ޣައްޒާގެ އުތުރުގައި ހުންނަ ކަމާލް އަދްވާން ހޮސްޕިޓަލް ކައިރީގައި ހުރި އިމާރާތަކަށް އިސްރާއީލުން ބޮން އެޅުމުގެ ސަބަބުން މަދުވެގެން 50 މީހުން ޝަހީދު ވެއްޖެއެވެ.

އެ ހޮސްޕިޓަލުގެ ޑިރެކްޓަރު ވިދާޅުވި ގޮތުގައި، މި ހަމަލާގައި ޝަހީދުވި މީހުންގެ ތެރޭގައި ހޮސްޕިޓަލުގެ 5 މުވައްޒަފުން ހިމެނެއެވެ.

އަނެއްކޮޅުން ފަލަސްތީނުގެ ނޫސް އެޖެންސީ ވަފާއިން ރިޕޯޓުކުރާ ގޮތުގައި، އިސްރާއީލުން ހުކުރު ވިލޭރޭ ޣައްޒާ ސިޓީ އަށާއި އެ ސިޓީގެ ދެކުނާއި އުތުރު ސަރަޙައްދުތަކުގައި ހުރި އާންމުން ދިރިއުޅޭ ދެ ގެއަކަށް އަމާޒުކޮށް ދިން ހަމަލާތަކުގައި މަދުވެގެން 15 މީހުން ޝަހީދުވެ އަދި އެތައް ބަޔަކު ޒަޚަމް ވެއްޖެއެވެ.

ވަފާ އިން ރިޕޯޓު ކުރި ގޮތުގައި ޝައިޚް ރަޟްވާން ސަރަޙައްދުގައި ހުރި ގެއަކަށް ވައިގެ ހަމަލާއެއް ދީފިއެވެ. ހަމަލާގައި އެ ގެ މުޅިން ކުދިކުދި ވެފައިވާ ކަމަށް ރިޕޯޓުތައް ބުނެއެވެ. ސަރަޙައްދުގެ މަޞްދަރުތަކުން ބުނާ ގޮތުގައި، މި ހަމަލާގައި އަންހެނުންނާއި ކުޑަކުދިން ހިމެނޭ ގޮތަށް މަދުވެގެން 13 މީހުން ޝަހީދުވެ، އަދި އެތައް ބަޔަކު ޒަޚަމްވިއެވެ.

މީހުން ސަލާމަތްކުރާ ޓީމުތަކުން އެ ސަރަޙައްދުގައި މަސައްކަތް ކުރަމުން ގެންދާއިރު، މަދުވެގެން އަދިވެސް ސާޅީހަކަށް މީހުން އިމާރާތުގެ ދަށުވެފައިވާނޭ ކަމަށް ބެލެވެއެވެ.

ޣައްޒާ ސިޓީގެ ދެކުނު ސަރަޙައްދުގައި ދެވުނު އަނެއް ވައިގެ ހަމަލާގައި، އިސްރާއީލުގެ ހަނގުރާމަމަތީ މަތިންދާބޯޓު ތަކުން އަލް-ސަބްރާ ސަރަޙައްދުގައި ހުރި ގެއަކަށް ބޮން އެޅުމުން ދެ މީހަކު ޝަހީދުވެ، 20 މީހުން ޒަޚަމްވިއެވެ. ހަލާކުވެފައިވާ އިމާރާތުގެ ދަށުގައި 7 މީހުން ތާށިވެފައި ތިބި ކަމަށް ބެލޭއިރު، މެޑިކަލް ޓީމުތަކުން ގެންދަނީ މީހުން ސަލާމަތް ކުރެވޭތޯ މަސައްކަތް ކުރަމުން ކަމަށް ވަފާ ނިއުސް އިން ބުނެފައިވެއެވެ.

އިސްރާއީލުގެ ސިފައިން އަލް-ޒައިތޫން ސަރަޙައްދުގައި އާންމުން ދިރިއުޅޭ ސަރަޙައްދުތަކަށް ބަޑިޖެހުން ކުރިއަށް ގެންދާއިރު، މަދަނީ އިމާރާތްތައް ގޮއްވާ ސުންނާފަތި ކުރަމުން ގެންދާ ކަމަށް ވެސް މީޑިއާ ރިޕޯޓުތައް ބުނެއެވެ.

ވަފާއިން ރިޕޯޓުކުރާ ގޮތުގައި، އިސްރާއީލުގެ ހަނގުރާމައިގެ ސަބަބުން ގެދޮރު ދޫކޮށް ނުކުމެފައިވާ އެތައް ސަތޭކަ ހާސް މީހުން ނިކަމެތި ހާލުގައި ޓެންޓުތަކުގައި ފިނިން ސަލާމަތްވުމަށް މަސައްކަތް ކުރަމުން ދާއިރު، ވޭތުވެދިޔަ 72 ގަޑިއިރުގެ ތެރޭގައި ގަދަ ފިނީގެ ސަބަބުން މަރުވި ކުޑަކުދިންގެ އަދަދު ހަތަރަކަށް ވަނީ އަރާފައެވެ.

2023 ވަނަ އަހަރުގެ އޮކްޓޯބަރު މަހުން ފެށިގެން ގާޒާއަށް އިސްރާއީލުން ދެމުންދާ އަނިޔާވެރި ހަމަލާތަކުގެ ސަބަބުން މިހާތަނަށް މަދުވެގެން 45,399 ފަލަސްތީނު މީހުން ޝަހީދުވެފައިވާ ކަމަށް ރެކޯޑުތަކުން ހާމަވެއެވެ. އަދި 107,940 އަށްވުރެ ގިނަ މީހުން ޒަޚަމްވެފައިވެއެވެ.