އަބަދު މީހުންނަށް ސަލާންޖަހައިގެން ހާލުގައި އުޅެންޖެހޭވަރުގެ ބައެއް ނޫންކަމަށާއި ރާއްޖޭގެ ރައްޔިތުންނަކީ އެއަށްވުރެ މާ ތަނަވަސް، އަދި މުއްސަނދި އަދި ތަރައްގީ ގެނެވެން އޮތް ގައުމެއްގައި ދިރިއުޅޭ ބައެއް ކަމަށެވެ.
އާޒިމް ވިދާޅުވީ ކައިރި ސަރަހައްދުގެ އަވައްޓެރި ގައުމުތަކަށް ނަޒަރު ހިންގާލާއިރު، އެ ގައުމުތަކުގައި ޖީޑީޕީ، ނުވަތަ ބޮލަކަށް ޖެހޭ ނިސްބަތް، ބޭރުފައިސާ ދިވެހިރާއްޖެއަށް ވަންނަ އަދަދަށް ބަލާއިރު، ރާއްޖޭގެ ކޮންމެ ބޮލަކަށް 11 ހާސް ނުވަތަ 12 ހާސް ޑޮލަރު ރާއްޖެއަށް އެބަ ވަންނަކަމަށެވެ. އަދި މިއަދަދާއި 50 އިންސައްތަ ކައިރިކުރާ އެއްވެސް ގައުމެއް މި ރީޖަންގައިވެސް ނެތް ކަމަށް އާޒިމް ވަނީ ވިދާޅުވެފައެވެ.
އާޒިމް ވިދާޅުވީ ރާއްޖޭގެ ޤާނޫނު އަސާސީ ބުނާގޮތަށް ރަނގަޅަށް، ރީތިކޮށް ވެރިކަމެއް ހިންގުމަށްޓަކައި ކޮންމެ އަހަރަކު ރާއްޖޭގެ ހުރިހާ ރައްޔިތުން ހިމެނޭގޮތަށް އެކިއެކި ނަންނަމުގައި ޓެކުހުގެ ގޮތުގައި 40 ބިލިއަނަށް ވުރެ ގިނަ ރުފިޔާ ސަރުކާރަށް އެބަ ދައްކާކަމަށެވެ. ނަމަވެސް މިއަދު ސަރުކާރުން އެ ފައިސާ ޚަރަދުކުރަމުން އެ ގެންދަނީ ރައްޔިތުން ބޭނުންވާ ގޮތަށް ނޫންކަމަށާއި އެއީ ހުރިހާ ދިވެހިންނަށް ވެސް އެނގޭނޭ ހަގީގަތެއް ކަމަށް އޭނާ ވިދާޅުވިއެވެ.
އާޒިމް ވިދާޅުވީ މިހާރުގެ ރައީސް މުއިއްޒު ވެރިކަމަށް ވަޑައިގަތީ ރައްޔިތުންނަށް އަދުލުވެރި ވެރިކަމެއް ކޮށްދެއްވާނޭކަމަށް ވިދާޅުވެކަމަށާއި ނަމަވެސް ވެރިކަމަށް އައުމަށް ފަހު މި ފެންނަނީ އަދުލުވެރި ވެރިކަމެއް ކުރުމުގެ ބަދަލުގައި އަމިއްލަ އަންބޮޑި ބޮޑުކުރުމަށް މަސައްކަތް ކުރަމުން ދާ ތަން ކަމަށެވެ. އަދި ރައްޔިތުން އުޅޭ ހާލެއް، ރައްޔިތުންގެ ކަންބޮޑުވުމެއް އެއްވެސް ވަރަކަށް ބަލާތަނެއް ވެސް، އަދި ރައްޔިތުންނާއި މެދު އެއްވެސް ކަންބޮޑުވުމެއް މި ސަރުކާރުގެ ފަރާތުން ނުފެންނަކަމަށް އާޒިމް ވިދާޅުވިއެވެ.
އާޒިން ވިދާޅުވީ މި ސަރުކާރުން ކަންކަން ކުރަމުން އެ ގެންދަނީ ޤާނޫނު އަސާސީއަކަށް، ގަވައިދަކަށް ބެލުމެއް ނެތި ހިތުހުރިގޮތަކަށް ކަމަށެވެ. އެގޮތުން ރައީސުލްޖުމްހޫރިއްޔާ އާއި އޭނާގެ ވަޒީރުން ބިޒްނަސް ކުލާހުގައި ދުނިޔޭގެ އެކިކަންކޮޅަށް، ދަތުރުތައް އެ ކުރައްވަނީ ރައްޔިތުންގެ އަތުން ނަގާ ޓެކްސް ފައިސާކޮޅުގެ ބޭނުންކޮށްގެން ކަމަށް އާޒިމް ވިދާޅުވިއެވެ. އަދި މި ސަރުކާރުގެ ވެރިން އެ ކުރައްވާ ދަތުރުތަކަކުން ރާއްޖެއަށް ލިބުނު، މަންފާއެއް، ރައްޔިތުންނަށް ލިބުނު ފައިދާ އެއްވެސް ފެންނަން ނެތްކަމަށް އޭނާ ވިދާޅުވިއެވެ.
މީގެ އިތުރުން އާޒިމް ވިދާޅުވީ ރައީސްގެ އަނބިކަނބަލުން ފަސްޓްލޭޑީ ސާޖިދާ މުހައްމަދު ވެސް އެކަމަނާގެ ރައްޓިހިން ގޮވައިގެން ކޮންމެ ދުވަހަކު އާރަށަށް ވަޑައިގެން މަޖާކޮށް، ކަރޯކޭ ޖައްސަވަމުން ގެންދަވާ ކަމަށެވެ. އަދި ދާދި ފަހުން އެފްރިކާގެ ގައުމަކަށް ކުރެއްވި ދަތުރުފުޅަކަށް ފަހު އެނބުރި ރާއްޖެ ވަޑައިގެން، އެ ދަތުރަށް ހޭދަވީ ކިހާ ފައިސާއެއްތޯ މީޑިއާތަކުން ކުރި ސުވާލުގެ ޖަވާބުގައި އެ ވާހަކަ ދެއްކުންވެސް ހަރާމްކަމަށް ފަސްޓްލޭޑީ ވިދާޅުވެފައިވާ ކަމަށް އާޒިމް ވިދާޅުވިއެވެ.
ޤާނޫނު އަސާސީ ނުވަތަ ޤާނޫނު ބުނާގޮތަށް އަދި ރައްޔިތުން ބޭނުންވާ ގޮތަށް ރަނގަޅު ވެރިކަމެއް ހިންގުމަށް ޓަކައި ކޮންމެ އަހަރަކު، ތިބޭފުޅުން އަދި އަހަރެންވެސް ހިމެނޭގޮތަށް، ވިޔަފާރިވެރިން ހިމެނޭގޮތަށް، އެކިއެކި ނަންނަމުގަ އަޅުގަނޑުމެން ޓެކުހުގެ ގޮތުގައި ސަރުކާރަށް އެބ ދައްކަން 40 ބިލިއަން ރުފިޔާ. 36 ބިލިއަން 40 ބިލިއަން ރުފިޔާ އަހަރަކު. އަޅުގަނޑަށް ޔަގީން އަޅުގަނޑުމެންގެ ތެރެއިން ހަމަ އެންމެ ދިވެއްސަކުވެސް، 0.001 އިންސައްތަ ވެސް ގަބޫލެއް ނުކުރާނެ، އަޅުގަނޑުމެން މި ދޭ ފައިސާ ޚަރަދު އެ ކުރަނީ ރައްޔިތުން ބޭނުންވާ ގޮތަށް ކަމަކަށް ގަބޫލެއް ނުކުރާނެ. އަޅުގަނޑަށް ފެންނަ ތަނުގައި، ވެރިކަމަށް، އަދުލުވެރި ވެރިކަމެއް ކޮށްދޭނަމޭ ކިޔާފައި ވަޑައިގަންނަވާ، މަސްއަކަތް ކުރައްވަނީ އަމިއްލަ އަންބޮޑި ބޮޑުކުރުމަށް.ރައްޔިތުންގެ މަޖިލީހުގެ މެދުހެންވޭރު ދާއިރާގެ ކުރީގެ މެންބަރު އަލީ އާޒިމް
އާޒިމް އިތުރަށް ވިދާޅުވީ ގައުމުގެ ހާލަތަު މިހާ ދަށަށް ގޮސްފައިވާއިރު، އަތް އުރާލައިގެން ބަލަން ނުތިބެވޭނޭ ކަމަށާއި ރައްޔިތުން ބޭނުންވާ ގޮތަށް ހުރިހާކަމެއް ވެސް ވަންދެން މަގުތަކަށް ނުކުމެ އަޑުއުފުލަން ޖެހޭކަމަށެވެ. އާޒިމް ވިދާޅުވީ އެމްޑީޕީން މިމަހުގެ 31 ވަނަ ދުވަހު ބާއްވާ "ފުދިއްޖެ، ފުނޑިއްޖެ" ގެ ނަމުގައި މަގުމައްޗަށް މި ނުކުންނަނީ ދިވެހި ރައްޔިތުންގެ ހައްޤުޤައި އަޑުއުފުލުމަށް ކަށެވެ. އަދި ހުރިހާ ރައްޔިތުންވެސް މި ހަރަކާތުގައި ބައިވެރިވެ، ރައްޔިތުން އުފުލަމުންގެންދާ ތަކުލީފުތަކުގެ އަޑު މި ސަރުކާރަށް އިއްވަން ޖެހޭކަމަށް ވެސް އާޒިމް ވިދާޅުވިއެވެ.
