"މެމްބާޝިޕް ޑްރައިވްގައި ޕާޓީއަށް ހުށަހެޅުނު އެތައް ހާސް ފޯމެއް މި ޕާޓީގެ ފަރާތުން އިލެކްޝަންސް ކޮމިޝަނަށް ހުށަހަޅާފައި ވަނިކޮށް، މަދުން ނަމަވެސް ސައްހަ ނޫން ފޯމުތަކެއް ހުށަހެޅިފައިވާކަން މި ޕާޓީއަށް މިހާރު ވަނީ ފާހަގަ ކުރެވިފައި،"

މިއީ ވެރިކަން ކުރާ މައި ޕާޓީ ޕީއެންސީން ވަގު ފޯމަށް އިއުތިރާފުވެ ނެރުނު ބަޔާނުގައި ބުނެފައިވާ ގޮތެވެ.

ވަގު ފޯމުތަކުގެ މައްސަލަ ބޮޑުވެ، އާންމުންގެ މެދުގައި ކަންބޮޑުވުން އުފެދި، އެކި ފަރާތްތަކުން ވަނީ ޝަކުވާ ހުށަހަޅާފައެވެ. އަމިއްލަ އިޚްތިޔާރުގައި ނޫން ގޮތަކަށް ޕާޓީގެ މެމްބަރޝިޕަށް އިތުރުކުރެވިފައިވާ ކަމަށް ބުނާ ފަރާތްތަކުގެ އަދަދު އިތުރުވަމުންދާކަން އެނގެނީ ސޯޝަލް މީޑިއާގެ އެކި ޕްލެޓް ފޯމްތަކުގައި ކުރަމުން އަންނަ ޕޯސްޓްތަކުންނެވެ. ޕީއެންސީގެ މެމްބަރޝިޕް އިތުރުކުރުމުގެ މަސައްކަތް ކުރިއަށް ގެންދިޔަ ގޮތާ ގުޅޭ ގޮތުން ޕީއެންސީން އޭރު ޕޯސްޓްކޮށްފައިވާ ފޮޓޯތަކާ އެނޫންވެސް ވާހަކަތައް ދަނީ ދައުރުވަމުންނެވެ.

ޕީއެންސީގެ މެންބަރޝިޕް އިތުރުކުރުމުގެ މަސައްކަތް ކުރިއަށް ގެންދިޔަ ގޮތާ މެދު އޭރުވެސް ބަޔަކު ދިއައީ ސުވާލު އުފައްދަމުންނެވެ. އަދި އެކަން އެ ޕާޓީގެ މެމްބަރުންނަށް ވެސް އިނގެއެވެ. އެއީ، ޕީއެންސީގެ މެމްބަރުންނަށް ވެސް އިނގޭ ހަގީގަތެކެވެ. ބޮޑު ސިއްރެކެވެ. މި މައްސަލައިގައި ޒިންމާދާރު ފަރާތްތަކާމެދު ފިޔަވަޅު އެޅުމަށް ގިނަ ފަރާތްތަކުން އޭރު ވެސް ގޮވާލަމުންދިއައެވެ.

ރައީސް މުއިއްޒާއި އަބްދުއްރަހީމް ބޭނުންވީ ޕާޓީއަށް މެންބަރުން އިތުރުކުރާށެވެ. ގައުމުގައި އޮތް އެންމެ ބޮޑު ސިޔާސީ ޕާޓީއަށް ޕީއެންސީ ހެދުމަށެވެ. އެގޮތުން ޕާޓީގެ ލީޑާޝިޕުގެ ތެރެއިން މެމްބަރުން ހަމަކުރަން އެންމެ ފުރަތަމަ ކަނޑައެޅި ޓާގެޓަކީ 75،000 މެންބަރުންނެވެ. އެ ޓާގެޓަށް މެމްބަރުން ހަމަކުރިއެވެ. ވަރަށް ފަސޭހައިންނެވެ. ހިތައް އެރިއެވެ. ވެރިކަން ކުރާ ޕާޓިއަށް ހާދަ ތާއީދެއް އެބައޮތެވެ. ކޮންމެ ދުވަހަކު އެތައް ސަތޭކަ ފޯމެއް ހަވާލުކުރާ މަންޒަރު ފެނުމުންނެވެ. ޕީއެންސީގެ ދެވަނަ ޓާގެޓަކަށް ވީ 100،000 މެމްބަރުންނެވެ. އެ އަދަދަށް ވެސް މެމްބަރުން ހަމަކުރަން ފެށީއެވެ. މައުލޫމާތު ލިބުނު ގޮތުން މި މަސައްކަތާ ހަވާލުވެ އުޅުއްވަނީ ޕީއެންސީއަށް ނިސްބަތްވާ ބައެއް މަޖިލީސް މެންބަރުންނާއި ޕާޓީގެ ތެރޭގައި އިސްކޮށް އުޅުއްވި ބައެއް ބޭފުޅުންނެވެ.

ރާއްޖޭގެ އެންމެ ބޮޑު ސިޔާސީ ޕާޓީގެ ގޮތުގައި އޮތުމަށް ކުރި މަސައްކަތުގެ ތެރެއިން އުފަންވީ މުޅިންވެސް ދޮގާ މަކަރާ އޮޅުވާލުމެވެ. އެތައް ހާސް ބައެއްގެ ޒާތީ މައުލޫމާތުން ވައްކަންކޮށް ޕާޓީގެ ދަފްތަރުގައި ޖެއްސިކަން ފަޅާއެރީއެވެ.

ބައެއް މީހުން ބުނާ ގޮތުން އޭރު އޮތީ ޕީއެންސީއަށް 100،000 ފޯމު ވެސް ފުރާފައެވެ. އިލެކްޝަން ކޮމިޝަނަށް ހުށަވެސް އަޅާފައެވެ. އޭގެ ތެރެއިން ވަރަށް ބޮޑު ބައެއް އިލެކްޝަންސް ކޮމިޝަން (އީސީ)ން ރިޖެކްޓު ވެސް ކުރިއެވެ. ބައެއް ފޯމުތައް ބަލައިގަނެ، ޕްރޮސެސް ވެސް ކުރީއެވެ. މިކަމުގެ ސަބަބުން އިލެކްޝަންސް ކޮމިޝަނުގެ ދައުރާ މެދުވެސް ބައެއް މީހުން ސުވާލު އުފެއްދިއެވެ. އެނގޭހާ ވެސް އެއްޗަކީ ގޯހެއް އުޅޭ ކަމެވެ. ޚާއްޞަކޮށް، ޕާޓީތަކުގެ މެމްބަރޝިޕް ރަޖިސްޓަރީ ބެލެހެއްޓުމުގައި ކޮމިޝަނުން ޢަމަލުކުރަމުންދާ އުސޫލުތަކާއި، މިފަދަ މައްސަލަތައް ހުއްޓުވުމަށް އެޅިފައިވާ ފިޔަވަޅުތަކުގެ ހަރުދަނާކަން އިތުރުކުރަން ޖެހޭ ކަމެވެ. މި މައްސަލަ ތަޙްޤީޤުކޮށް، ޒިންމާދާރު ފަރާތްތަކާމެދު ޤާނޫނީ ފިޔަވަޅުވެސް އަޅަން ޖެހޭ ކަމެވެ.

މައްސަލަ އިންތިހާއަށް ގޯސްވެފައިވަނިކޮށް، އެމްޑީޕީގެ ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) ޕީއެންސީއަށް ވަގަށް ވެއްދުމަކީ ގިނަ ބަޔަކަށް މިކަން ރޭކާލީ ހިސާބޭ ވެސް ބުނެވިދާނެއެވެ. ފިއްޓޭއަކީ މިހާރުގެ ސަރުކާރަށް އެންމެ ބޮޑަށް ފާޑުވިދާޅުވާ އެއް ބޭފުޅެކެވެ. މަޖިލީހުގައި އާއި އެމްޑީޕީ ޕޯޑިއަމްތަކުގައި ވާހަކަފުޅު ދައްކަވާއިރު، ގިނަ ބައެއްގެ ސަމާލުކަން ހުއްޓޭ، ޝައުޤުވެރި ރާގަކަށް ވާހަކަ ދައްކަވާ ބޭފުޅެކެވެ. ވީއިރު، ފިއްޓެ ސިއްރު ސިއްރުން ޕީއެންސީއަށް ސޮއި ކުރާނެ ކަމަށް ގަބޫލު ނުކުރެވެއެވެ. ފިއްޓެ ފަދަ މެމްބަރަކު ޕީއެންސީއަށް ސޮއިކުރައްވާ ނަމަ އެފަދަ ބޮޑު ރަސްމިއްޔާތެއްވެސް ބާއްވާނެ ކަމަށް ބެލެވެއެވެ.

މި ހުރިހާ ކަމެއް ހިނގާފައިވަނިކޮށް ހޯމަ ދުވަހުގެ ހެނދުނު ހޭލި އިރު ފިއްޓެވެސް މިވަނީ ވަގަށް ޕީއެންސީއަށް ވައްދާފައެވެ. މި ކަމުގެ އެއްވެސް މަޢުލޫމާތެއް އޭނާއަށް ލިބިފައެއް ނުވެއެވެ. މިއީ ހަމައެކަނި ފިއްޓެއަށް ދިމާވި ކަމެއް ނޫނެވެ. އެމްޑީޕީގެ ގައުމީ މަޖިލީހުގެ ބައެއް މެންބަރުންނަށް ވެސް ހަމަ ދިމާވީ މިހެންްނެވެ. ފިއްޓެގެ ޕާޓީ ބަދަލު ކުރި މައްސަލަ މިހާ ބޮޑުވީ އެއީ މަޖިލީހުގެ މެމްބަރަކަށް ވީތީއެވެ. ދާދި ފަހުން ފާސްކުރި ޤާނޫނު ބުނާ ގޮތުން ޕާޓީ ބަދަލު ކުރާތަނުން މެމްބަރުކަން ގެއްލެއެވެ. މި އުފެދުނު ހާލަތަކީ އެއީ އެވެ. ފިއްޓޭގެ ގޮނޑިއާއި މެދު ސުވާލު އުފެދުނީއެވެ.

މި މައްސަލައަކީ ރާއްޖޭގެ ޑިމޮކްރަސީގެ ނާޒުކު ވަގުތެއްގައި ދިމާވެފައިވާ ސީރިއަސް މައްސަލައަކަށް ވާއިރު، މިކަމުގެ ސަބަބުން ޤައުމުގެ ސިޔާސީ މާޙައުލަށް ކޮށްފާނެ ނޭދެވޭ އަސަރުތައް ކުޑަކުރަން ޖެހެއެވެ. އެހެންކަމުން މިކަމުގެ ކަންބޮޑުވުން ފާޅުކޮށް އެމްޑީޕީން އީސީއާއި ބައްދަލުކޮށް ޝަކުވާ ހުށަހެޅިއެވެ. މި މައްސަލައިގެ ޙަޤީޤަތް ހާމަކޮށް، ކަމާ ގުޅުންހުރި ފަރާތްތައް ޖަވާބުދާރީ ކުރުވަން އެދުނެވެ.

ވަގު ފޯމުތަކެއްގެ މައްސަލަ މި ރާއްޖޭގައި ޖެހުނީކީ އަލަކަށް ވެސް ނޫނެވެ. ކުރިން ވެސް މި މައްސަލަ ބޮޑުވެ، އިލެކްޝަންސް ކޮމިޝަން (އީސީ)ން އޮތީ ފިޔަވަޅުތަކެއް އަޅައިފައެވެ.

ފޯމު ލިބުމާއެކު، އެ ފަރާތުގެ ފޯނަށް މެސެޖެއް ލިބޭނެއެވެ. ޞައްޙަ ނޫން ފޯމެއްނަމަ، އޮންލައިންކޮށް ރިޕޯޓު ކުރުމުގެ ފުރުޞަތު އޮންނާނެއެވެ. އެހެންނަމަވެސް، މި ނިޒާމު އަދިވެސް ފުރިހަމަ އެއް ނޫނެވެ. ސަބަބަކީ މި ހުރިހާ ކަމެއް މިހެން އޮއްވާ، ޕީ.އެން.ސީއަށް ވަގު ފޯމްތަކެއް ވެއްދުމެވެ. ދެން އުފެދޭ ސުވާލަކީ، ހަމަ މިގޮތަށް ނޭނގި، ކިތައް މީހުން ރަޖިސްޓަރީ ކުރެވިފައިވާނެ ބާވައެވެ؟

މަޖިލީހުގެ މެންބަރެއް ޕީއެންސީ އަށް ވަގަށް ވެއްދުމުގެ މައްސަލައިގައި، ޕީއެންސީން ޖަވާބުދާރީވާން ޖެހޭނެ ކަމަށް އާންމުން ގޮވާލަމުންދަނިކޮށް ޕާޓީއަށް ޤަވާޢިދާ ޚިލާފަށް މެންބަރުން އިތުރުކުރުމަށް ހިންގާފައިވާ ޢަމަލުތައް މިހާރު ވަނީ ހާމަވެފައެވެ. އެންމެ ފަހުން އެ ޕާޓީން ނެރުނު ބަޔާނުގައި، ޤަޞްދުގައި ޞައްޙަނޫން ފޯމުތައް ބޭނުންކޮށްގެން މީހުން ޕާޓީއަށް ވައްދާފައިވާކަމަށް މިވަނީ އިޢުތިރާފްވެފައެވެ. މި ކަމަކީ ޕާޓީގެ ލީޑަރޝިޕްގެ ސަމާލުކަމަށް އައިސްފައިވާ މައްސަލައެއް ކަމަށާއި، މިކަމާ ގުޅޭގޮތުން އިތުރަށް ބަލައި، އަޅަންޖެހޭ ފިޔަވަޅުތައް އަޅާނެ ކަމަށް ބުނެފައިވެއެވެ.

ވަގުފޯމް ފުރިމީހުން އެނގޭ ކަމަށާއި، ޕީއެންސީގެ ތެރެއިން މިކަން ކުރުމަކީ ލަދުވެތިކަމެއް ކަމަށް މާފަންނު މެދު ދާއިރާގެ މެންބަރު އަސްމާ ރަޝީދު ވެސް ވިދާޅުވެފައިވާއިރު، މިއީ އެ ޕާޓީއަށް އެނގިގެން ގަސްތުގައި ކޮށްފައިވާ ކަމެއް ކަން އިނގެއެވެ.