ޕާކިސްތާނުގެ ކުރީގެ ބޮޑުވަޒީރު ޢިމްރާން ޚާން، 14 އަހަރަށް ޖަލަށްލުމަށް ހުކުރު ދުވަހު ޙުކުމްކޮށްފިއެވެ.

އޭގެ އިތުރުން އޭނާގެ އަނބިކަނބަލުން ބުޝްރާ ބީބީ 7 އަހަރަށް ޖަލަށްލުމަށް ވަނީ ހުކުމް ކޮށްފައެވެ.

މި ޙުކުމަކީ އަލް-ޤާދިރު ޔުނިވަރސިޓީ ޕްރޮޖެކްޓް ޓްރަސްޓް އުފެއްދުމުގައި ބާރުގެ ނަހަމަ ބޭނުން ކުރުމާއި ކޮރަޕްޝަން ހިންގާފައިވާ ކަމަށް ބުނެ ހުށަހެޅި މައްސަލައެއްގައި އިއްވި ހުކުމެކެވެ.

ޖަލު ހުކުމުގެ އިތުރުން 1 މިލިއަން ޕާކިސްތާނީ ރުޕީސް (3,500 އެމެރިކާ ޑޮލަރު) ގެ ޖޫރިމަނާ އެއް ވެސް އިމްރާން ޚާންގެ މައްޗަށް އައެވެ. އަދި އަނބިކަނބަލުން ބުޝްރާ ބީބީ އަށް އެ އަދަދުގެ ދެބައިކުޅަ އެއްބައިގެ ޖޫރިމަނާ އެއް ވަނީ އިއްވާފައެވެ.

ހުކުމް ކުރީ ރާވަލްޕިންޑީގެ އަދިޔާލާ ޖަލުގައި ހިންގަމުންދާ އެކައުންޓަބިލިޓީ ކޯޓަކުންނެވެ. ޢިމްރާން ޚާން އޮގަސްޓް 2023 އިން ފެށިގެން ހުންނެވީ މި ޖަލުގައި ބަންދުކުރެވިފައެވެ. މި ކޯޓުން ޑިސެމްބަރު މަހު އޭނާގެ މައްސަލައިގެ ޙުކުމް ކުރަން ހަމަޖައްސާފައި އޮތުމަށްފަހު، އޭގެފަހުން ތިން ފަހަރެއްގެ މަތިން ޙުކުމް އިއްވުން ފަސްކޮށްފައިވެއެވެ.

ބުޝްރާ ބީބީ ވަނީ ކޯޓުގެ ގޯތިތެރެއިން ހައްޔަރު ކޮށްފައެވެ.

އިމްރާން ޚާން ކޯޓަށް ހާޒިރުވެވަޑައެއް ނުގަންނަވައެވެ. ޖަނަވަރީ 13 ވަނަ ދުވަހު ތިންވަނަ ފަހަރަށް ޙުކުމް ފަސްކުރި އިރު، ޢިމްރާން ޚާން، މީގެ ކުރިން ވިދާޅުވެފައިވަނީ މި ލަސްކުރުންތަކަކީ އޭނާއަށް "ޕްރެޝަރު" ބޮޑުކުރަން ކުރާ ކަމެއް ކަމަށެވެ.

މިއީ ކުރީގެ ބޮޑުވަޒީރު ކުށްވެރިވި ކަމަށް ކޯޓުން ހުކުމް ކުރި ހަތަރުވަނަ މައްސަލައެވެ.

މީގެ ކުރިން ކުށްވެރިވެފައިވާ ތިން މައްސަލައަކީ ދައުލަތައް ލިބުނު ހަދިޔާތަކެއް ވިއްކާލުމާއި، ދައުލަތުގެ ސިއްރުތައް ހާމަކުރުމާއި، ޤާނޫނާ ޚިލާފަށް ކައިވެންޏެއް ކުރެއްވި ކަމަށް ބުނެ ހުށަހެޅި މައްސަލަތަކެވެ. މި ތިން މައްސަލައިގައިވެސް ޙުކުމް ބާޠިލްކުރެވި ނުވަތަ ތަންފީޒު ކުރުން ފަސްކުރެވިފައިވެއެވެ. ނަމަވެސް، ޢިމްރާން ޚާން އަދިވެސް ހުންނެވީ ޖަލުގައެވެ. އޭނާއާ ދެކޮޅަށް އަދިވެސް އެތައް ބައިވަރު މައްސަލަތައް އަދިވެސް ހުށަހެޅިފައިވެއެވެ. ޢިމްރާން ޚާން މި މައްސަލަ ތައް ސިފަކުރައްވަނީ "ޕޮލިޓިކަލް ވިޗްހަންޓް" ގެ ގޮތުގައެވެ.

ޢިމްރާން ޚާންގެ ވަކީލު ފައިސަލް ފަރީދު ޗައުދުރީ އެންމެ ފަހުން މިކުރި ހުކުމް ކުށްވެރިކޮށް ބުނެފައިވަނީ މިއީ ޢިމްރާން ޚާނާއި އޭނާގެ އަނބިކަނބަލުންނާ ދެކޮޅަށް ކުރަމުންދާ ތާކުންތާކު ނުޖެހޭ ޝަރީއަތްތަކެއް ކަމަށެވެ.

ކޯޓުން އިއްވި މި ހުކުމަކީ "ނޭޝަނަލް އެކައުންޓަބިލިޓީ ބިއުރޯ (އެންއޭބީ) އަށް ދައުލަތައް އެންމެ ލާރިއެއްގެ ގެއްލުމެއްވެސް ލިބުނުކަން ސާބިތުކޮށްދެވިފައިނުވާ ހަމައެކަނި މައްސަލަ ކަމުގައި ވެދާނެ،" ކަމަށް ވަކީލު މީޑިއާ ދިން ބަސްދީގަތުމެއްގައި ބުނެފައިވެއެވެ.

ޗައުދުރީ އިތުރަށް ބުނެފައިވަނީ އަލް-ޤާދިރު ޓްރަސްޓާއި ޢިމްރާން ޚާން ނުވަތަ އޭނާގެ އާއިލާއަށް އަމިއްލަ މާލީ ފައިދާއެއް ލިބުނުކަން ދައްކައިދޭ އެއްވެސް ހެއްކެއް އެންއޭބީ އަށް ހުށަހެޅިފައިނުވާ ކަމަށެވެ.

"ޢިމްރާން ޚާނާއި ބުޝްރާ ބީބީއާ ދެކޮޅަށް ޖިނާއީ ދަޢުވާތައް ޕްރޮސިކިއުޝަނުގެ މަރުޙަލާގައި ސާބިތުކޮށްދެވިފައެއް ނުވޭ. މުޅި މައްސަލައަކީ ސިޔާސީ ގޮތުން ބާރުއަޅައިގެން ކުރިއަށް ގެންދާ މައްސަލައެއް. ޓްރަސްޓެއް އުފެއްދުމަކީ މަޞްލަޙަތު ފުށުއަރާ ކަމެއްކަމަށް ބެލެވެނީ ކިހިނެއްކަން އަހަރެންނަކަށް ނުވިސްނޭ،" ވަކީލު ބުނެފައިވެއެވެ.

ޢިމްރާން ޚާންގެ ޕާކިސްތާން ތަހްރީކް-އެ-އިންސާފް (ޕީ.ޓީ.އައި) ޕާޓީން މި ޙުކުމާ ގުޅޭގޮތުން ނެރުނު ފުރަތަމަ ބަޔާނުގައިވެސް ޗައުދުރީގެ ވާހަކަތައް ތަކުރާރުކޮށްފައިވެއެވެ.