އެސިސްޓަންޓް ކޮމިޝަނަރ އޮފް ޕޮލިސް ޢަބްދުﷲ ޝަރީފް ފުލުހުންގެ ހިދުމަތުގެ ގާނޫނާ ޚިލާފް ވެފައިވާތީ އޭނާގެ މައްސަލަ ބަލައިދިނުމަށް އެދި އަކްރަމް ކަމާލުއްދީން ޕޮލިސް ބޯޑަށް ހުށަހަޅުއްވައިފިއެވެ.

ހައުސިންގ މިނިސްޓްރީގެ ކުރީގެ ސްޓޭޓް މިނިސްޓަރ އަކްރަމް ހުށަހެޅުއްވި މައްސަލައިގައި ބުނެފައިވަނީ ބިންވެރިޔާ ސްކީމްގައި ހިމެނޭ ބިންތަކަކަކާ ގުޅޭ ލިޔުންތަކެއް ފޯޖުކޮށް، ހައުސިންގ ޑިވެލޮޕްމަންޓް ކޯޕަރޭޝަން މެދުވެރިކޮށް ބިން ދޫކޮށްފައިވާކަމަށް މީޑިއާގައި ފެންމަތިވި މައްސަލައާ ގުޅިގެން، 19 ޑިސެމްބަރު 2024 ގައި ދިވެހި ފުލުހުންގެ ހިދުމަތުގެ ފަރާތުން މީޑިއާއަށް މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، އޭނާ އަށް ނިސްބަތްކޮށް ސެންޓްރަލް އިންވެސްޓިގޭޝަން ކޮމާންޑްގެ ހެޑް، އެސިސްޓަންޓް ކޮމިޝަނަރ އޮފް ޕޮލިސް ޢަބްދުﷲ ޝަރީފް ދެއްކެވި ވާހަކަތަކުގައި، ދިވެހި ފުލުހުންގެ ހިދުމަތުގެ ގާނޫނު ގެ 29 ވަނަ މާއްދާގެ (ށ) އަދި (ބ) އާ ހިލާފަށް އަމަލުކޮށްފައިވާ ކަމަށެވެ.

މާލޭ ރަށްވެހިންނަށް ގޯތި ދޭން ހިންގި "ބިންވެރިޔާ" ސްކީމުގެ ދަށުން ގޯތި ލިބިފައިނުވާ ބައެއް ފަރާތްތަކަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ގޯތިތަކެއް ދޫކޮށްފައިވާކަމާއި، އެއް ލޮޓެއް އެކަކަށްވުރެ ގިނަ ފަރާތްތަކަށް ދޫކޮށްފައިވާކަން ހާމަކޮށްދޭ ލިޔެކިޔުންތަކެއް 18 ޑިސެމްބަރު 2024 ވަނަ ދުވަހު ސޯޝަލް މީޑިއާއާއި މީޑިއާގެ އެކި އެކި ވަސީލަތްތަކުގައި އާންމުވެފައިވާ ކަމަށާއި މި މައްސަލަ މީޑިއާގައި ފެންމަތިވުމާ ގުޅިގެން،  18 ޑިސެމްބަރު 2024 ގެ ރޭގަނޑުގެ ވަގުތެއްގައި ދިވެހި ފުލުހުންގެ ހިދުމަތުގެ ޓީމެއް އެޗްޑީސީއަށް ގޮސް، އެ މައްސަލަ ވަނީ ބަލަން ފަށާފައެވެ.

އެއާއެކު، މައްސަލައާ ގުޅިގެން މީޑިއާ މައުލޫމާތު ހިއްސާކުރުމަށްޓަކައި، ދިވެހި ފުލުހުންގެ ހިދުމަތުގެ ފަރާތުން 19 ޑިސެމްބަރު 2024 ގައި ނޫސްވެރިންގެ ބައްދަލުވުމެއް ބާއްވާ، ފުލުހުން ފާހަގަކޮށްފައިވަނީ، މިއީ، އެޗްޑީސީ މެދުވެރިކޮށް، ބިންވެރިޔާ ސްކީމްގެ ދަށުން ޝަރުތު ފުރިހަމަނުވާ ފަރާތަކަށް ބިންތަކެއް ދޫކޮށް، އެ ގޯތި ހަވާލުކުރުމުގެ ކަންކަން ކުރިއަށް ގެންދާކަމަށް ފުލުހުންގެ ސަމާލުކަމަށް އައުމުން 18 ޑިސެމްބަރު 2024 ގައި ފެށި ތަހުގީގާ ގުޅޭ މައުލޫމާތު ހިއްސާކުރުމަށް ބޭއްވޭ ނޫސްވެރިންގެ ބައްދަލަވުމެއް ކަމަށެވެ. 

އެ ނޫސްވެރިންގެ ބައްދަލުވުން ކުރިއަށް ގެންދިޔުމުގައި އިސް ދައުރެއް އަދާކުރި، އެސިސްޓަންޓް ކޮމިޝަނަރ އޮފް ޕޮލިސް  ޢަބްދުﷲ ޝަރީފް، ހިއްސާކުރި މައުލޫމާތުތަކުގައި، އެ ހާހިސާބަށް ކުރެވުނު ތަހުގީގުގައި ސުވާލުކުރުމުން (ބިންވެރިޔާ ސްކީމަށް) ކުރިމަތިލާފައިތިބި ބައެއް ފަރާތްތަކުން ޝަރުތު ހަމަނުވީމަ، އެކަން ގަބޫލު ނުކުރެވިގެން ހައުސިންގ މިނިސްޓްރީގައި ޝަކުވާކޮށް އެތާނގެ އިސްވެރިންނާ ބައްދަލުކުރުމަށް މަސައްކަތް ކޮށްފައިވާ ކަމަށް ފާހަގަކޮށްފައިވެއެވެ.

އަކްރަމް ހުށަހެޅުއްވި މައްސަލައިގައި ބުނެފައިވަނީ، އަދި މި ވާހަކައިގެ ތެރޭގައި ތަހުގީގާ މައުލޫމާތު ހިއްސާކުރި އެއް ފަރާތުން، ބިންވެރިޔާ ސްކީމަށް "ޝަރުތު ހަމަނުވުގެން، އެކަމާ ޝަކުވާ ކުރުމަށްޓަކައި، ކުރީގެ ހައުސިންގ މިނިސްޓްރީގެ ސްޓޭޓް މިނިސްޓަރަކާ ބައްދަލުކުރި ވާހަކަ އަދިއެ ޝަކުވާ ކުރުމަށްޓަކައި ބައްދަލުކުރީވެސް އޭރުގެ ސްޓޭޓް މިނިސްޓަރަކަށް ހުރި އަކްރަމް ކަމާލުއްދީނާ ކަމަށްވެސް މިފަރާތުން އެބަ ހާމަކުރޭ" ކަމަށް ވިދާޅުވެފައިވާ ކަމަށެވެ.

އަދި ފަހުން ނޫސްވެރިއަކު ކުރި ސުވާލެއްގެ ޖަވާބު ދެއްވަމުން، އަކްރަމް އާ ބައްދަލުކުރިކަމަށް ބުނާ ފަރާތަކީ، ފަޒީލް ރަޝީދު ކަމަށް ވެސް ބުނެފައިވެއެވެ.

މައްސަލައިގައި ފާހަގަ ކޮށްފައިވާ ގޮތުގައި ފުލުހުންގެ މި ބައްދަލުވުމުގެ ބޭނުމަކީ، އެޗްޑީސީ ތެރެއިން ގޯތި ތަކެއް ދޫކުރި މައްސަލަ ކަމަށްވާއިރު، އެ މައްސަލައިގެ ތެރޭގައި، ކުރީގެ ސަރުކާރުގެ އިސްވެރިންގެ މައުލޫމާތު ހިއްސާކުރަންޖެހޭ އެއްވެސް ސަބަބެއް ނެތެވެ. އަދި ވަކިން ހާއްސަކޮށް، ތަހުގީގު ފެށިގެން އުޅޭ މައްސަލައިގެ ތެރޭގައި، ހައުސިންގ މިނިސްޓްރީ މެދުވެރިކޮށް ކުރީގެ ސަރުކާރުން ވަކި ކަމެއް ކޮށްގެން އުޅޭ ކަމުގެ ތުހުމަތެއް ފެންމަތިވެފައިނެތީސް، ކުރީ ސަރުކާރުގެ މިނިސްޓްރީގެ ވެރިންގެ މައުލޫމާތު މިގޮތަށް ހިއްސާކުރުމުގެ މަގްސަދަކީ، ކުރީ ސަރުކާރަށް ނިސްބަތްވާ ފަރާތްތަކުގެ ނަން ކިލަނބުކޮށް، މި ސަރުކާރުގެ ތެރޭގައި ފެންމަތިވެގެން އުޅޭ ކޮރަޕްޝަންގެ މައްސަލައިގެ ހަގީގަތް އޮޅުވާލައި، އާންމުންގެ މެދުގައި ކުރީ ސަރުކާރަށް ނިސްބަތްވާ ފަރާތްތަކާ މެދު ނުރަނގަޅު ތަސައްވުރެއް ކުރެހުން ކަމަށް ބުނެފައިވެއެވެ.

"އެއްވެސް ފަރާތަކަށް ތުހުމަތު ނުކުރާކަމަށް ތަކުރާރުކޮށް ވިދާޅުވަމުން ގެންދިޔައިރު، މުޅި ނޫސްވެރިންގެ ބައްދަލުވުމުގައި އަޅުގަނޑު ފިޔަވައި އިތުރު މީހަކަށް އިޝާރާތްކޮށް ތުހުމަތު އަމާޒުވާފަދަ ވާހަކައެއް ފުލުހުން ދައްކާފައިނުވެއެވެ."

މީގެ އިތުރުން ހުށަހެޅި މައްސަލައިގައި ބުނެފައިވަނީ، މިއީ، ފުލުހުން ތަހުގީގު ކުރަމުންދާ މައްސަލަތަކުގައި ފުލުހުން އާންމުކޮށް އަމަލުކުރަމުންދާ އުސޫލުތަކާ ހަމަތަކާވެސް ހިލާފަށް ހިނގާފައިވާ ކަމެއް ކަމުގައެވެ.

ހިނގަމުންދާ ތަހުގީގަކަށް މީހަކު ދޭ މައުލޫމާތުތަކަކީ، ތަހުގީގުގެ އެހާ ޅަފަތުގެ މަރުހަލާގައި އާންމުކޮށް ހިއްސާކުރާ މައުލޫމާތެއް ނޫން ކަމަށާއި އެގޮތަށް އަމަލު ކުރަނީ، މައްސަލައެއްގައި ހެކިބަސް ދޭން ތިބި ފަރާތްތަކާއި، ތުހުމަތުކުރެވޭ ފަރާތްތަކުގެ ހައްގުތަކެއް އެކުލެވިގެންވާތީ އާއި، މައްސަލައެއްގައި ހެކިބަސް ދޭން ހުރި މީހެއް ނުވަތަ ތުހުމަތު ކުރެވިފައިނުވާ މީހަކަށް ދުރާލާ އެފަދަ މައުލޫމާތު އެނގިގެން ގޮސްފިނަމަ، ތަހުގީގަށް ހުރަސްއެޅުމުގެ ފުރުސަތު އޮންނާތީ ކަަމަށް ބުނެފައިވެއެވެ.

ވަކި މީހަކަށް ނުވަތަ ވަކި އިދާރާއަކަށް  ތުހުމަތުކުރެވޭކަން ނުވަތަ ނޫންކަން ކަނޑައަޅާފައި ނުވާކަމަށްވެސް އެ ބައްދަލުވުމުގައި އިތުރަށް ބައިވެރިވި ފުލުހުންގެ އޮފިސަރެއްގެ ފަރާތުން ތަކުރާރުކޮށް ފާހަގަކުރައްވަމުން ގެންދެވިއެވެ.

ފުލުހުންގެ ފަރާތުން އެ ދުވަހު ބޭއްވި ނޫސްވެރިންގެ ބައްދަލުވުން ނިސްބަތްވަނީ އެޗްޑީސީގެ މެނޭޖިންގ ޑިރެކްޓަރު އިސްމާޢީލް ފަޒުލް ރަޝީދުގެ ބޭބެ (ފަޒީލު ރަޝީދު) އަށް ފޯޖު ކޮށްގެން ގޯއްޗެއް ދީފައިވާ ކަމަށް ތުހުމަތުކުރެވޭ މައްސަލައަށެވެ.

އެއްވެސް މީހެއްގެ ނަން ބުނެފައި ނުވިނަމަވެސް، މައްސަލައާ ގުޅިގެން މިހާތަނަށް 6 ފަރާތެއްގެ ކިބައިން މައުލޫމާތު ސާފުކޮށްފައިވާކަމާއި، އޭގެ ތެރޭގައި އާންމު ފަރާތްތަކާއި، ސަރުކާރުގެ ކުންފުނިތަކުގައި ތިބި ބައެއް ފަރާތްތައް ހިމެނޭ ކަމަށް ނޫސް ކޮންފަރެންސްގައި ފުލުހުން ބުނެފައިވެއެވެ. ހުށަހެޅި މައްސަލައިގައި ބުނެފައިވަނީ "ނަމަވެސް، މިއިން  ފަރާތެއްގެ ނަން ހާމަކޮށްފައެއް ނުވެއެވެ. އަދި ތުހުމަތުގެ މަހައްލުގައި ހުރި އެޗްޑީސީގެ ވެރިންނާ ބެހޭ ގޮތުންވެސް ތުހުމަތު އަމާޒުވާ ފަދަ އެއްވެސް ވާހަކައެއް ދައްކާފައިނުވެއެވެ."

މައްސަލައިގައި އިތުރަށް ބުނެފައި ވަނީ، މިހާރު އަކްރަމް އަކީ ސަރުކާރުގެ އެއްވެސް މަގާމެއްގައި އަދި އެއްވެސް ތަނެއްގައި ހުރި ލިޔެކިޔުމަކަށް ބަދަލުގެނެވޭނެ ފަދަ މަގާމެއްގައި ހުރި މީހަކަށް ނުވާއިރު،  އޭނާގެ ނަން ވަކިން ފާހަގަކޮށް، އޭނާގެ މައްޗަށް ބޮޑެތި ތުހުމަތުތަކެއް އަމާޒުވެގެންދާ ގޮތަށް އެވާހަކަތައް ދެއްކުމަކީ، ފުލުހުންގެ އޮފިސަރެއްގެ ފަރާތުން ހިނގާދިޔަ ވަރަށް ޒިންމާދާރުކަން ކުޑަ އަމަލެއް ކަމުގައި ދެކޭ ކަމަށެވެ.

ދިވެހި ފުލުހުންގެ ހިދުމަތުގެ ގާނޫނު ގެ 29 ވަނަ މާއްދާގައި ފުލުހުންގެ ވާޖިބުތައް އަދާކުރުމުގައި ހިފަހައްޓަންޖެހޭ ހަމަތައް ކަނޑައަޅާފައިވާއިރު، ވަކިވަކި ފަރުދުންގެ ޙައްޤުތަކަށާއި މިނިވަންކަމަށް ރައްކާތެރިވުމާއި، ތިމާއާ ޙަވާލުވެގެންވާ މަސްއޫލިއްޔަތު އަދާކުރުމުގައި ފުލުހެއްގެ ހައިސިއްޔަތުން ލިބިދޭ ބާރު ޒިންމާދާރު ގޮތުގައި ބޭނުންކުރުމަކީ ފުލުހުންގެ މައްޗަށް އެ މާއްދާ (ށ) އަދި (ބ) އިން މަތިކޮށްފައިވާ ޒިންމާ އެއް ކަމަށް މައްސަލައިގައި ވެއެވެ.

"ފުލުހުންގެ އިސް މަގާމެއްގައި ހުރި ފަރާތެއްގެ ހައިސިއްޔަތުން، އެސިސްޓަންޓް ކޮމިޝަނަރ އޮފް ޕޮލިސް ޢަބްދުﷲ ޝަރީފް އަމަލުކޮށްފައިވާ ގޮތުގެ ސަބަބުން، އަޅުގަނޑުގެ ނަމާއި އަބުރަށް ހުތުރުވެ، ސޯޝަލް މީޑިއާގައި އަޅުގަނޑާ މެދު ތުހުމަތުތައް އަމާޒުވެ، އެކި އެކި ގޮތްގޮތުން ފުރައްސާރަތަކާ ކުރިމަތިވަމުން އެބަދެއެވެ."

ހަމައެއާއެކު، ގާނޫނުއަސާސީގައި ބަޔާންކުރާ ހައްގުތަކާއި މިނިވަންކަން ލިބިދިނުމުގައި އެއްވެސް މީހެއްގެ މެދުގައި ތަފާތުނުކުރުމާއި، ވަކިން ހާއްސަކޮށް އެމީހެއްގެ ސިޔާސީ ވިސްނުމަށް ބަލައި ތަފާތުނުކުރުމަކީވެސް ގާނޫނުއަސާސީގެ 17 ވަނަ މާއްދާއިން ކަށަވަރުކޮށްދީފައިވާ ހައްގަކަށް ވާއިރު، ޝަކުވާ ރައްދުވާ އޮފިސަރުގެ އަމަލުތައް ހުރިގޮތުގެ ސަބަބުން، މި ހައްގަށް ވެސް އުނިކަން އައިސްފައިވާ ކަމަށް ވެސް މައްސަލައިގައި ވެއެވެ.

މައްސަލައިގައި ތުހުމަތުގެ މަހައްލުގައި ތިބި މީހުންގެ ނަން ހާމަކުރުމެއްނެތި، އަދި އެއްވެސް ފަރާތަކަށް ތުހުމަތެއް ނުކުރާ ކަމަށް ބުނުމަށް ފަހުވެސް، އަކްރަމްގެ ނަން ވަކިން ފާހަގަކޮށް، ކުރީ ސަރުކާރުގެ ތެރެއިން ގޮތް ނޭނގޭ ކަންތައްތަކެއް ހިނގާފައިވާކަމަށް ދޭހަވާ މޭރުމުން ވާހަކަދައްކާފައިވުމުން، އަކްރަމް ނިސްބަތްވާ ސިޔާސީ ފިކުރަށް ބިނާކޮށް، އަޅުގަނޑާ މެދު ތައައްސުބާއެކު އަމަލުކޮށްފައިވާކަން ސާފުވާ ކަމަށް ވެސް މައްސަލައިގައި ބުނެފައިވެއެވެ.

"އެސިސްޓަންޓް ކޮމިޝަނަރ އޮފް ޕޮލިސް ޢަބްދުﷲ ޝަރީފް ފުލުހުންގެ ވާޖިބު އަދާކުރުމުގެ ތެރޭގައި އަމަލުކޮށްފައިވަނީ، އަޅުގަނޑަށް ގާނޫނުއަސާސީގެ 51 ވަނަ މާއްދާއިން ކަށަވަރުކޮށްދޭ ހައްގަށް އުނިކަން އަންނަ ގޮތަށް، އަދި އަޅުގަނޑުގެ ހައްގުތަކާއި މިނިވަންކަމަށް ފަރުވާލެއް ބެހެއްޓުމެއް ނެތި،" ކަމަށް ވެސް މައްސަލައިގައި ވެއެވެ.

ފުލުހުންގެ ފަރާތުން އެ ބައްދަލުވުމުގައި އަކްރަމް އަށް ނިސްބަތްކޮށް ދެއްކި ވާހަކަތަކުގެ ސަބަބުން، މުޖްތަމައުގެ ތެރޭގައި އޭނާގެ ނަން ކިލަނބުވެ، އޭނާ އަކީ ކުށެއްގެ ތުހުމަތުކުރެވިފައިވާ މީހެއްގެ ގޮތުގައި މުޖްތަމައުގެ ތެރޭގައި ބެލެވެން ފަށައިފި ކަމަށް ވެސް ހުށަހެޅި މައްސަލައިގައި ވެއެވެ.

"ފުލުހުންގެ މަސްއޫލިއްޔަތު އަދާކުރުމުގައި އަމަލުކުރަންޖެހޭ ގާނޫނާއި ގަވާއިދުތަކާއި، ފުލުހުން ހިފަހައްޓަންޖެހޭ ޕްރޮފެޝަނަލް މިންގަނޑުތަކާއި ހިލާފަށް، އެސިސްޓަންޓް ކޮމިޝަނަރ އޮފް ޕޮލިސް ޢަބްދުﷲ ޝަރީފް އަމަލުކޮށްފައިވާތީ، މި މައްސަލަ ބައްލަވައިދެއްވައި، ގާނޫނުގައިވާ ގޮތުގެ މަތިން އަޅުއްވަންޖެހޭ ފިޔަވަޅު އަޅައިދެއްވުމަށް އެދި،" މައްސަލަ ހުށަހަޅާ ކަމަށް ވަނީ ބުނެފައެވެ.

އަދި އަކްރަމް ވަނީ މި މައްސަލަ ފުލުހުންގެ ޕްރޮފެޝަނަލް ސްޓޭންޑަރޑްސް ކޮމާންޑް އަށްވެސް ހުށައަޅުއްވާފައެވެ.