ރާއްޖޭއިން މިއަހަރުގެ ޑިސެންބަރު މަހު 6000ށް ވުރެ ގިނަ މީހުން އުމްރާގެ އަޅުކަން އަދާކުރަން ގޮސްފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

އާދިއްތަ ދުވަހު މިނިސްޓަރު ޝަހީމް ވިދާޅުވީ މި ޑިސެންބަރު މަހު ރާއްޖެއިން އުމްރާއަށް ދިޔަ ހުރިހާ އެންމެންގެ ހާލު ރަނގަޅު ކަމަށެވެ. އަދި މިފަހަރު އެކި ކުންފުނިތަކުގެ ހަވާލުގައި 6373 ވުރެ ގިނަ މީހުން އުމްރާގެ އަޅުކަން އަދާކުރަން މައްކާއަށް ގޮސްފައިވާ ކަމަށް މިނިސްޓަރު ޝަހީމް ވިދާޅުވިއެވެ.

ކޮވިޑް-19އަށްފަހު، ރާއްޖެއިން އުމްރާގެ އަޅުކަމަށް ދާ މީހުންގެ އަދަދު އެއްއަހަރުން އަނެއް އަހަރަށް ދަނީ އިތުރުވަމުންނެވެ. އެގޮތުން މިއަހަރު ވެސް ގިނަ ބަޔަކު އުމްރާގެ އަޅުކަމަށް ގޮސްފައިވެއެވެ.

މީގެ އިތުރުން އުމްރާއަށް މީހުން ގެންދިއުމަށް ކުންފުނިތައް ހަދައިގެން މަސައްކަތްތައް ކުރިއަށް ގެންދާއިރު، އުމްރާއަށް މީހުން ގެންދިޔުމުގެ އުސޫލާ ޚިލާފުވާ މައްސަލަތައް ވެސް ފެންމަތިވަމުންދެއެވެ. ގިނަ އަދަދެއްގެ ފައިސާ ނެގުމަށްފަހު، ވިސާ ހަމަނުޖެހުމާއި، މައްކާއަށް ދިއުމަށްފަހު ހޮޓެލް ހަމަނުޖެހި އުމްރާވެރިން ހާލުގައި ޖެހޭ ހާލަތްތައް މެދުވެރިވެފައިވެއެވެ. އަދި މި ޑިސެންބަރު މަހު ވެސް އަލް ހިޖުރަ ޓްރެވަލް އެންޑް ޓުއަރސް އިން އުމްރާގެ އަޅުކަމަށް ދިޔުމަށް ފައިސާ ދައްކާފައިވާ ބަޔަކަށް ނުުފުރުނު މައްސަލައެއް ވަނީ ފެންމަތިވެފައެވެ. އަލް ހިޖުރަ ގްރޫޕްގެ މީހުން އުމްރާއަށް ދިޔުމަށް އެންމެ ފުރަތަމަ ދިން ތާރީޚަކީ ޑިސެމްބަރު މަހުގެ 19 ވަނަ ދުވަސް ނަމަވެސް ވިސާ ހަމަނުޖެހޭ ކަމަށް ބުނެ، ތާރީހުތައް ވަނީ ފަސްކޮށްފައެވެ. މިމައްސަލަ އިސްލާމިކް މިނިސްޓްރީން ދަނީ ބަލަމުންނެވެ.

މިފަދަ ގިނަ މައްސަލަތައް ފެންމަތިވަމުންދާތީ، ހައްލު ގެނައުމުގެ ގޮތުން އިސްލާމިކް މިނިސްޓްރީން ވަނީ މިއަހަރުގެ އޮކްޓޫބަރު މަހުގެ ތެރޭގައި ދިވެހިރާއްޖެއިން މީހުން ގެންދާ ޖަމާއަތަކުން، އުމްރާއަށް ގެންދިއުމާއި ގުޅޭ އުސޫލާއި އެއްބަސްވުމާއި ޚިލާފުވެއްޖެނަމަ ބޮޑު އަދަދަކުން ޖުރިމަނާ ކުރެވޭ ގޮތަށް، ރާއްޖެއިން މީހުން އުމްރާއަށް ގެންދިއުމާއި ބެހޭ އުސޫލެއް ހަދާ ގެޒެޓްކޮށްފައެވެ.

އުސޫލުގައިވާ ގޮތުން ހުއްދަ ނެގުމަކާއިނުލާ އުމްރާއަށް ގެންދާ ފަރާތްތައް 500،000 އާއި ހަމައަށް ޖުރިމަނާ ކުރެވޭނެއެވެ. މީގެ އިތުރުންވެސް އުސޫލާއި ޚިލާފުވާ ފަރާތްތަކަށް ޖުރިމަނާގެ ބޮޑެތި އަދަބުތަކެއް އުސޫލުގައި ވަނީ ހިމަނާފައެވެ. އެގޮތުން ވުޒާރާއާއި އުމްރާއަށް މީހުން ގެންދިއުމުގެ ހުއްދަ ދީފައިވާ ކުންފުންޏާމެދު ސޮއިކުރާ އެއްބަސްވުމާއި ކުންފުންޏަކުން ޚިލާފުވެއްޖެ ނަމަ، އެ މައްސަލައެއްގެ ކުޑަ ބޮޑު މިނަށްބަލާ  1،000 ރުފިޔާއާއި 100،000 ރުފިޔާއާ ދެމެދުގެ އަދަދަކުން އެ ކުންފުންޏެއް ޖޫރިމަނާކުރެވެއެވެ. އަދި އުމްރާއަށް މީހުން ގެންދިއުމުގެ ހުއްދަ ނެތި، އެ އުސޫލާ ހިލާފަށް އެއްވެސް ފަރާތަކުން އަމަލެއް ކޮށްފި ނަމަ، އެކަމެއްގެ ކުޑަބޮޑުމިނަށް ބަލައި، 100،000 ރުފިޔާއާއި 500،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.