2025 ވަނަ އަހަރު ވެގެންދާނީ އިސްލާމީ ކަންތައްތަކާ ބެހޭ ވުޒާރާއިން މުހިއްމު މަސައްކަތްތަކެއް ކުރައްވާނެ އަހަރަކަށް ކަމަށާއި، އެގޮތުން އަންނަ އަހަރު ވަޤުފް އިމާރާތްތައް އާރާސްތުކޮށް ރާއްޖޭގައި ޒަކާތު ހައުސްގެ އިމާރާތެއް އެޅުމުގެ މަސައްކަތް ފަށާނެ ކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.

މިނިސްޓަރ ޝަހީމް މިފަދައިން ވިދާޅުވީ 2025 ވަނަ އަހަރު އެ މިނިސްޓްރީން ކުރިއަށްގެންދާ ބައެއް ކަންތައްތައް އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ. މިގޮތުން މި ރަސްމިއްޔާތުގައި ވަނީ 2025 ވަނަ އަހަރުގެ އެކްޝަން ޕްލޭނާއި، ރިސާލަތު ޕްރޮގްރާމް 2025 އަދި ނަމާދު މަތިވެރިކުރުމުގެ ޕްރޮގްރާމް އިފްތިތާޙްކޮށްފައެވެ.

މި ރަސްމިއްޔާތުގައި ވާހަކަދައްކަވަމުން އިސްލާމިކް މިނިސްޓަރ ޑރ. މުޙައްމަދު ޝަޙީމް އަލީ ސަޢީދު ވިދާޅުވީ 2025 ވަނަ އަހަރު ވާނީ އިސްލާމީ ކަންތައްތަކާ ބެހޭ ވުޒާރާއިން މުހިއްމު މަސައްކަތްތަކެއް ކުރައްވާނެ އަހަރެއް ކަމަށާއި އެގޮތުން އަންނަ އަހަރު ވަޤުފް އިމާރާތްތައް އާރާސްތުކޮށް ރާއްޖޭގައި ޒަކާތު ހައުސްގެ އިމާރާތެއް އެޅުމުގެ މަސައްކަތް ފަށާނެ އަހަރަކަށް ވާނެކަމަށެވެ. އަދި އައު ގިނަ ކަންތައްތަކެއް ފަށާނެ އަހަރަކަށް އަންނަ އަހަރު ވާނެކަމަށެވެ. މީގެ އިތުރުން އަންނަ އަހަރު ކުރިއަށްގެންދިޔުމަށް އެކުލަވާލާފައިވާ ކަންކަމަކީ ވަރަށް މުހިއްމު މަސައްކަތްތަކުގެ ތެރެއިން ކުރިއަށް ގެންދާނެ މަޝްރޫޢުތަކެއް ކަމަށް މިނިސްޓަރ ވިދާޅުވިއެވެ.

މިގޮތުން އަންނަ އަހަރު ފެށުމަށް ހަމަޖެހިފައިވާ "ނަމާދު" މަޝްރޫޢުއަށް އަލިއަޅުވާލައްވަމުން މިނިސްޓަރ ވިދާޅުވީ މިފަދަ މަޝްރޫޢުއެއް ކުރިއަށްގެންދިޔުމުގެ ބޭނުންމަކީ ރައްޔިތުންނަށް ނަމާދު ކުރުމުގެ މުހިއްމުކަން އަންގައިދީ އެކަން ހަނދާންކޮށްދިނުން ކަމަށާއި މި މަޝްރޫއުގެ ދަށުން އެކި ޕްރޮގްރާމްތައް ގެނެސްދިނުމާއި ގެތަކަށް އިލްމުވެރިން ޒިޔާރަތްކޮށް ހޭލުންތެރިކުރުވުން ހިމެނޭކަމަށެވެ.

އަންނަ އަހަރު ކުރިއަށްގެންދިޔުމަށް ނިންމާފައިވާ ރިސާލާތު ޕްރޮގްރާމްއާ ގުޅޭގޮތުން މިނިސްޓަރ ވިދާޅުވީ 2024 ވަނަ އަހަރު އެ ޕްރޮގްރާމް "އިސްލާމް ދީނުގެ އަޤީދާ"ގެ މައްޗަށް ކުރިއަށް ގެންދިޔަ ނަމަވެސް މިފަހަރުގެ ޕްރޮގްރާމް ކުރިއަށް ގެންދާނީ އައު މަޢުލޫމާތުތައް ހިމަނައިގެންކަމަށެވެ. އެގޮތުން މިފަހަރުގެ ރިސާލާތު ޕްރޮގްރާމް ކަނޑައަޅާފައިވަނީ އިސްލާމީ އަޚްލާގު ރާއްޖޭގައި ފެތުރުމުގެ މައްޗަށްކަމަށް ވަޒީރު ފާހަގަކުރެއްވިއެވެ. އަދި މި ޕްރޮގްރާމް ފަރުމާކޮށްފައިވަނީ އިސްލާމްދީނުގެ އެންމެ މަތިވެރި 5 މަޤްޞަދުގެ އަލީގަކަންވެސް މިނިސްޓަރ ފާހަގަކުރެއްވިއެވެ.

މިނިސްޓަރ ވަނީ 2025 ވަނަ އަހަރަށް ޚާއްސަކޮށްގެން އެ ވުޒާރާއިން ކުރިއަށްގެންދާނެ ކަންތައްތައް ހިމެނޭ އެކްޝަން ޕްލޭންގައި މުހިއްމު ކަންތައްތަކެއް ހުރިކަން ފާހަގަކުރައްވާފައެވެ.

މި ރަސްމިއްޔާތުގައި ރިސާލަތު ވީޑިއޯ ޗެލެންޖުގައި ބައިވެރިވި 281 މީހުންގެތެރެއިން ދިވެހި އަދި އިނގިރޭސި ކެޓަގަރީން ވަނަވަނައަށް ހޮވުނު ފަރާތްތައް އިއުލާންކޮށް އިނާމު ދީފައިވެއެވެ.

ރައީސް ޑރ. މުޙައްމަދު މުޢިއްޒުގެ ސިޔާސަތުތަކުގެ ތެރެއިން، އިސްލާމީ ނޫރު ފަތުރާ، ދީނަށް ލޯބިކުރާ މުޖުތުމަޢުއެއް އުފެއްދުމުގެ މަޤުސަދުގައި އިސްލާމިކް މިނިސްޓްރީން ފަށާފައިވާ ރިސާލަތު ޕްރޮގުރާމަކީ އެންމެ އިސްކަމެއް ދީގެން މިއަހަރުގެތެރޭގައި ކުރިއަށް ގެންދިޔަ އެއް ޕްރޮގްރާމެވެ.