ވަގު ފޯމު ހުށަހަޅައިގެން މެމްބަރުން އިތުރު ކުރުމުގެ ތުހުމަތު ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މައްޗަށް ކުރެވިފައި ވަނިކޮށް އިލެކްޝަންސް ކޮމިޝަން (އީސީ) އަށް ސައްހަ ނޫން ފޯމުތަކެއް ހުށަހެޅި ކަމަށް އެ ޕާޓީން އެއްބަސްވެއްޖެ އެވެ.

ޕީއެންސީން ވަގު ފޯމުތަކެއް އީސީއަށް ހުށަހެޅިކަމަށް އެއްބަސްވެފައިވަނީ އެ ޕާޓީން އަންގާރަ ދުވަހު ނެރުނު ބަޔާނެއްގައެވެ.

މަޖިލިސް މެމްބަރުންވެސް ހިމެނޭ ގޮތަށް ގިނަ އާންމު ރައްޔިތުންގެ ޒާތީ މައުލޫމާތުތައް ވަގަށް ނަގައިގެން ޕީއެންސީއަށް ވެއްދި މައްސަތަލަތަކެއް މީގެ ކުޑަ ދުވަސްކޮޅެއް ކުރިން ފެށިގެން އަންނަނީ ފެންމަތިވަމުންނެވެ. ނަމަވެސް މީގެ ކުރިން އެ ޕާޓީން ބުނަމުން އައީ އެފަދަ ވައްކަމެއް ނުކުރާ ކަމަށެވެ.

ގިނަ ބައެއްގެ ޒާތީ މައުލޫމާތުން ވައްކަންކޮށް ޕީއެންސީގެ މެމްބަރުން އިތުރުކުރުމަށް އެ ޕާޓީގެ ދަފްތަރުގައި ޖެއްސިކަމަށް މިއީ ޕީއެންސީން އެއްބަސްވި ފުރަތަމަ ފަހަރެވެ.

އެ ޕާޓީން ހުށަހެޅި ފޯމުތަކުގެ ތެރޭގައި ސައްޚަ ނޫން، ވަގު ފޯމުތަކެއް ގިނަ އަދަދަކަށް ހިމެނޭކަން ފާހަގަކުރެވިފައިވާ ކަމަށް ޕީއެންސީން މިއަދު ނެރުނު ބަޔާނެއްގައި ބުނެފައިވެ އެވެ.

ޕީއެންސީއިން ނެރުނު ބަޔާނުގައި ބުނީ، އެ ޕާޓީގެ ފަރާތުން ހުށަހަޅާ ފޯމުތަކުގެ ސައްހަކަން ވެރިފައި ކުރެވޭނެ އެއްވެސް ގޮތެއް އެ ޕާޓީއަށް ލިބިފައި ނެތް ކަމަށެވެ.

އަދި ޕާޓީގެ އިލެކްޝަންސް ޕޯޓަލް މެދުވެރިކޮށް އެ ފޯމުތައް އަޕްލޯޑު ކުރަމުންދިޔަ ނަމަވެސް، ޕާޓީއަށް ލިބޭ ފޯމުތަކުގެ ސައްހަކަން ކަށަވަރު ކުރުމުގެ ގާބިލުކަން ނެތުމުގެ ނަތީޖާއަކީ ފޯމެއްގެ ސައްހަ ކަމާއި މެދު ސުވާލެއް އުފެދޭ ހިސާބަކީ އިލެކްޝަންސް ކޮމިޝަނަށް ފޯމު ހުށަހެޅުމުގެ ފަހުގެ މަރުހަލާއެއް ކަމުގައި ވުން އެއީ ހަމައެކަނި އެ ޕާޓީއަށް އޮތް ގޮންޖެހުމެއް ނޫން ކަމަށް ވެސް ޕީއެންސީގެ ބަޔާނުގައި ބުނެފައިވެ އެވެ.

މިދިޔަ އަހަރުގެ ނިޔަލަށް 100،000 މެމްބަރުން ހަމަކުރުމަށް ޕީއެންސީގެ ލީޑަރު އަދި ރައީސް ޑރ. މުހައްމަދު މުއިއްޒު އެދިވަޑައިގަތުމާ އެކު މެމްބަރުން އިތުރު ކުރުމުގެ ގިނަ ހަރަކާތްތަކެއް އެ ޕާޓީން ކުރިއަށްގެންދިޔަ އެވެ. މިނިސްޓަރުންނާއި، މަޖިލިސް މެމްބަރުންނާއި، ކުންފުނިތަކުގެ ވެރިންނާއި އަދި އެހެނިހެން ސިޔާސީ މަގާމުތަކުގައި ތިއްބެވި ބޭފުޅުން ވެސް ވާދައަށް ފޯމު ފުރައިގެން އެ ޕާޓީގެ ސެކްރެޓޭރިއަޓާ ހަވާލުކުރި އެވެ.

އޭގެ ތެރެއިން ބައެއް ފޯމުތަކާ ރައީސް މުއިއްޒު އާއި މަޖިލިސް ރައީސް އަބްދުއްރަހީމް އަބްދުالله ވެސް ހަވާލުވެވަޑައިގެންނެވި އެވެ. އެ ފޯމުތައް ޕީއެންސީން އީސީއަށް ހުށަހަޅައި ޕްރޮސެސް ކުރަމުން ދަނިކޮށް ވަގު ފޯމު ހުށަހެޅި ކަމުގެ މައްސަލަތަކެއް ފެންމަތިވި އެވެ. އޭގެ ތެރެއިން ބައެއް ފޯމުތަމުގެ ހެކިވެރިންނަށް ސޮއިކޮށްފައި ތިބީ ސަރުކާރުގެ ސިޔާސީ މަގާމުތަކުގައި މިވަގުތު ވެސް ތިއްބެވި ބޭފުޅުންނެވެ.

ޕީއެންސީއަށް ސޮއި ނުކުރާ ބައެއް މީހުންވެސް އެމީހުންނަށް ނޭނގި އެ މީހުންގެ ޒާތީ މައުލޫމާތާއި ފޮޓޯ އަދި ފިންގަޕްރިންޓް ޖަހައިގެން ފޯމު ފުރައި ހުށަހެޅުމުން އެ ފޯމުތައް ޕްރޮސެސްކޮށް އެ މީހުންގެ ރަޖިސްޓްރީ ބަދަލުކޮށްފައިވާކަން ހާމަވި އެވެ. އޭރު ވެސް ސަރުކާރުގެ ބައެއް މިނިސްޓްރީތަކާއި ކުންފުނިތަކުގެ ތެރޭގައި ޕީއެންސީގެ ހަރަކާތްތެރިން ފޯމު ފުރަމުންދިޔަ ފޮޓޯތަކެއް އާންމުވި އެވެ.

މި މައްސަލަ ގިނަބައެއްގެ ސަމާލުކަމަށް އައީ ހޯމަ ދުވަހު ވައިކަރަދޫ ދާއިރާގެ މެމްބަރު ހުސައިން ޒިޔާދު (ފިއްޓޭ) ގެ ނަމުގައި ވަގު ފޯމެއް ހުށަހަޅައިގެން އެ ފޯމު ޕްރޮސެސްކޮށް އޭނާގެ ރެޖިސްޓްރީ ޕީއެންސީއަށް ބަދަލުކުރިކަން ފަޅާއެރުމުންނެވެ. އެ މައްސަލާގައި ޒިންމާވާ ފަރާތްތަކާ ދެކޮޅަށް ފިޔަވަަޅު އަޅާނެ ކަމަށް އީސީން ވަނީ ބުނެފަ އެވެ.

ސިޔާސީ ޕާޓީތަކުގެ ގާނޫނުގެ 49 ވަނަ މާއްދާގައި ސިޔާސީ ޕާޓީއެއްގެ މެންބަރުކަމަށް، ގަވާއިދާ ހިލާފަށް މީހެއްގެ ނަން ހުށަހަޅައިފިނަމަ އެކަން ކުރި ފަރާތެއް 5،000ރ. އާއި 10،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ އެވެ. އެއީ ގަވާއިދާ ހިލާފަށް ހުށަހެޅި ކޮންމެ ފޯމަކަށް ޖެހޭ އަދަދުކަމަށް ވަނީ ބަޔާންކޮށްފައެވެ.