ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އަަށް ނިސްބަތްވާ ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ޙުސެއިން ޒިޔާދު (ފިއްޓޭ)، ސަރުކާރު ހިންގާ މައި ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) އަށް ވަގު ފޯމު ފުރައިގެން ވައްދައިފި އެވެ.

ރާއްޖެއެމްވީ އާއި ވާހަކަ ދައްކަވަމުން ފިއްޓޭ ވިދާޅުވީ މިކަން އެންމެ ފުރަތަމަ އެނގުނީ ނިމިދިޔަ އަހަރުގެ ޑިސެމްބަރު މަހުގެ 23 ވަނަ ދުވަހުގައި ކަމަށެވެ. އަދި އެކަން އިލެކްޝަންސް ކޮމިޝަނުގެ ސަމާލުކަމަށް ވެސް ގެނެސްފައިވާ ކަމަށް އޭނާ ވިދާޅުވިއެވެ.

ފިއްޓޭ ވިދާޅުވީ އޭނާ ނިސްބަތްވާ ޕާޓީން އެހެން ޕާޓީއަކަށް ބަދަލުކުރި މައްސަލަ އިލެކްޝަންސް މޮކިޝަނަށް ހުށައެޅުމުން އެކަން ބަލާ ހައްލުކޮށްދޭނެ ކަމުގައިވެސް ވިދާޅުވި ކަމަށާއި ނަމަވެސް އަދިވެސް އެކަން ހައްލުކޮށް ނުދޭކަމަށެވެ.

ފިއްޓޭ ވިދާޅުވީ އޭނާގެ އިތުރުން ދާއިރާގެ ގިނަ ރައްޔިތުންވެސް ވެރިކަން ކުރާ ޕާޓީ ޕީއެންސީއަށް ވައްދާފައިވާ ކަމަށެވެ.

ފިއްޓޭ ވިދާޅުވީ، އޭނާގެ މައުލޫމާތުން ވައްކަން ކޮށް ޕީއެންސީގައި ޖައްސާފައި ވަނީ އެއްވެސް ހާލަތެއްގައި ނޭނގި ވައްކަން ކޮށްގެން ކަމަށާއި އެއީ ސީދާ ވައްކަމެއް ކަމަށެވެ. އަދި އެކަމެއް ހިނގީ މިދިޔަ އަހަރުގެ ޑިސެމްބަރު މަހުގެ 23 ވަނަ ދުވަހުގައި ކަމަށް ވެސް އޭނާ ވަނީ ވިދާޅުވެފައެވެ.

"ވީގޮތެއް ނޭނގެ. ނިދާ ހޭލިއިރު، ހުރީ ޕީއެންސީ އަށް ވަދެވިފަ. ވީނުވީއެއް ވެސް ނޭނގުނު. ދާއިރާގެ ގިނަ މެމްބަރުންތަކެއް ވެސް ހަމަ އެދުވަހު ޕީއެންސީއަށް ބަދަލުކޮށްފަ ވަނީ. އެކަން އިލެކްޝަންސް ކޮމިޝަނަށް އެންގީމަ ބުނި ރަނގަޅުކޮށްލަދޭނަމޭ. އެކަމަކު އަދިވެސް ނުކުރޭ." ފިއްޓޭ ވިދާޅުވިއެވެ.

އެ ފޯމުގައި ފިއްޓޭގެ ނަމުގައި ފިންގަރޕްރިންޓް ވެސް ޖަހައި ފޯމުގައި ވަނީ ސޮއިކޮށްފައެވެ.

ފިއްޓޭ ވިދާޅުވީ، މިއީ ވަރަށް ބޮޑު އޮޅުވާލުމެއް ކަމަށާއި އޭނާ އަށް ނޭނގި އޭނާގެ ޒާތީ މައުލޫމާތު ބޭނުންކޮށް ވަގު ސޮއި ކޮށް، އިނގިލީގެ ނިޝާން ޖަހާ ޕާޓީ ބަދަލު ކުރި މައްސަލަ ހުށަހަޅާނެ ކަމަށެވެ.

މިކަމާ ގުޅިގެން އިންތިޚާބުވި ޕާޓީ ބަދަލު ކުރިކަމަށް ބުނެ ގޮނޑި ގެއްލުވާލުމުގެ ފުރުސަތު އޮތް ކަމަށް ބުނެ ބައެއް މީހުންވަނީ ކަންބޮޑުވުންފާޅުކޮށްފައެވެ.

އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) ވަނީ އެކްސްގައި އެކަމުގެ ކަންބޮޑުވުން ފާޅުކޮށް ޓްވީޓް ކުރައްވާފައެވެ.

"އިލެކްޝަންސް ކޮމިޝަން، މީ ދެން ތަންކޮޅެއް ބޮޑުވަރު، މިއަދު އިރުއެރި އިރު މިއޮތީ އަޅުގަނޑުމެންގެ މަޖިލިސް މެމްބަރު ފިއްޓެ ވަގަށް ޕީއެންސީއަށް ވައްދާފައި، އިންތިޚާބުވި ޕާޓީ ބަދަލުކުރިކަމަށް ހަދާފައި ދެން ފިއްޓޭގެ ގޮނޑި ގެއްލުވާލާ" އިބްރޭ އެކްސްގައި ކުރެއްވި ޕޯސްޓުގައި ބުނެފައިވެއެވެ.

ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސެއިން ޒިޔާދު (ފިއްޓޭ) ގެ ޒާތީ މައުލޫމާތު ބޭނުންކޮށް، އޭނާގެ ނަމުގައި ފޭކް ސޮއި ކޮށް، ޕީއެންސީގެ ދަފްތަރުގައި ޖައްސާފައިވާއިރު، ގިނަ ފަރާތްތަކެއް އެމީހުންނަށް ނޭނގި ޕީއެންސީ އަށް ވައްދާފައިވާ ކަން ފާހަގަ ކުރެވެއެވެ. އެގޮތުން މީހުންނަށް ނޭނގި ޕީއެންސީ އަށް ވައްދާ ކަމުގެ އެތައް ޝަކުވާ އެއް ވަނީ ފެންމަތިވެފައެވެ. އަދި ޕީއެންސީ އަށް މީހުން ވެއްދުމަށް ދައުލަތުގެ ވަސީލަތްތައް ނަހަމަ ގޮތުގައި ބޭނުން ކުރާ ވާހަކަތައް ވެސް ވަނީ ފެންމަތިވެފައެވެ.