ދައުރު ނިމެމުންދާ އެމެރިކާގެ ރައީސް ޖޯ ބައިޑެން، ޔޫކްރެއިނަށް އެމެރިކާއިން ފޯރުކޮށްދީފައިވާ ހަތިޔާރު ރަޝިޔާގެ އެތެރޭގައި ބޭނުންކުރުމުގެ ހުއްދަ ދެއްވަން ނިންމައިފިކަމަށް ރޮއިޓަރސް، ޓަރސް، އެސޯސިއޭޓެޑް ޕްރެސް އަދި ނިއު ޔޯކް ޓައިމްސް ފަދަ ނޫސްތަކުން ރިޕޯޓުކޮށްފިއެވެ.

މި ކަމާ ގުޅޭގޮތުން މަޢުލޫމާތު ލިބިފައިވާ އެމެރިކާގެ ދެ އޮފިޝަލަކު ހިމެނޭ ގޮތުން، ތިން މަސްދަރަކުން، ރޮއިޓަރސް އަށް އާދީއްތަ ދުވަހު މައުލޫމާތު ދެމުން ބުނެފައިވަނީ ޔޫކްރެއިނުން ކުރިއަށް އޮތް ދުވަސްތަކުގައި އެމެރިކާ އިން ފޯރުކޮށްދީފައިވާ ދުރުރާސްތާ ހަތިޔާރު ބޭނުންކޮށްގެން ރަޝިޔާގެ ސަރަހައްދުތަކަށް ހަމަލާ ދިނުމަށް ރާވަމުންދާ ކަމަށެވެ.

ވައިޓް ހައުސްއިން މި ރިޕޯޓުތަކާ ގުޅޭގޮތުން މިހާތަނަށް އެއްވެސް ކޮމެންޓެއް ކޮށްފައެއް ނުވެއެވެ. ނަމަވެސް ޔޫކްރެއިނުގެ ރައީސް ވުލޮޑިމިރް ޒެލެންސްކީ އެ ގައުމުގެ ރައްޔިތުންނާ މުޚާތަބް ކުރައްވާ ވާހަކަފުޅު ދައްކަވަމުން ވިދާޅުވެފައިވަނީ ޔޫކްރެއިންނަށް އެކަށީގެންވާ ފިޔަވަޅުތައް އެޅުމުގެ ހުއްދަ ލިބިފައިވާ ކަމަށް މީޑިއާ ރިޕޯޓުތައް ބުނަމުންދާ ކަމަށާއި، މިއީ އިއުލާނު ކުރެވޭ ބާވަތުގެ ކަންކަމެއް ނޫން ކަމުގައެވެ.

ޕޮލެންޑުގެ ފޮރިން މިނިސްޓަރު ރަޑޮސްލޯ ސިކޯސްކީ ވަނީ މި ރިޕޯޓުތަކަށް މަރުޙަބާ ވިދާޅުވެފައެވެ. އޭނާ ވިދާޅުވީ، އެމެރިކާއިން ޖަވާބު ދެމުންދަނީ "[ރަޝިޔާގެ ރައީސް ވުލެޑިމިއަރ] ޕުޓިން އަށް ދޭހަވާ ބަހަކުން،" ކަމަށެވެ.

އަނެއްކޮޅުން ރަޝިޔާގެ ޤާނޫނު ހަދާ މަޖިލީހުގެ މެންބަރެއް ކަމުގައިވާ ވްލަޑިމިއަރ ޖަބަރޮވް ރަޝިޔާ ސަރުކާރުގެ ނޫސް އޭޖެންސީ ޓާސް އަށް ވިދާޅުވެފައިވަނީ، އެމެރިކާއިން ފޯރުކޮށްދީފައިވާ މިސައިލް ރަޝިޔާގެ އެތެރޭގައި ހަމަލާ ދިނުމަށް ޔޫކްރެއިނަށް ބޭނުންކުރުމަށް ހުއްދަ ދިނުމަކީ ތިންވަނަ ބޮޑު ހަނގުރާމައަކަށް މަގުފަހިވެދާނެ ކަމެއް ކަމަށެވެ. އޭނާ އިތުރަށް ވިދާޅުވެފައި ވަނީ ރަޝިޔާ އިން މި ނިންމުމަށް ވަގުތުން ޖަވާބުދާރީވާނެ ކަމަށެވެ.

ބައިޑެންގެ މި ނިންމުން އައިސްފައިވަނީ އޭނާގެ ދައުރު ނިމުމަށް ދެ މަސް ދުވަސް ދުވަހަށް ކުޑަތަން ވެ، އަދި ޖެނުއަރީ 20 ވަނަ ދުވަހު އައު ރައީސް ޑޮނަލްޑް ޓްރަމްޕް މަޤާމާ ހަވާލުވެވަޑައިގަތުމަށް ތައްޔާރުވަމުންދާ ދަނޑިވަޅެއްގައެވެ. ބައިޑްން އާ ޚިލާފަށް ޓްރަމްޕް ފާހަގަ ކުރެވިފައިވަނީ ރަޝިޔާ ކޮޅަށް ބުރަވެ ވަޑައިގަންނަވާ ބޭފުޅެއްގެ ގޮތުގައެވެ.

ޓްރަމްޕް އަދި އޭނާގެ ޓީމުގެ އިސް މެންބަރުން ދައްކާފައިވާ ވާހަކަތަކުން ދޭހަވަނީ އެ ފަރާތްތަކަކީ ރަޝިޔާއާ ދެކޮޅަށް ހިނގަމުންދާ ހަނގުރާމައިގައި ޔޫކްރެއިނަށް އެމެރިކާ އިން ބޮޑެތި އެހީތެރިކަން ދިނުމާމެދު ސުވާލު އުފައްދާ ބައެއްގެ ގޮތުގައެވެ. އަދި ޓްރަމްޕް އޮފީހާ ހަވާލުވެވަޑައިގަތުމަށް ފަހު އެމެރިކާގެ ހަތިޔާރު ރަޝިޔާގެ ތެރޭގައި ބޭނުންކުރުމުގެ ހުއްދަ ޔޫކްރެއިނަށް ދިނުމަށް ނިންމާފައިވާ ނިންމުން ބަދަލުކުރާނެކަން ނުވަތަ ނޫންކަން އަދި ސާފެއް ނޫނެވެ.

ރިޕަބްލިކަން ޕާޓީގެ ލީޑަރު ޓްރަމްޕް ވަޢުދު ވެވަޑައިގެންފައި ވަނީ އޭނާގެ ވެރިކަމުގައި ހަނގުރާމަ އަވަހަށް ނިމުމަކަށް ގެންނަވާނެ ކަމަށެވެ. ނަމަވެސް އެކަން ކުރައްވާނެ ގޮތުގެ ތަފްޞީލެއް އޭނާ ހާމަ ކުރައްވާފައެއް ނުވެއެވެ.

އެމެރިކާގެ މި ނިންމުމާއެކު ޔޫކްރެއިނުން، އެމެރިކާގައި އުފައްދާފައިވާ އާމީ ޓެކްޓިކަލް މިސައިލް ސިސްޓަމްސް (އޭޓީއޭސީއެމްއެސް) ރޮކެޓްތައް ރަޝިޔާގެ ސަރަހައްދުތަކަށް ހަމަލާ ދިނުމުގައި ބޭނުންކުރާނެ ކަމަށް ބެލެވެއެވެ.

މި ރޮކެޓްތަކުގެ ރޭންޖަކީ 190 މޭލު (306 ކިލޯމީޓަރު) ކަމަށް ރިޕޯޓުތައް ބުނެއެވެ.

ރޮއިޓަރސް އަށް މަޢުލޫމާތު ދިން ފަރާތްތަކުން ބުނެފައިވަނީ، އެމެރިކާގައި މިހާރު އޮތް ޔޫކްރެއިން އާ ރަހްމަތްތެރި ސަރުކާރުގެ ފައިދާ ޔޫކްރެއިނުން ނަގަމުންދާ ކަމަށެވެ. ޒެލެންސްކީ ވަނީ ރަޝިއާގެ އެތެރޭގައި ހުރި އަމާޒުތަކަށް އެމެރިކާގެ ހަތިޔާރު ބޭނުންކޮށްގެން ހަމަލާ ދިނުމުގެ ހުއްދައަށް ތަކުރާރުކޮށް އެމެރިކާގެ ކިބައިން އެދިވަޑަޢިގެންފައެވެ. އެހެން ނަމަވެސް މިހާ ހިސާބަށް އައި އިރުވެސް އެ ހުއްދަ ޔޫކްރެއިނަށް އޮތީ ލިބޭ ގޮތް ނުވެފައެވެ.

ފްރާންސްގެ ނޫސް ލަ ފިގާރޯގައި ވާ ރިޕޯޓަކަށް އިޝާރާތްކުރަމުން، އިނގިރޭސިވިލާތާއި ފަރަންސޭސިވިލާތުން ވެސް އެ ޤައުމުތަކުން ޔޫކްރެއިންނަށް ދީފައިވާ ދުރު ރޭންޖުގެ މިސައިލްތައް ރަޝިޔާ އާ ދެކޮޅަށް ބޭނުންކުރުމަށް އެ ގައުމުތަކުން ހުއްދަ ދޭނެ ކަމަށް މަސްރަހް ދިރާސާ ކުރާ ފަރާތްތަކުން ބުނެފައިވެއެވެ.

މޮސްކޯއިން ކުރިން އިންޒާރުދީފައިވާ ގޮތުގައި، އެމެރިކާއިން ފޯރުކޮށްދޭ ހަތިޔާރުތައް ޔޫކްރެއިން އިން ބޭނުން ކުރުމުގައި ދޭ ކޮންމެ ދުލެއް ބެލެވޭނީ ހަނގުރާމަ ފުޅާ ކުރަން އަޅާ ފިޔަވަޅެއްގެ ގޮތުގައި ކަމުގައެވެ.

އެމެރިކާގެ މި ނިންމުމަކީ ހަތިޔާރު ބޭނުން ކުރުމުގެ ސިޔާސަތަށް ގެނައި ބޮޑު ބަދަލެއްގެ ގޮތުގައި ބެލެވެއެވެ. އަދި މިއީ ރަޝިޔާ އިން ޔޫކްރެއިންގެ ސިޓީތަކަށާއި ކަރަންޓުގެ ވިއުގައަށް ދެމުންދާ ހަމަލާތައް ހުއްޓުވުމަށް ޔޫކްރެއިން ސަރުކާރަށް ލިބޭ ބޮޑު ބާރެއް ކަމަށްވެސް ރިޕޯޓުތައް ބުނެއެވެ.

އެމެރިކާ އާއި ނޭޓޯ ބައިވެރިން ރަޝިޔާ – ޔޫކްރެއިން ހަނގުރާމައިގެ ތެރެއަށް ސީދާ ވަންނަން ޖެހިދާނެ ކަމަށްޓަކައި، އެމެރިކާގެ ރައީސް ބައިޑްން ވަނީ އެމެރިކާގެ ހަތިޔާރު ރަޝިޔާގެ އެތެރޭގެ ޓާގެޓް ތަކަށް ހަމަލާ ދިނުމުގައި ބޭނުން ކުރުމާ މިހާތަނަށް ދެކޮޅު ހައްދަވާފައެވެ.

އެމެރިކާގެ ދުރު ރާސްތާ މިސައިލް ރަޝިޔާގެ ޓާގެޓް ތަކަށް ހަމަލާ ދިނުމުގައި ބޭނުން ކުރަން ހުއްދަ ދިން މި ދަނޑިވަޅަކީ ހަނގުރާމައިގައި ރަޝިޔާ އިން ބޮޑެތި ކުރިއެރުންތަކެއް ހޯދަމުންދާ ދަނޑިވަޅެއްކަން ފާހަގަ ކުރެވެއެވެ.