"ޖޯޝޭ ގެނައިމީ ގައުމީ އުފާ، އައިމި މޫސުންދޭ ހިޔާލުގާ" މިލަވައިގެ އަސްލު އަޑުގެ ވެރިޔަކީ މަޝްހޫރު ގައުމީ ލަވަކިޔުންތެރިޔާ އަބުދުﷲ ހަސަނެވެ. އޭނާ އެލަވަ ވިދާޅުވެފައިވާލެއް ކިތަންމެ ފުރިހަމަ ނަމަވެސް މިއަދު އަޅުގަނޑުމެންނާ ވަކިވެގެން ދިޔަ އަލްމަރްހޫމް އަހުމަދު އާތިފްގެ އަޑުން އެލަވަ ވިދާޅުވުމުން ލަވަޔަށާއި އަޑު އެހުން ތެރިންނަށް އިތުރު ދިރުމެއް ގެނުވިއެވެ.

 1987  ވަނަ އަހަރު މާރޗް މަހު ސިފައިންގެ ޚިދުމަތާއި ގުޅިވަޑައިގަތް މޭޖަރ އަހްމަދު އާތިފް އަކީ 30 އަހަރާއި 5 މަހާއި 9 ދުވަހު ސަރުކާރަށް ޚިދުމަތްކުރައްވާފައިވާ ހީވާގި ބޭފުޅެކެވެ. އާދިއްތަ ދުވަހު ކުއްލި ގޮތަކަށް އުމުރުން 51 އަހަރުގައި  ދުނިޔެ ދޫކުރައްވާ ވަޑައިގެންނެވީ އެތަކެއް ބަޔަކަށް ހަނދާނުން ފޮހެނުލެވޭނެ ވަރުގެ ހަނދާންތަކެއް މި ދުނިޔެއަށް ދޫކުރައްވާފައެވެ.

ސިފައިންގެ ޚިދުމަތުގައި އުޅުއްވި ދުވަސްވަރު އާތިފްވަނީ ފާހަގަކޮށްލެވޭ ގިނަ ކާމިޔާބީތަކެއް ހާސިލްކުރައްވާފަ އެވެ. އެގޮތުން ތިނެއް ނޮވެމްބަރުގެ މެޑަލްއާއި ސިފައިންގެ ޚިދުމަތުގެ މެޑަލްއާއި އަހްލާޤީ މެޑަލްއާއި އިހްލާސްތެރި ޚިދުމަތުގެ މެޑަލް އެ ބޭފުޅާއަށް ލިބިވަޑައިގެންނެވިއެވެ. ސިފައިންގެ ޙިދުމަތުގައި ލިބިފައިވާ  ފާހަގަކޮށްލެވޭ ރިބަން ތަކަކީ ޙާއްސަ ޚިދުމަތުގެ ރިބަން އެކަކާއި  އަހްލާގީ ކުލަ ރިބަން އެކެއް ދޭއް ތިނަކާއި  ކާމިޔާބުގެ ކުލައިގެ އެއްވަނަ ރިބަނާއި ރައީސުލް ޖުމްހޫރިއްޔާގެ ރިބަނެވެ.

ޝައްކެއް ވެސް ނެތް ގޮތުގައި އާތިފްއަށް ލިބިވަޑައިގެންނެވި މެޑަލްތަކަށް ބައްލަވާލެއްވި ކަމުގައި ވިޔަސް އިހްލާސްތެރިކަމާއި އަހްލާޤުގެ ގޮތުން އާތިފް އަކީ ރަގަޅު މީހެއްކަން ސާބިތުވެގެންދާނެ އެވެ. 

ދުނިޔެ ދޫކުރެއްވި އިރު އާތިފްގެ އަންބަކާއި 3 ދަރިން ދުނިޔޭގައި އެބަ ތިއްބެވެ. އެއީ  އަންހެން ދަރިއަކާއި 2 ފިރިހެން ދަރިންނެވެ.

ގައުމީ ޚިދުމަތް އެވޯޑްވެސް ލިބިވަޑައިގެންނެވި އާތިފްއަކީ ހުނަރުވެރި މިއުޒިޝަނެއް، ލަވަކިޔުންތެރިއެއް އަދި ތަފާތު އަމިއްލަ ރާގު އުފައްދަވާ ބޭފުޅުކެވެ. ހޮބީއެއްގެ ގޮތުގައި އެކި ލަވަތައް އެއް ކުރެއްވުމުގެ ޝައުޤުވެރިކަން ހުންނަވާ އާތިފް މިއުޒިކްގެ ދާއިރާއަށް އުފަންވެގެންދިޔައީ އައިލީ ހުނަރެއްގެ ސަބަބުން ކަމަށް ޤަބޫލުކުރެވެއެވެ. ސަބަބަކީ އޮލިންޕިއަންސްގެ ލަވަ މުބާރާތުގައި އާތިފްގެ މަންމާފުޅު "ބޮޑުގަލު ނަސީމާ" އެއްވަނަ ޙާސިލް ކޮށްފައިވާތީއެވެ.

ސިފައިންގެ "ކޮޕްސް ބޭންޑާއި އާތިފް ގުޅިވަޑައިގެންނެވީ 1998 ވަނަ އަހަރުގައެވެ. އާތިފް އެންމެ ފުރަތަމަ ކިޔުއްވާފައިވާ ލަވަޔަކީ ހިންދީ ލަވައެއް ކަމަށްވާ "ޕާޕާ ކެހެތޭހޭ" ލަވައެވެ. އާތިފް އެންމެ ފުރަތަމަ ރެކޯޑް ކުރެއްވި ލަވަޔަކީ "ދިވެހި ޤައުމީ ޒުވާނުން" މި ލަވައެވެ. އާންމުގެ ތެރޭގައި މި ލަވަ  ވަނީ ވަރަށް މަޝްހޫރު ވެގެން ގޮސްފައެވެ.

ކޮޕްސް ބޭންޑާއި ގުޅިވަޑައިގެންނެވުމުގެ ކުރިން އާތިފްވަނީ ރައްޓެހިކުދިން ކޮޅަކާއިއެކު މިއުޒިކް ބޭންޑެއް ވެސް އުފައްދަވާފައެވެ. އާތިފްއާއެއްކޮށް ކޮޕްސް ބޭންޑުގައި ހަރަކާތްތެރިވި މީހުންގެ ތެރޭގައި އާތިފްގެ އެންމެ ގާތް އެކުވެރިއެއް ކަމަށްވާ އިކްރާމް ބުނީ އާތިފްއަކީ ވަރަށް ގާތް ރައްޓެއްސެއް ކަމަށާއި ކޮންމެ ފަދަ އެހީއަކަށް އެދުނު ކަމުގައި ވިޔަސް އާތިފް އެކަމެއް ކޮށްދެއްވާނެ ކަމަށެވެ. އާތިފްއަކީ މިޔުޒިކީ ދާއިރާއަށް އުފަންވި ތަފާތު މޮޅު ހުނަރުވެރި ފަންނާނެއް ކަމަށް ވެސް އިކްރާމް ވިދާޅުވިއެވެ.

އާތިފްވަނީ ޤައުމީ ދުވަހާއި ދިމާކޮށް ޤައުމީ ލަވަ ސީޑީތައް އުފައްދަވާފައެވެ.

އާތިފް ކިޔުއްވާފައިވާ  ފާހަގަކޮށްލެވޭ ބައެއް ލަވަތަކުގެ ތެރޭގައި "ޖޯޝޭގެނައިމީ ޤައުމީ އުފާ" އާއި "ދޭނަން ހިތާ ޖާނާ" އާއި "ވާށޭ މަށާ އެހީ" އާއި "މަސްތުވެއްޖޭ ފެނިފާ މިތުރާ" ހިމެނެއެވެ.

މިއަދު އެކުޅަދާނަ ލަވަކިޔުންތެރިޔާ، ގައުމީ ޚިދުމަތް ތެރިޔާ ، އަޅުގަނޑުމެންނާ އަބަދަށް ވަކިވެ ހިނގައްޖެއެވެ. އޭނާގެ ހަށިގަނޑު ފަސްއަޅާ ފޮރުވިގެން ދިޔަސް  އޭނާގެ ޚިދުމަތުގެ އަހުލާގާއި، އުފެއްދުންތެރިކަމުގެ ހިޔާލުން ގައުމަށް ކޮށްފައިވާ ފައިދާގެ ހަނދާންތަކަށް ފަސްއަޅާ ފޮރުވިގެން ނުދާނެކަން އަޅުގަނޑުމެންނަށް ޔަގީނެވެ.

ޙިދުމަތެއް ކޮށްދީފަ ދިޔައިރު، ތިޔަ ހަނދާނެއް ނުފިލަޔޭ 

ގުދުރަތުގެ ފުރިހަމަ ނިޒާމަށް އުނިކަމެއް ހަމަ ނާދެޔޭ