ރާއްޖެ އަށް މިހާރު ކުރަމުންދާ ވިއްސާރައިގައި އެއްވެސް ހާދިސާއެއްގައި ބޯހިޔާވަހިކަން ގެއްލި އިންސާނީ އެހީތެރިކަން ފޯރުކޮށްދޭން ޖެހިފައި ނުވާ ކަމަށް ނޭޝަނަލް ޑިސާސްޓަރ މެނޭޖްމަންޓް އޮތޯރިޓީން ބުނެފިއެވެ.
ޑިސާސްޓަރ މެނޭޖްމަންޓް އޮތޯރިޓީން ބުނެފައިވަނީ ބޯކޮށް ވާރޭ ވެހުމާއި އުދަ އެރުމުގެ ސަބަބުން މިހާތަނަށް 6 ރަށެއްގައި ފެންބޮޑުވެގެން ރިޕޯޓު ލިބިފައިވާ ކަމަށެވެ.
އުދަ އަރައިގެން ފެން ބޮޑުވެފައިވަނީ ށ. ނަރުދޫ އަދި ރ. އިނގުރައިދޫ ގައި ކަމަށާއި ވާރޭ ވެހި ދ. ކުޑަހުވަދޫ، ދ. މީދޫ، ފ. ނިލަންދޫ އަދި ފ. މަގޫދޫ ގައި ފެން ބޮޑުވެފައިވާ ކަމަށް ވެސް އެ އޮތޯރިޓީން ބުނެފައިވެއެވެ.
ފެން ބޮޑުވި ބައެއް ރަށްރަށުގައި ފެން ހިއްކުމުގެ މަސައްކަތުގައި ސިފައިން އަންނަނީ ހަރަކާތްތެރިވަމުން ކަމަށް އެމްއެމްޑީއެފް އިން ވަނީ ބުނެފައެވެ.
މޫސުން ގޯސްވެ، ބ. އަތޮޅުން ފެށިގެން ތ. އަތޮޅަށް އޮރެންޖު އިންޒާރު މެޓުން ވަނީ ނެރެފައެވެ.
