މި އަހަރުގެ އޮކްޓޯބަރު އަދި ނޮވެމްބަރު މަހު ރިސޯޓުތަކުން ބޭރު ފައިސާގެ މުއާމަލާތްތައް ހިންގި ގޮތުގެ ހުރިހާ ތަފްސީލެއް މޯލްޑިވްސް މަނިޓަރީ އޮތޯރިޓީ އަށް ފޮނުވުމަށް ކުއްލި ގޮތަކަށް ރިސޯޓުތަކަށް އަންގައިފިއެވެ.
އެމްއެމްއޭ އިން ބުދަ ދުވަހު ރިސޯޓު ތަކަށް ފޮނުވި އީމެއިލެއް ގައި ބުނެފައިވަނީ ފާއިތުވި ދެ މަހު ހިންގާފައިވާ ބޭރު ފައިސާގެ ހުރިހާ މުއާމަލާތްތަކުގެ ތަފްސީލް ޑިސެމްބަރު މަހުގެ 26 ވާ ބުރާސްފަތި ދުވަހުގެ ހަވީރު 4:00 ގެ ކުރިން ފޮނުވަން ޖެހޭނެ ކަމަށެވެ.
އެމްއެމްއޭ އިން ރިސޯޓުތަކަށް ވަރަށް ކުރު ނޯޓިސް އެއް ދިނުމަށް ފޮނުވި އީމޭއިލްގެ ކޮޕީ އެއް މި ނޫހަށް ލިބިފައިވާ އިރު އޭގައި ބުނެފައިވަނީ މައުލޫމާތު ފޮނުވަން ވާނީ އީމެއިލުން ކަމަށާއި އަދި އެ އޮތޯރިޓީން ފޮނުވާފައިވާ އެކްސެލް ޝީޓްގައި ވާ ފޯމެޓް އާ އެއް ގޮތްވާ ގޮތުގެ މަތިން ކަމުގައެވެ.
އެމްއެމްއޭ އިން ކުއްލި ކުއްލި އަށް ރިސޯޓުތަކަށް ވަރަށް ކުރު މުއްދަތެއް ދިނުމަށްފަހު ކަންކަން ކުރުމަށް އަންގަމުންދާއިރު ވަރަށް ގިނަ ރިސޯޓު އޮޕަރޭޓަރުން ތިބީ މިކަންކަން ކުރަމުންދާ ގޮތާ މެދު ވަރަށް ބޮޑަށް ހިތް ހަމަ ނުޖެހިފައި ކަމުގެ މައުލޫމާތު ދަނީ ލިބެމުންނެވެ.
ރާއްޖޭގައި ހިންގާ ރިސޯޓުތަކަކީ ބޮޑެތި ރިސްކު ނައިގައިގެން އަމިއްލަ ފަރާތްތަކުން ކޮށްފައިވާ ބޮޑެތި އިންވެސްޓްމަންޓް ތަކަށް ވެފައި ރިސޯޓްތައް އޮޕަރޭޓް ކުރަމުން ދަނީ މިނިސްޓްރީ އޮފް ޓޫރިޒަމް އާއި ރިސޯޓު ހިންގާ ފަރާތާ ދެމެދު ހަދާފައިވާ އެއްބަސްވުމެއްގެ ދަށުން ކަމަށް ވެފައި، އެ އެއްބަސްވުމަށް އެއްވެސް ބަދަލެއް ނުގެނެސް އޭގެ ބޭރުން އެމްއެމްއޭ އިން ރިސޯޓުތަކަށް އެކި ގޮތްގޮތުން ކަންކަން ކުރުމަށް ލާޒިމުކޮށް ރިސޯޓުތައް ހިންގުމަށް ބޮޑެތު ދަތިތަކެއް ކުރިމަތި ކުރަމުންދާ ކަމަށް މި ދާއިރާގެ ތަޖުރިބާކާރުން އަންނަނީ ބުނަމުންނެވެ.
ކުއްލި ކުއްލި އަށް ގާނޫނާއި ގަވައިދުތަކަށް ގެންނަ ބަދަލު ތަކުގެ ސަބަބުން ރާއްޖެ ވެގެން މިދަނީ އިންވެސްޓަރުންނަށް ދަތި އުނދަގޫ ތަނަކަށް ކަމަށް ވެސް ވިޔަފާރީގެ ތަޖުރިބާކާރުން އަންނަނީ ބުނަމުންނެވެ.
