ރަޝިޔާ އިން ބުދަ ދުވަހުގެ ފަތިހު ޔުކްރެއިންގެ ވެރިރަށް ކީވް އަށް ޑްރޯން ހަމަލާއެއް ދީފިއެވެ.
މި ހަމަލާގައި އެކަކު މަރުވެ، 6 މީހުން ޒަޚަމްވެ، އަދި ދެ ސަރަޙައްދެއްގެ އިމާރާތްތަކަށް ގެއްލުން ލިބުނު ކަމަށް އެ ސިޓީގެ އޮފިޝަލުން ބުނެފައިވެއެވެ.
ޔުކްރެއިންގެ އެއަރ ފޯސްއިން ވެރިރަށާ ދިމާއަށް ޑްރޯންތަކެއް އަންނަ ކަމަށް އިންޒާރު ދިނުމާއެކު، އަދި މޭޔަރު ވިޓަލީ ކްލިޗްކޯ ދުޝްމަނުންގެ ހަމަލާއަކުން ދިފާޢުވަމުންދާ ކަމަށް ބުނުމާއެކު، ބުދަ ދުވަހު ހެނދުނު ވެރިރަށުގެ އުޑުމަތިން ބާރު ގޮވުންތަކުގެ އަޑުފައްގަނޑު ގަދަވެގެން ދިޔަ ކަމަށް ރިޕޯޓުތައް ބުނެއެވެ.
މި ހަމަލާގައި އާންމުން ދިރިއުޅޭ އިމާރާތެއްގެ ދެ ފަންގިފިލާ ބައެއް ހަލާކުވެފައިވާ ކަމަށް ކްލިޗްކޯ ވިދާޅުވިއެވެ. ފަހުން އެ ސިޓީގެ މިލިޓަރީ އެޑްމިނިސްޓްރޭޝަނުން ބުނެފައިވަނީ އަންހެނެއްގެ ހަށިގަނޑު ހަލާކުވި އިމާރާތުގެ ބައިތަކުގެ ތެރެއިން ނެގިފައިވާ ކަމަށެވެ.
ސްޓޭޓް އެމަޖެންސީ ސަރވިސްއިން ޕޯސްޓްކޮށްފައިވާ ފޮޓޯތަކުގައި ފެންނަނީ ފަޔަރ ފައިޓަރުން އިމާރާތެއްގެ ހަލާކުވެފައިވާ ބަޔަށް ފެންޖަހަމުންދާ މަންޒަރާއި، ސަލާމަތްކުރާ މީހުން އުމުރުން ދުވަސްވީ މީހުންނަށް އެހީތެރިވަމުންދާ މަންޒަރެވެ.
ނޭޝަނަލް ބޭންކް އޮފް ޔުކްރެއިނުން ނެރުނު ބަޔާނެއްގައި ބުނެފައިވަނީ އެ ބޭންކުގެ އިމާރާތަކަށް ވައްޓާލެވުނު ޑްރޯނެއްގެ ބައިތަކުން ގެއްލުން ލިބިފައިވާ ކަމަށެވެ. އަދި އެހެން ހިސާބެއްގައި ހުރި އިމާރާތަކަށްވެސް ޑްރޯނުގެ ބައިތަކުން ގެއްލުން ލިބިފައިވާ ކަމަށް ކީވް ގެ މޭޔަރު ވިދާޅުވެފައިވެއެވެ.
މި ހަމަލާއާ ގުޅިގެން ރައީސް ވޮލޮޑިމިއަރ ޒެލެންސްކީ ސޯޝަލް މީޑިއާގައި ވިދާޅުވެފައިވަނީ "އައު އަހަރުގެ ރޭގައިވެސް ރަޝިޔާގެ ހަމައެކަނި ވިސްނި ކަމަކީ ޔުކްރެއިނަށް ގެއްލުން ދިނުމުގެ ގޮތްތައް ހޯދުން" ކަމަށެވެ.
ކީވްގެ އަސްކަރިއްޔާ އިން ބުނެފައިވަނީ ރަޝިޔާއިން ބުދަ ވިލޭރޭ ޔުކްރެއިންގެ އެކި ސަރަޙައްދުތަކަށް ފޮނުވާލި 111 ޑްރޯނުގެ ތެރެއިން 63 ޑްރޯން ވައްޓާލެވިފައިވާ ކަމަށެވެ.
