މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ދެ ވަނަ ބުރުގެ ގުރޫޕު ސްޓޭޖުގެ ފަހު މެޗުގައި މާލޭ ސިޓީ ބަލިކޮށް، ގުރޫޕު އެޗުގެ އެއް ވަނައިގައި ކުއާޓާ ފައިނަލްގެ ޖާގަ ހޯދައިފި އެވެ.
ހޯމަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު އަލިފުށިން ކާމިޔާބު ކުރީ 3-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް މާލޭ ސިޓީންނެވެ. ނަމަވެސް އަލިފުށިން ވަނީ ފަހަތުން އަރައި ތިން ލަނޑު ޖަހައިގެން މެޗުން މޮޅުވެފަ އެވެ.
މެޗު ފަށައިގެން ދެ ވަނަ މިނެޓުގައި މާލޭ ސިޓީ އަށް ލީޑު ލިބުނީ އަލީ ޝަރީފު ބޮލުން ޖެހި ލަނޑުންނެވެ. ފުރަތަމަ ހާފު ނިމުމުގެ ކުރިން އަލިފުށިން ވަނީ މެޗުގެ ނަތީޖާ ހަމަހަމަ ކޮށްފަ އެވެ. ފުރަތަމަ ހާފުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް، އަލިފުއްޓަށް ލިބުނު ހިލޭ ޖެހުމެއްގައި ބޯޅަ ގޯލަށް ވައްދާލައިގެން އެ ޓީމަށް ނަތީޖާ ހަމަހަމަ ކޮށްދިނީ މުޙައްމަދު ރަޝީދު (ހޮކޭ) އެވެ.
މެޗުގެ ދެ ވަނަ ހާފު ފަށައިގެން 12 ވަނަ މިނެޓުގައި އަލިފުއްޓަށް ލީޑު ނަގައިދިނީ އިބްރާހީމް ސަލާމް އެވެ. އޭގެ އިރުކޮޅެއް ފަހުން އަޙުމަދު ހުޝާމް ވަނީ އަލިފުށީގެ ތިން ވަނަ ލަނޑު ޖަހައި އެ ޓީމުގެ ލީޑު ފުޅާ ކޮށްފަ އެވެ.
މޮޅާއެކު އަލިފުއްޓަށް ގުރޫޕުގެ އެއް ވަނަ ލިބުނީ ކުޅުނު ދެ މެޗުން ވެސް މޮޅުވެ، ހަ ޕޮއިންޓާ އެކު އެވެ. ދެ ވަނައިގައި މާލޭ ސިޓީ ކުއާޓާ ފައިނަަލަށް ދިޔައީ ތިން ޕޮއިންޓާ އެކު އެވެ.
