19 ވަނަ މަޖިލީހުގައި އެމްޑީޕީ މެމްބަރެއްގެ ގޮތުގައި ހޮޅުދޫ ދާއިރާ ތަމްސީލު ކުރެއްވި ޔޫނުސް އަލީ އަށް ނޭނގި އޭނާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ވައްދައިފި ކަމަށް ބުނެފިއެވެ.
ޔޫނުސް ވިދާޅުވީ އޭނާ އަށް އެކަން އެނގުނީ އިލެކްޝަންސް ކޮމިޝަނުން ޓެކްސްޓް މެސެޖެއް ލިބުމުން ކަމުގައެވެ.
އެމްޑީޕީ ދަފްތަރުގައި އޮންނަ ޔޫނުސް ވިދާޅުވީ ލިބުނު މެސެޖުގައި އޮތީ އޭނާގެ މޯބައިލް ނަންބަރު ބޭނުންކޮށްގެން ހުށަހަޅާފައިވާ ސިޔާސީ ޕާޓީއެއްގެ މެންބަރުކަމުގެ ފޯމެއް ކޮމިޝަނަށް ލިބިފައިވާ ކަމަށާއި، އޭނާގެ ނަމުގައި އެއްވެސް ހުށަހެޅުމެއް ވޭތޯ އީސީއެމް މައި ޕޯޓަލް އަށް ވަދެ ކަށަވަރުކޮށްލުމަށް އެދޭ ކަމަށެވެ.
ޔޫނުސް ވިދާޅުވީ އޭނާ ޕާޓީ ބަދަލު ކުރަން ފޯމެއް ފުރާފައި ނުވާނެ ކަމަށެވެ.
އެމްޑީޕީގެ ދަފްތަރުގައި ހިމެނޭ ގިނަ އަދަދެއްގެ މެމްބަރުން ޕީއެންސީ އަށް ވަގަށް ބަދަލު ކޮށްފައިވާ އެތައް މައްސަލަ އެއް ފެންމަތިވެފައިވާއިރު، އޭގެ ތެރޭގައި އެމްޑީޕީ އަށް ނިސްބަތްވާ މިހާރުގެ މަޖިލިސް މެމްބަރަކާއި، ކުރީގެ ބައެއް މެމްބަރުންނާއި އެޕާޓީގެ ގައުމީ މަޖިލިސް މެމްބަރުންވެސް ހިމެނެއެވެ.
