ރާއްޖޭގެ ހުރިހާ ކުންފުނިތަކަކުން މި ހިނގާ ހުރިހާ ވައްކަންތަކަކަކީ ވެސް ރައީސް ޑރ. މުޙައްމަދު މުއިއްޒުގެ ފުރިހަމަ ބައިވެރިވުމާއި އެކު ކުރެވެމުންދާ ވައްކަންތަކެއް ކަމަށް ދިއްދޫ ދާއިރާގެ ކުރީގެ މަޖިލިސް މެމްބަރު އަބްދުﷲ ވަހީދު ވިދާޅުވެއްޖެއެވެ.
ރާއްޖެ ޓީވީން ގެނެެސްދިން "2024 ކުރުކޮށް" ޕްރޮގްރާމުގައި ވާހަކަ ދައްކަވަމުން އަބްދުﷲ ވަހީދު ވިދާޅުވީ ޕީޕީއެމްގެ ކުރީ ސަރުކާރުވެސް ވެއްޓެއް ދިމާވި އެންމެ ބޮޑު އެއް ސަބަބަކީ އޭރު ހިނގާދިޔަ އެންމެ ބޮޑު ވައްކަން، އެމްއެމްޕީއާރުސީގެ 3 ބިލިއަނަށް ވުރެ ގިނަ ރުފިޔާގެ ވައްކަމުގެ ސަސަބުން ކަމަށެވެ. އަދި މިހާރު މިއޮތް ސަރުކާރުވެސް ވެރިކަމަށް އައީ އޭރު އެމްއެމްޕީއާރުސީގައި ހިނގާ ދިޔަ ބޮޑު ވައްކަމުގެ މައްސަލަ ބަލައި އެފަދަ ކަންކަން އިތުރަށް ތަކުރާރު ނުވާނޭ ގޮތަކަށް ކަންކަން ބައްޓަންކުރުމަށް ކަމަށް ވަހީދު ވިދާޅުވިއެވެ.
ވަހީދު ވިދާޅުވީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމަށް ކުރި ކެމްޕޭނުގައި ވެސް އެންމެ ގިނައި ދެއްކެވި ވާހަކަފުޅަކީ ވައްކަމާއި ހިޔާނާތާއި ކަރަޕްޝަން މި ގައުމުން ނައްތާލާނެ ކަމުގެ ވާހަކަތައް ކަމަށާއި ނަމަވެސް ކަންކަތައް ވެގެން ދިޔައީ މުޅިން އިދިކޮޅަށް ކަމަށެވެ. ނަތީޖާއެއްގެ ގޮތުން މުޅި ގައުމު މިހާރު ވައްކަމުގެ ހާއްޔަކަށް ބަދަލުވެފައިވާ ކަމަށް ވެސް ވަހިދު ވިދާޅުވިއެވެ. އަދި މިހާރު ގައުމުގެ ހާލަތާއި މެދު ވިސްނާލާއިރު، ސިފަ ވެގެން ދަނީ މިހާރުގެ ރައީސް ޑރ. މުއިއްޒަށް ގައުމުގައި ވައްކަން ވަރިހަމަވެފައިވާ ކަހަލަ ގޮތަކަށްކަމަށް ވެސް އޭނާ ވިދާޅުވިއެވެ.
ވަހީދު ވިދާޅުވީ ސަރުކާރުގެ އެއްވެސް މުއައްސަސާއަކަށް ،އަދި އެތަން ތަނުގެ އެމްޑީންނަކަށް ވެރިމީހާގެ ބައިވެރިވުމެއް ނެތި މިހާރު ރާއްޖޭގައި ހިނގަމުން މިދާ ބޮޑެތި ވައްކަމުގައި ބައިވެރިވާން ނުކެރޭނެ ކަމަށާއި މިހާރު ހިނގަމުން މިދާ ބޮޑެތި ހުރިހާ ވައްކަމެއްވެސް ހިނގަމުން ދަނީ ރައީސްއަށް ވަރަށް ރަނގަޅަށް އެގިހުންނަވާ، އެމަނިކުފާނުގެ ފަހުބަހާއި އެކުގައިކަމަށެވެ. އަދި އެގޮތުގެ މަތިން ހުރިހާ ކުންފުނިތަކަކުން ވެސް ވައްކަން ކުރަމުން ގެންދާކަމަށް ވަހީދު ވަނީ ވިދާޅުވެފައެވެ.
އަޅުގަނޑުމެންނަށް ފެނިގެން ދިޔައީ ކުރީގެ ޕީޕީއެމްގެ ވެރިކަމުގަ، އެމްއެމްޕީއާރުސީގެ 3 ބިލއަނަށް ވުރެ ގިނަ ރުފިޔާގެ ބޮޑު ވައްކަމެއް. އެ ބޭފުޅުންގެ ސަރުކާރުވެސް ވެއްޓެއް ދިމާވި އެންމެ ބޮޑު އެއްސަބަބުކަމަށް ވީ އެ ވައްކަން. އަޅުގަނޑުމެން ގަބޫލުކުރީ އޭރު އެކަން ހިނގަން ދިމާވި ސަބަބުތަކާއި ހުރެ، މި އައި ސަރުކާރުން އެ ކަންކަން ތަކުރާރު ނުވާނެ ގޮތަކަށް ވެރިކަމުގެ ކަންކަން ބައްޓަން ކުރާނެކަމަށް. ކެމްޕޭނުތެރޭގައި އެބޭފުޅުން ވައުދުވަމުންވެސް ދިޔައީ އެކަންކަން ރަނގަޅަށް ކުރިޔަސް ގެންދާނޭކަމަށް. އެހެ ންކަމުން އަޅުގަނޑު ހައިރާންވެ، އޖައިބުވާ ކަމަކަށް މި ދިމާވީ ވައްކަމުގެ ހާއްޔެއްގެ ގޮތގައި ކުންފުނިތައް އެކަންޏެއް ނޫން، ދިވެހިރާއްޖެ ވެސް ބަދަލުވެގެން މިދަނީ ވައްކަމުގެ ހާއްޔަކަށް.އަބްދުﷲ ވަހީދު
އަބްދުﷲ ވަހީދު އިތުރަށް ވިދާޅުވީ ރާއްޖޭގައި ބޮޑެތި ވައްކަންތައް އާންމުވެ، ގައުމުގެ ހާލަތު ގޯސްވެ، ރައްޔިތުން ކަންބޮޑުވާ ދަރަޖައަށް ގައުމުގެ ހާލަތަުވެއްޓިފައިވާ ކަމަށާއި އަދި ރައްޔިތުން ދަތިހާލުގައި ތިބި މި ދަނޑިވަޅުގައި އެންސްޕާއިން 34.8 މިލިއަން ރުފިޔާގެ މުއާމަލާތެއް ހިނގާފައިވާ ކަމަށެވެ. އަދި އެ މުއާމަލާތް ހިންގުމަށް ފަހު، ފައިސާ ދެއްވާފަ، ޖެހިގެން އައި ދުވަހު އަނބުރާ އެ ފައިސާ ދީފައިވާ ކަމަށް ބުނެފައިވާކަމަށެވެ.
ވަހީދު އިތުރަށް ވިދާޅުވީ އެންސްޕާގެ ފައިސާ އަކީ ދިވެހި ރައްޔިތުންގެ ފައިސާ ކަމަށާއި އެ ފައިސާއިން ވައްކަން ކޮށް އެފައިސާއަށް ހިޔާނާތްތެރި ވެފައިވާ މީޙުންނާއި މެދު ވަގުތުން ފިޔަވަޅު އަޅުއްވަން ޖެހޭނޭ ކަމަށެވެ. އަދި ވައްކަންތައް ފަޅާއަރައި ސަލާމަތް ނުވެވޭ ހިސާބުން ކޮންމެ ބޭފުޅަކު މަގާމުން އިސްތިއުފާދެއްވާ ކަމަށާއި ނަމަވެސް އެއީ ހައްލެއް ނޫންކަމަށެވެ. އަދި އެފަދަ ބޭފުޅުންނާއި މެދު ފިޔަވަޅު އަޅުއްވަން ޖެހޭނޭކަމަށް ހަވީދު ވިދާޅުވިއެވެ.
ވަހީދު ވިދާޅުވީ މިއީ ވައްކަމުގެ ސަރުކާރެއް ކަމަށާއި މި ސަރުކާރަށް އަހަރުވެގެން ދިޔަ އިރު ވައްކަމާއި ހިޔާނާތާއި ކަރަޕްޝަން ނޫން އެއްޗެއް ފެންނަން ނެތްކަމަށެވެ.
