ކުޑަރަށެއް އަދި ބޮޑު ރަށެއް ނުބަލައި، ހުރިހާ ރަށަކަށް ވެސް ބޭނުންވާ ތަރައްޤީގެ މަޝްރޫއުތައް މި އަހަރު ފައްޓަވައިދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ހުވަދުއަތޮޅުގެ ރަށްތަކަށް އެ މަނިކުފާނު މިހާރު ކުރައްވާ ދަތުރުފުޅުގެ ތެރެއިން ބުދަ ދުވަހުގެ ހެނދުނު ގދ. ރަތަފަންދުއަށް ވަޑައިގެން ރަށުގެ ރައްޔިތުންނާ މުޚާތަބުކުރައްވާ ވިދާޅުވީ، ސަރުކާރުގެ ވިސްނުމަކީ އަދި ސިޔާސަތަކީ ވެސް ކުޑަ ރަށެއް ބޮޑު ރަށެއް ނުބަލައި، ހަމަހަމަކަމާ އެކު ޚިދުމަތްތައް ދިނުން ކަމަށެވެ.
އެގޮތުން، ރަތަފަންދުއަށް ވެސް ބޭނުންވަނީ އެންމެ އާބާދީ ބޮޑެތި ރަށްތަކަށް ވެސް ބޭނުންވާ ކަންކަން ކަމަށް އެ މަނިކުފާނު ވިދާޅުވިއެވެ.
މީގެ ކުރިން އެކި ސަބަބުތަކާ ހުރެ ރަތަފަންދޫއަށް ބޭނުންވާ ގިނަ މަޝްރޫއުތަކެއް މަޑުޖެހިފައިވާކަން ފާހަގަކުރައްވައި ރައީސް ވިދާޅުވީ އެ ރަށުގައި ކުރިއަށް ނުގެންދެވި ހުރި އެ މަޝްރޫއުތައް މި އަހަރު ތެރޭ ފައްޓަވައިދެއްވާ އަމަލީ ސިފައެއް ގެނެސްދެއްވާނެކަމުގެ ޔަގީންކަން ރަތަފަންދޫގެ ރައްޔިތުންނަށް ދެއްވާކަމަށެވެ.
މި އަހަރުގެ ބަޖެޓުގެ ތެރެއިން ބަލާނީ ވީހާ ވެސް ގިނަ ވައުދުތަކަކަށް އަމަލީ ސިފަ ގެނެސްދިނުމަށް އަމަލީ ގޮތުން މަސައްކަތް ފެށުމަށްކަމަށާއި މި އަންނަ އަހަރު، އެގޮތަށް ނުފެށި ހުރި މަޝްރޫއުތައް ފަށާނެކަމަށް ރައީސް ވިދާޅުވިއެވެ. އަދި މި ދެ އަހަރު ތެރޭގައި މިގޮތަށް ރަށްރަށުގައި ކުރަންޖެހިފައިހުރި ކަންކަން އަމަލީ ގޮތުން ހަމަ ހަގީގަތުގައި ވެސް ފަށައިދޭނެކަމުގެ ޔަގީންކަން ދެއްވާކަމަށް އެ މަނިކުފާނު ވިދާޅުވިއެވެ.
ރަތަފަންދޫ ކައުންސިލްގެ އިމާރާތުގެ ހާލަތު ދަށްކަން ފާހަގަކުރައްވާ ރައީސް ވިދާޅުވީ، 50 އެތައް ރަށެއްގައި ކައުންސިލްގެ އިމާރާތްތައް އެޅުމަށް މިހާރު ބަޔަކާ ހަވާލުކޮށްފައިވާއިރު އޭގެ ތެރޭގައި އެ ރަށް ވެސް ހިމެނޭ ކަމަށެވެ. ރަށުގެ ރައްޔިތުން އެންމެ ބޭނުންވާ ފަދައިން މި އަހަރު ތެރޭ ބަނދަރު ވެސް ހައްދަވައިދެއްވާނެ ކަމަށް އެ މަނިކުފާނު ވިދާޅުވިއެވެ.
ވަކިން ޚާއްސަކޮށް ޒުވާނުންނަށް ވޮލީ ކޯޓަކާއި، ޔޫތު ސެންޓަރެއްގެ އިތުރުން ޖިމެއް ވެސް ގާއިމުކޮށްދެއްވާނެ ކަމަށް ރައީސް ވިދާޅުވިއެވެ. އެންމެ އިސްކަމެއްދޭ ކަމެއްގެ ގޮތުގައި ރަށުގެ ސިއްޙީ މަރުކަޒު އިމާރާތުގެ ގޮތުންނާއި، މުވައްޒަފުންގެ ގޮތުން އަދި ވަސީލަތުގެ ގޮތުން ވެސް ރަނގަޅު ފެންވަރަކަށް ތަރައްގީކޮށްދެއްވާނެ ކަމަށް އެ މަނިކުފާނު ވިދާޅުވިއެވެ.
ރައީސް ވިދާޅުވީ، ރަތަފަންދޫ ސްކޫލުގައި މަލްޓިޕާޕަސް ހޯލެއް ގާއިމުކޮށްދީ، ހުއްޓިފައިވާ ރަށުގެ ފެނާއި ނަރުދަމާގެ މަސައްކަތް ވެސް މި އަހަރު ފައްޓަވައިދެއްވާނެ ކަމަށެވެ. އެކަން ކުރުމަށްޓަކައި ފިނޭންސް މިނިސްޓްރީގެ ތެރެއިން ފައިސާ ހަމަޖައްސަމުންދާ ކަމަށް ވެސް އެ މަނިކުފާނު ވިދާޅުވިއެވެ.
ރަތަފަންދުއަކީ ފަޚުރުވެރި އާއިލާތަކެއްގެ މައްޗަށް ނިސްބަތްވާ ރަށެއް. މި ރަށުގެ ތައުލީމަށް ދޭންޖެހޭ އިސްކަން، މި ރަށުގެ ދުޅަހެޔޮކަމަށް ދޭންޖެހޭ އިސްކަން، މި ރަށުގެ އިޖުތިމާއީ ހަމަހަމަކަމަށް، ކުރިއެރުމަށް ދޭންޖެހޭ ސަމާލުކަން އަޅުގަނޑުމެން ދޭނަން،ރައީސް ޑރ. މުހައްމަދު މުއިއްޒު
ތިން ދުވަހުގެ މުއްދަތަށް ކުރައްވާ މި ދަތުރުފުޅުގައި ހުވަދުއަތޮޅު ދެކުނުބުރީގެ ފަސް ރަށަކަށާއި، ހުވަދުއަތޮޅު އުތުރުބުރީގެ ހަތަރު ރަށަކަށް ރައީސް ވަޑައިގެންނެވުމަށް ވަނީ ހަމަޖެހިފައެވެ. އެގޮތުން، ހުވަދުއަތޮޅު ދެކުނުބުރިން އެމަނިކުފާނު އަންގާރަ ދުވަހު ވަނީ ހޯނޑެއްދޫ، ނަޑެއްލާ، ވާދޫ، ފިޔޯރީއަށް ވަޑައިގެންފައެވެ. ހުވަދުއަތޮޅު އުތުރުބުރީން އެ މަނިކުފާނުގެ މި ދަތުރުފުޅުގައި ވަޑައިގެންނެވުމަށް ހަމަޖެހިފައި ވަނީ ކަނޑުހުޅުދޫ، ނިލަންދޫ، މާމެންދޫ އަދި ދެއްވަދޫއަށެވެ.
މި ދަތުރުފުޅުގައި އެ މަނިކުފާނުގެ އަރިހުގައި ވަޒީރުންނާއި ސަރުކާރުގެ ބައެއް އިސްވެރިން ބައިވެރިވެވަޑައިގަންނަވައެވެ. ރައީސް ހުވަދުއަތޮޅުގެ ބައެއް ރަށްރަށަށް ކުރައްވާ މި ދަތުރުފުޅު ނިންމަވާލައްވައި، މާލެ ވަޑައިގެންނެވުމަށް ހަމަޖެހިފައިވަނީ ބުރާސްފަތި ދުހަވުގައެވެ.
