ސިނގިރޭޓް މަނާކުރާނެކަމުގެ އިޝާރާތެއް ރައީސް ޑރ. މުހައްމަދު މުއިއްޒު ދެއްވައިފިއެވެ.
ރ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން އުނގޫފާރަށް ވަޑައިގެން ރައްޔިތުންނާއި ބައްދަލުކުރައްވާ ވާހަކަދައްކަވަމުން ރައީސް ވިދާޅުވީ ވޭޕް މަނާކުރުމަކީ ބަޔަކަށް ފައިދާއެއް ހޯއްދަވައިދެއްވުމަށް ކުރެއްވި ކަމެއް ނޫން ކަމަށާއި، ސަރުކާރުގެ ވިސްނުން ހުރީ ބޭސްފަރުވާގެ ޚިދުމަތް ފޯރުކޮށްދިނުމުގެ އިތުރުން، ބަލި ޖެހުމުގެ ކުރިން އެ ބަލިތަކުން ދިފާޢުވުން ނުވަތަ ޕްރިވެންޓިވް ހެލްތު ކެއަރގެ ރާސްތާއިން ކުރިއަށް ދިއުން ކަމުގައި ފާހަގަކުރެއްވިއެވެ.
އެހެން ކަމުން ރަށު ރޫޙުގައި ރައްޔިތުން ތެދުވެ، އެ ރަށަކީ ދުންފަތުގެ ވަބާއިން ސަލާމަތްވެފައިވާ ރަށަކަށް ހެދުމަށް މަސައްކަތް ކުރުމަށްވެސް ރައީސުލްޖުމްހޫރިއްޔާ ވަނީ ހިތްވަރުދެއްވާފައެވެ.
ރައީސް ވިދާޅުވީ ވޭޕް މަނާކުރީ ޖީލެއް ސަލާމަތްކޮށް ކުރިއަށް އޮތް މުސްތަގުބަލަށް، ހާއްސަކޮށް ޒުވާން ޖީލުގައި އެކަން އަށަގަންނަމުންދިޔަ ބާރުމިނުގައި އެކަން ދިޔަ ނަމަ، އަތުނުޖެހޭ ހިސާބަށް އެކަންދާނެކަމަށެވެ.
ވޭޕްމަނާކުރުމުގެ ކަންތަކާއެކީގައި، ދުންފަތުގެ އިސްތިއުމާލުކުރުމުން ދުރުހެލިވުމަށް ފިޔަވަޅުތަކެއް އެޅީ، ބައެއް ބޭފުޅުން ވިދާޅުވަނީ ވަކި ބަޔަކަށް ފައިދާކުރާށޭ. ނޫން. އަޅުގަނޑު ބޭނުމެއް ނޫން އެ ދާއިރާއިން ޓެކްސް ބޮޑުކޮށްގެން އާމްދަނީ އިތުރުކުރަން. ފިނޭންސް މިނިސްޓްރީގެ ހިސާބުތައް ނަހަދާނެ ދުންފަތުގެ ބާވަތްތައް ގަނެގެން އިތުރުވާ ޓެކްސް އަށް ބަރޯސާވެގެން. އަޅުގަނޑުމެން ބޭނުންވަނީ ކޮންމެ މީހަކީ ދުންފަތުގެ ބާވަތްތައް ބޭނުންކޮށްގެން ލިބޭ ގެއްލުންތަކުން ދުރުވެފައިތިބި ބަޔަކަށްވާން. އެކަމަށް ބާރުއެޅުމުގެ ގޮތުން އެ ހެޔޮ ނިޔަތުގައި އެކަން ކުރަން ނިންމީ. އެހެންނަމަވެސް [ސިނގިރެޓް] އެއްކޮށް މަނާކޮށްލުމަކީ، ވޭޕާއި ހިލާފަށް، އެއީ ފަހުން އައިކަމެއް، އެހާ ބޮޑަށް އަށަގަނެފައި އޮތްކަމެއް ނޫން، ދުންފަތުގެ އިސްތިއުމާލުކުރުން ފަދައިން.ރައީސް ޑރ. މުހައްމަދު މުއިއްޒު
ރައީސް ވިދާޅުވީ ދެ ކަންތައް އެއްފަހަރާ އެއްގޮތަކަށް މަނާކުރުމަކީ އެގޮތަށް ކުރެވޭނެކަމެއް ކަމަށް އެމަނިކުފާނަށް ވިސްނިވަޑައިނުގަންނަވާ ކަމަށެވެ. އެހެންކަމުން މިއީ އެއްކަމަކަށްފަހު އަނެއްކަމެއް ކުރަންޖެހޭ ކަމަކަށްވާތީ އެގޮތަށް [ވޭޕް މަނާކޮށް ސިނގިރެޓް މަނާ ނުކުރަން] ނިންމީ ކަމަށް ރައީސް ވިދާޅުވިއެވެ.
ރައީސް ވިދާޅުވީ ރައްޔިތުންނަކީ ދުންފަތުގެ އިސްތިއުމާލުކުރަން ވަރަށް ބޮޑަށް އާދަވެފައިވާ ބައެއްކަމަށް އެނގިވަޑައިގަންނަވާ ކަމަށާއި، ސަރުކާރުން ވަރަށް އިސްކަމެއްދެއްވައިގެން ކޮންމެ ރަށެއްގައި، ރަށު ލެވެލްގައި ދުންފަތުގެ އިސްތިއުމާލުކުރުމުން ދުރުވެވޭނެ ގޮތްތައް ސިއްހީ މަރުކަޒުގައި ޓޮބޭކޯ ސެސޭޝަން ކްލިނިކްތައް ގާއިމްކުރެވި ހިދުމަތް ދޭން ފަށާފައިވާ ކަމަށެވެ.
އަޅުގަނޑު ބޭނުންވަނީ ރައްޔިތުން އެކަމުން ދުރުވާން. މިއީ އެއްގޮތަކަށް ވެސް އަޅުގަނޑު ދެކެންބޭނުންވާ ކަމެއް ނޫން.ރައީސް ޑރ. މުހައްމަދު މުއިއްޒު
ރައީސް ވިދާޅުވީ ޕްރިވެންޓިވް ހެލްތް ކެއަރ އަކީ އެންމެ އިސްކަންދެއްވާނެ ކަންތައް ކަމަށާއި، ބަލިޖެހުމުގެ ކުރިން ބަލިޖެހެން މެދުވެރިވާ ކަންކަމުން ދިފާއުވުމަކީ ކުރަންޖެހޭ ކަމެއްކަމަށެވެ. އެންމެ ބޮޑު މައްސަލަތައް ދިމާވަނީ ދުންފަތުގެ އިސްތިއުމާލުކުރުމުން ކަމަށާއި، އެ އާދަތަކުން ދުރަށް ދިއުމަށް ބާރުއެޅުމުގެ ގޮތުން ދުންފަތުގެ ބާވަތްތަކުގެ އަގުތައް މައްޗަށް ޖައްސާފައިވާ ކަމަށް ރައީސް ވިދާޅުވިއެވެ. އަދި އެއީ އެމަނިކުފާނުގެ ނިޔަތްކަމަށް ވެސް ރައީސް ވިދާޅުވިއެވެ.
