ވިނަރެސް ޓަވަރުތަކުން ކާރު ޕާކު ކުރުމަށް ޖާގަ ގަތުމަށް ހުޅުވާލީ އިންތިހާއަށް އަގުބޮޑުކޮށް ކަމަށް ބުނެ ގިނަ ބަޔަކު ނުރުހުން ފާޅުކުރަން ފަށައިފިއެވެ.
ވިނަރެސްއިން އެޕާޓްމަންޓް ގަނެފައިވާ މީހުން ބުނީ، ޕާކިންގ ވިއްކުމަށް ހުޅުވާލާފައިވަނީ ރައްޔިތު މީހާ ފެލާ އުސޫލުން ކަމަށާއި، މިއުސޫލު ބަދަލުކުރަން ޖެހޭ ކަަމަށެވެ.
ޕާކިންގ ރަޖިސްޓްރީ ކުރުމުގެ ހުއްދަ ލިބެނީ ހަމައެކަނި ގަތުމުން ކަމަށް ހަމަޖައްސާފައި އޮތުމަކީ ގަރާޖު ސިޓީއަށް ކޮށާފައިވާ މަގެއް ކަމަށް އެމީހުން ބުނެއެވެ.
މީގެ އިތުރުން ފްލެޓު ގަނެފައިވާ މީހުންނަށް ވެސް، ޕާކިންގ ސްލޮޓު ގަތުމަށްފަހު 30 ދުވަހުގެ ތެރޭގައި ފައިސާ ދައްކަންޖެހޭ އުސޫލު ވެސް ހަމަނުޖެހޭ ކަމަށާއި، 650،000 ރުފިޔާ 30 ދުވަހުގެ ތެރޭގައި ދެއްކުމަކީ ވަރަށް އުދަނގޫ ތަކުލީފު ބޮޑު ކަމެއް ކަމަށެވެ. އަދި 25 އަހަރަށް ބަހާލައިގެން ފައިސާ ދެއްކި ނަމަވެސް އެއީ ވަަރަށް ބޮޑު އަދަދެއް ކަމަށް އެމީހުން ބުނެއެވެ.
ނުރުހުން ފާޅުކުރި ބައެއް މީހުން ބުނެފައިވަނީ ވިނަރެސް ފްލެޓުން އެޕާޓްމަންޓް ގަތް މީހުންނަށް ޕާކިންގ ކަށަވަރުވާނެ ކަމަށް އެޗްޑީސީން މީގެ ކުރިން ބުނެފައިވާ ކަމަށާއި، ވިނަރެސްއިން އެޕާޓްމަންޓްތައް ވިއްކާފައިވަނީ އެއުސޫލުން ކަމަށެވެ. ނަމަވެސް ޕާކިންގ ނުގަނެވޭވަރުގެ ބޮޑު އަގުގައި ހުޅުވާލުމުން މިއީ ވަކި ބަޔަކަށް ޖާގަ ދިނުމުގެ ގޮތުން އެޗްޑީސީން ކޮށްފައިވާ ކަމެއް ކަމަށް އެމީހުން ބުނެއެވެ. އަދި މިފަހަރު ވިނަރެސްއިން ޕާކިންގ ސްލޮޓް ވިއްކައިގެން އެޗްޑީސީގެ ބަޔަކު މުއްސަންދި ވާނެކަމަށް ތުހުމަތުކޮށްފައިވާއިރު، މިހާރު ވެސް ބައެއް ސްލޮޓްތައް ބައެއް ބޭފުޅުންނަށް ކަށަވަރުވެފައިވާ ކަމަށް ތުހުމަތު ކޮށްފައިވެއެވެ.
މިއުސޫލުން ޕާކިންގ ޖާގަ ދޫކުރުން ހުއްޓުވަންޖެހޭކަން ފާހަގަކޮށް އެމީހުން ވަނީ މިކަމާއި ދެކޮޅަށް ޕެޓިޝަނެއް ހަދައި، ރައީސް އޮފީހަށް ދިއުމާ ގުޅޭގޮތުން މަޝްވަރާ ކުރަމުންދަ ކަމަށް ބުނެފައެވެ.
ހޯމަ ދުވަހު އެޗްޑީސީން ބުނީ ވިނަރެސް މަޝްރޫއިން ފްލެޓު ގަނެފައިވާ ފަރާތްތަކަށް މި އިމާރާތްތަކުން ކާރު ޕާކުކުރާނެ ޖާގަ ދޫކުރުމަށް ނިންމާފައިވާ ކަމަށެވެ. އަދި ޕާކިންގ ޖާގަ ދޫކުރުމަށް ހަމަޖެހިފައިވަނީ 2 މޮޑެލްގެ ދަށުންނެވެ. އެގޮތުން އިމާރާތުގެ ތެރެއިން ކާރު ރަޖިސްޓްރީކުރުމުގެ ހުއްދައާއިއެކު ޖުމްލަ 76 ޖާގައާއި އިމާރާތުގެ ބޭރުން ހަމައެކަނި ޕާރކުރުމުގެ ބޭނުމަށް ޖުމްލަ 78 ޕާރކިން ޖާގަ ދޫކުރުމަށް ވަނީ ނިންމާފައެވެ.
ޕާކިންގ ޖާގައަށް އެދި ހުށަހެޅުމުގެ ޝަރުތުތަކަކީ،
- ވިނަރެސް މަޝްރޫއުއިން ފުލެޓު ގަތުމުގެ އެއްބަސްވުމުގައި ސޮއިކޮށްފައިވާ މައި-އެޕްލިކަންޓެއް ކަމުގައިވުން
- މިކޯޕަރޭޝަނަކަށް 5 ޑިސެންބަރު 2024 ނިޔަލަށް އެއްވެސް ފައިސާއެއް ދައްކަންޖެހި އެ ފައިސާ ނުދައްކައިވާ ފަރާތެއްކަމުގައި ނުވުން. (މީގެ ތެރޭގައި ފޯމު ހުށަހަޅާ ފަރާތުގެ ނަަންމަތީ އެޗްޑީސީއިން ބަލަހައްޓަމުންދާ އެއްވެސް ތަނަކުން ގަނެފައިވާ ނުވަތަ ކުއްޔަށް ނަގާފައިވާ ތަންތަން. އަދި މި މުއްދަތުގެ ތެރޭގައި ޑިސެންބަރު މަހުގެ ކުލި ހިމެނޭނެ)
- ކޮންމެ ފަރާތަކަށް ވެސް ދޫކުރެވޭނީ 1 ޕާކިން ޖާގަ
- ދޫކުރެވޭ ޕާކިން ޖާގައަކީ ފުލެޓު ގަތުމުގެ އެއްބަސްވުމުގެ ދަށުން ދޫކުރެވޭ ޖާގައެއްގެ ގޮތުގައި ހަމަޖެއްސޭނެ
- ޕާކިން ޖާގަ ދޫކުރުމަށް ހަމަޖެހިފައިވާ މޮޑެލްގެ ތަފްސީލު
- އިމާރާތުގެ ތެރެއިން ބީލަމުގެ އުސޫލުން ޕާކިންގ ޖާގަ ވިއްކުމާއި ގުޅޭ ތަފްސީލް
- ބީލަން ފެށޭ އަގު ހަލަައްކަ ފަންސާސް ހާސް ރުފިޔާ
- ޕާކިންގ ޖާގަ ގަންނަ ފަރާތްތަކަށް މި ޖާގައިގައި ކާރު ރަޖިސްޓްރީ ކުރުމުގެ ހުއްދަ ދޫކުރެވޭނެ
- ބީލަން ކާމިޔާބުކުރާ ފަރާތްތަކުން ޕާކިންގ ޖާގައިގެ ޖުމްލަ އަގު ދެއްކުމަށް 30 ދުވަހުގެ މުއްދަތު ދެވޭނެއެވެ.
އިމާރާތުގެ ބޭރުން ބީލަމުގެ އުސޫލުން ޕާކިން ޖާގަ ކުއްޔަށް ދޫކުރުން
- ބީލަން ފެށޭ އަގު ( މަހު ކުލި) 2000 ރުފިޔާ.
- ޕާކިންގ ޖާގަ ކުއްޔަށް ދޫކުރެވޭނީ 5 އަހަރު ދުވަހުގެ މުއްދަތަށް.
- ސެކިއުރިޓީ ޑިޕޮސިޓް: މަހު ކުލީގެ ގޮތުގައި ހުށަހަޅާފައިވާ އަދަދަށްވާ ތިން މަހަށްވާ ފައިސާ ދެއްކުމަށް 7 ދުވަހުގެ މުއްދަތެއް ދެވޭނެ.
- ޕާކިން ޖާގަ ދޫކުރެވޭނީ ހަމައެކަނި ޕާކު ކުރުމުގެ ބޭނުމަށް. އަދި މި ޖާގަތަކުގައި ކާރު ރެޖިސްޓްރީ ކުރުމުގެ ހުއްދަ ނުދެވޭނެ.
އެޗްޑީސީން ބުނީ ޝައުގުވެރިވެރިވާ ފަރާތްތަކުން ބީލަމުގެ އުސޫލުން ކާރު ޕާކިންގ ޖާގަ ގަތުމަށް ނުވަތަ ކުއްޔަށް ހިފުމަށް އެދި ހުށަހެޅުމަށް ހަމަޖެހިފައިވަނީ އޮންލައިން ޕޯޓަލް މެދުވެރިކޮށް ކަމަށް އެ ކޯޕްރޭޝަނުން ބުނެއެވެ.
އެހެންކަމުން ކާރު ޕާކިން ޖާގަ ނެގުމަށް ޝައުގުވެރިވާ ފަރާތްތަކުން ޕޯޓަލްގައިވާ އިންވެސްޓަރ ރެޖިސްޓްރޭޝަން އަދި ޕްރޮޖެކްޓް ރެޖިސްޓްރޭޝަން ހުށަހެޅުމުގެ ފުރުސަތު 25 ނޮވެންބަރު 2024 އިން 5 ޑިސެންބަރު 2024 ގެ ނިޔަލަށް ހުޅުވާލެވިފައިވާ ކަމަށް އެޗްޑީސީން ބުނެއެވެ.
