ރައީސް ޑރ މުޙައްމަދު މުއިއްޒުގެ ވެރިކަމަށް އަހަރުވީއިރު، ރާއްޖޭގެ ގިނަ ރައްޔިތުން އެމަނިކުފާނުގެ ވެރިކަމުގެ މަތިން ހިތް ފިލާ ފޫހިވެއްޖެއެވެ.
އެމަނިކުފާނަށް ވޯޓެއް ދިން މީހަކު ތާއީދެއް ކުރާ މީހަކު، ދިމާވުން އެއީ މި ފަހަކަށް އައިސް ދަތި އުދަނގޫ ކަމަކަށް ވެއްޖެއެވެ. ގިނަ މީހުން ބުނާ ގޮތުން އެމީހުން މިވެރިކަމުގެ މަތިން ފޫހިވީ އެމީހުން ހާލުގައި ޖެއްސުމުންނެވެ. ދިރިއުޅުމުގެ ޚަރަދުތައް އިންތިހާ ބޮޑުކޮށް ސަބްސިޑީތައް ކުޑަކޮށް ވިޔަފާރިތައް ބަނގުރޫޓްކޮށް ކޮވިޑްގައި ވެސް ރާއްޖެ ނުވެއްޓޭ ހިސާބަށް އިގްތިސާދީ ގޮތުން ވައްޓާލުމުންނެވެ.
މިހާލަތުގައި އެންމެ ގިނަ ބައެއްގެ ނަޒަރު ހުއްޓުނީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އަށެވެ. އޮޕޮޒިޝަން ޕާޓީ ކަމުގައި ވުމުން އެކަންޏެއް ނޫނެވެ. ގައުމު ހާލުގައި ޖެހޭ ކޮންމެ ފަހަރަކު ޑިމޮކްރަސީ ފަހަތަށް ސޮއްސާލަ ކޮންމެ ފަހަރަކު ރައްޔިތުން ނިކަމެތިވާ ކޮންމެ ފަހަރަކު އެކަމާއިގެން ތެދުވާ ޕާޓީއަކީ އެމްޑީޕީ ކަމަށް ވާތީއެވެ. ނަމަވެސް މި ވޭތުވެދިއަ އެއް އަހަރު ސަރުކާރުން ރައްޔިތުންނަށް ދެމުންދިއަ ގެއްލުންތަކާ ދެކޮޅަށް އެމްޑީޕީން ތެދުވާންޖެހޭ ވަރަށް ނުތެދުވާ ކަމަށް ވާހަކަ ދައްކާ މީހުންވެސް މަދެއް ނޫނެވެ. ސަބަބަކީ އެއީ އެމީހުންގެ އުއްމީދާވެސް ގުޅިފައިވާ ޕާޓީއަކީ އެމްޑީޕީ ކަމަށް ވާތީއެވެ.
އަހަރެއް ފާއިތުވެގެން ދިއުމަށް ފަހު މަންޒަރު ވަރަށް ބޮޑަށް ބަދަލުވެއްޖެއެވެ. 2024 ޑިސެމްބަރު 10 ވަނަ ދުވަހު އެމްޑީޕީން ބޭއްވި އާދަޔާ ޚިލާފް ބޮޑު އެއްވުމާއެކު އެމްޑީޕީ ދިރި އޮތްކަމާ އެއީ އަދިވެސް އެމްޑީޕީކަން ދިވެހިންނަށް ސާފުވެއްޖެއެވެ. އެއާއި އެކު މަޑުމަޑުން އެމްޑީޕީގެ އަސްލު ކުލަ ފާޅުވާން ފެށިއެވެ. އެތެރޭގައި ދިމާވި ކުދި ކުދި މައްސަލަތަކުގެ ސަބަބުން އެމްޑީޕީ ދޫކޮށްދިއަ އެތައް ބަޔަކު އެނބުރި އެމްޑީޕީއަށް އަންނަން ފެށިއެވެ. އެންމެ ފަހުން ގޮސް އެމްޑީޕީގެ ލީޑަރޝިޕްގައި މަސައްކަތް ކުރުމަށްފަހު އެމްޑީޕީއާއި ފެޔަށް ޖެހިލި ވަރުގަދަ އެތައް ފަހުލަވާނުންނެއް ވެސް އަލުން އެމްޑީޕީއާއި ގުޅުނީ އެވެ. މިހާ ހިސާބުން އެމްޑީޕީގެ އާއްމު މެމްބަރުންނާ ރައީސް މުއިއްޒު ވެރިކަމާ ދެކޮޅު ދިވެހި ރައްޔިތުންނަށް އައު އުއްމީދެއް ގެނުވީއެވެ. ދެން އޮތީ މުޅިން އައު ދުވަހެކެވެ. އެމްޑީޕީގެ އަސްލު ކުލަޔާ އަސްލު ޖޯޝާ އަސްލު ފޯރީގައި އެމީހުން ފެންނާނެ މުޅިން އައު ދުވަހެކެވެ.
އެމްޑީޕީގެ ޕޯޑިއަމްތަކުން އަބަދުމެ އިވޭ ޅެން ބައިތެއް އޮވެއެވެ. އެމީހުން އަބަދުވެސް ކިޔާދޭ ވާހަކަތަކެއް ހުރެއެވެ. އެމީހުން ބުނާ ގޮތުން މިތުރުންގެ ހިތައް ދަތި ކުރި ކަޅު ކޮންމެ ރެއެއް ވެސް ފިތުރަތުގެ އުސޫލުން އަލިވީލޭނީ ފަތިހަކަށެވެ.
އެމީހުންނަކީ ވެއްޓުނީމާ ތެދުވާ ބައެކެވެ. ތެދުވެ އިހުނަށްވުރެ ބާރަށް ދުއްވައިގަންނަ ބައެކެވެ. ޚިޔާލު ތަފާތުވުމާ ތަފާތު ޚިޔާލަށް ޖާގަ ދޭ ބައެކެވެ. ގުޅިގެން މަސައްކަތް ކުރަން ދަންނަ އާދަޔާ ޚިލާފު ޖޯޝެއް ހުންނަ ބައެކެވެ. ރާއްޖޭގައި ޕާޓީ ސިސްޓަމް އުފެދުނީއްސުރެ މިއަދާ ހަމައަށް އެތައް ޕާޓީއެއް އުފެދިއްޖެއެވެ. އެތައް ޕާޓީއެއް އުވިވެސް ހިނގައްޖެއެވެ. އެކަމަކު އެމްޑީޕީ ކަހަލަ ތަފާތު ޖޯޝެއް އުފައްދާ ކަށިން ހިތްވަރު ނެރޭ ޕާޓީއެއް ނެތް ކަން އެއީ ގިނަ ބަޔަކު ގަބޫލުކުރާ ހަގީގަތެވެ. ސަރުކާރު ޖަވާބުދާރީ ކުރުމަށް މަގުމަތީގެ ހަރަކާތް ހިންގުމަށް، މުޒާހަރާ ކުރުމަށް، އިހުތިޖާޖު ކުރުމަށް، ހައްގުތަކަށް ވަކާލާތު ކުރުމަށް އެއަށްވުރެ ފައްކާވެފައި އޮތް އެހެން ޕާޓީއެއް ނެތްކަން އެއީ ވެސް އެންމެން ދަންނަ ހަގީގަތެކެވެ.
ފިތުރަތުގެ އާއްމު އުސޫލުން އަޑިގަނޑަކަށްފަހު އުސްގަނޑެއް އައުމަކީ ހިނގާ ކަމެކެވެ. މަތިން ދާވަތް ދަށުންދާ ފަހަރު އައުމަކީ ވެސް ދިމާވާ ކަމެކެވެ. މިދިއަ އެއް އަހަރު އެމްޑީޕީ ހޭދަކުރީ މިފަދަ ދުވަސްތަކެއް ކަމަށް ވެދާނެއެވެ. ނަމަވެސް މިއަދު މިފެންނަނީ އެމީހުންގެ ސަފުތައް އަލުން ރުކުރުވާލާ ތަނެވެ. ދިމަ ދިމާއަށް މީހުން ބެހިލާތަނެވެ. ރަނގަޅަށް ތައްޔާރުވެ އަލުން ނުކުންނަ ތަނެވެ. އޮޑީގައި ކުރަން ހުރި މަރާމާތްތައް ކޮށް ދިޔަވާތަންތައް ބައްދާ، ފެހިކަހާ ފެނަށް ގަދަކޮށް, ވާވެލާ ވެލި ހަމަކޮށް، އަލުން އެމްޑީޕީގެ އޮޑި ދިވެހި ސިޔާސީ ކަނޑަށް ނުކުންނަ ތަނެވެ.
އެމީހުން ބުނާ ގޮތުން އެއީ ހުރިހާ ކަނޑަކަށް ހެޔޮވަރު އޮޑިއެކެވެ. ގިނަ ފަހަރަށް އެމީހުން ނުކުންނަ ދަތުރު ނިންމާލަނީ އައްސޭރި ހިފާފައެވެ. އަމާން ބަނދަރަކަށް ވާސިލްވެފައެވެ. ދިވެހިން އަމާން ކަމުގެ އައްސޭރިއަށް ގެންގޮސްފައެވެ.
