މެމްބަރުން ތިބީ ރައީސް ޑރ.މުހައްމަދު މުއިއްޒުގެ ބިރަށް އަޅުވެތިވެގެންކަމަށާއި، ރައީސްގެ ކިބައިން ލަނޑެއް ނުލިބޭ މީހަކު ނެތް ކަމަށް ރައްޔިތުންގެ މަޖިލީހުގެ ފުވައްމުލަކު މެދު ދާއިރާގެކުރީގެ މެމްބަރު ހުސައިން މުހައްމަދު ދީދީ ވިދާޅުވެއްޖެއެވެ.
އޭނާ އެފަދައިން ވިދާޅުވީ އެމްޑީޕީ ހަރުގެ ޖަލްސާގައި ވާހަކަދައްކަވަމުންނެވެ. އޭނާ ވަނީ މި ސަރުކާރުން ވެރިކަމަށް އައިސް މެމްބަރުންނަށް ބިރު ދައްކަމުންދާ ކަމަށް ފާހަގަކުރައްވާ އެކަމަށް ވަރަށް ބޮޑަށް ފާޑު ވިދާޅުވެފައެވެ. އޭނާ ވަނީ މެމްބަރުން ތިބީ މެމްބަރުން ބޭނުންވާ ގޮތަށް ލިބިދާނެ ވަޒީފާއަކަށް އަދި އެ ނޫންވެސް ފައިދާ އަކަށް ވިސްނާފައި އަޅުވެތިވެގެން ކަމަށް ފާހަގަކުރައްވާފައެވެ. އެއީ ލަދުވެތިކަމެއް ކަމަށާއި މެމްބަރުން ރައްޔިތުންގެ ހައްގުގައި ވަކާލާތު ނުކުރުމަކީ ރައްޔިތުން މާޔޫސްވާ ކަމެއް ކަމަށް އޭނާ ވިދާޅުވިއެވެ. މި ސަރުކާރު ވެރިކަމަށް އައި ފަހުން ބަޖެޓްގައި ހުރި ކަންކަން ވެސް ފުވައްމުލަކަށް ނުކޮށްދެއްވޭ ކަމަށާއި އެހެންކަމުން މި ސަރުކާރަށް ނިސްބަތްވާ މެމްބަރުންނަށް ފުވައްމުލަކުގެ ނަން ބޭނުންކޮށްގެން ސަރުކާރަށް ސަނާކިޔެން ނެތް ކަަމަށް އޭނާ ވިދާޅުވިއެވެ. މިހާރު ސަރުކާރުން ހަދާ ދޮގުތައް އިންތިހާއަށް އިތުރުވެފައިވާ ކަމަށާއި މި ސަރުކާރު އޮތީ ދޮގުން ޓެކްސް ނަގާ ހިސާބުގައި ކަމަށް އޭނާ ވިދާޅުވިއެވެ.
އަޅުގަނޑު ކައިރީ އާއްމު މީހަކު ބުނި މި ސަރުކާރު އޮތީ ދޮގުން ޓެކްސް ނަގާ ހިސާބުގައޭ. އެހެން ނޫންތޯ ވާނީ އެންމެ ގިނައިން ހަދަނީ ދޮގު. އެހެންވީމަ އެންމެ ގިނަ އެއްޗަކުންތާ ޓެކްސް ނަގާނީ. ސަޕްލަޔަރުންނަށް ޕޭމެންޓް ހަދަނީ ޑޮލަރުން. އެވެސް ރުފިޔާ އަށް ބަދަލުކުރަނީ. އަނެއްކާ ޑޮލަރަށް ސަލާންޖެހުން ފަށަން މިއުޅެނީ. އެކަމަކު ރައީސް ވިދާޅުވަނީ މިހުރީ ރައްޔިތުންނާއި އެއް ފަޅީގައޭ.ރައްޔިތުންގެ މަޖިލީހުގެ ފުވައްމުލަކު މެދު ދާއިރާގެކުރީގެ މެމްބަރު ހުސައިން މުހައްމަދު ދީދީ
އޭނާ ވިދާޅުވީ މި ސަރުކާރު އައިސް ވިޔަފާރިތައް ފުނޑާލާފައިވާ ކަމަށެވެ. ރައްޔިތުން މަޖިލީހުން ފާސްކޮށް ގާނޫނު އަސާސީއަށް ގެނައި އިސްލާހުތަކަކީ، ރައްޔިތުންނަށާއި، ގައުމަށް ވަރަށް މުހިންމު އިސްލާހުތަކެއް ކަމެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ދާދިފަހުން ވިދާޅުވެފައެވެ. އެކަމަށް އިޝާރާތްކުރައްވާ އޭނާ ވިދާޅުވީ ރައްޔިތުންގެ ފަޅީގައި ރައީސް ހުންނެވި ނަމަ ހުރިހާ އެންމެންނަށް ގެއްލުންވާ ގޮތަށް އަމަލުކުރާ ސަބަބާއި މެދު ސުވާލު އުފެދޭ ކަމަށެވެ. މިހާރު ދާ ގޮތަށް ވެރިކަން ދާނަމަ އިންވެސްޓަރުން ވެސް ކުރިއަށް އޮތްތަނުގައި ރާއްޖެ ނާންނާނެ ކަަމަށް އޭނާ ވިދާޅުވިއެވެ. މި ސަރުކާރުގެ އެއްވެސް ހަމައެއް ލަމައެއް ނެތް ކަމަށާއި، ކަންކަން ނިންމުމުގައި ވެސް ހަރުދަނާކަމެއް ނެތް ކަމަށް އޭނާ ވަނީ ވިދާޅުވެފައެވެ.
މީގެ އިތުރުން 1 އޮކްޓޯބަރ 2024ން ފެށިގެން ކޮންމެ ރިސޯޓަކަށް އަންނަ ކޮންމެ މެހެމާނަކަށް 500 އެމެރިކާ ޑޮލަރު ރާއްޖޭގެ ބޭންކަކަށް މާރު ކުރަން މަޖުބޫރު ކުރުމާއެކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އެ ގަވައިދާ އެކު ރިސޯޓުތައް ހިންގުމަށް ބޮޑެތި ދަތިތައް ކުރިމަތިވާ ކަމަށް އޭނާ ވިދާޅުވިއެވެ. އަދިއެކަމުގެ ނޭދެވޭ އަސަރު މުވައްޒަފުންނަށް ކުރާނެ ކަމަށް ރިސޯޓު އޮޕަރޭޓަރުންނާއި، ފަތުރުވެރިކަމުގެ ދާއިރާގެ ތަޖުރިބާކާރުން ބުނަމުންދާ ކަމަށް އޭނާ ވަނީ ވިދާޅުވެފައެވެ.
