ޔުއެފާ ނޭޝަންސް ލީގު އޭގެ ގުރޫޕު ހަތަރެއްގައި ޑެންމާކާ ދެކޮޅަށް ކުޅުނު މެޗުން ވެސް ސްޕެއިން މޮޅުވެއްޖެ އެވެ.

ހުކުރު ދުވަހުގެ ރޭ ޑެންމާކާ ދެކޮޅަށް ނިކުތްއިރު ވެސް ސްޕެއިން އަށް އޮތީ މުބާރާތުގެ ކުއާޓާ ފައިނަލް އިން ފުރުސަތު ލިބިފަ އެވެ. ޑެންމާކާ ދެކޮޅަށް ކުޅުނު މެޗު 2-1 އިން ކާމިޔާބުކޮށް، ސްޕެއިން އިން ވަނީ މި ގުރޫޕުގެ އެއް ވަނަ ޖާގަ ކަށަވަރު ކޮށްފަ އެވެ. މެޗުގެ ފުރަތަމަ ހާފުގައި ސްޕެއިން އެއް ލަނޑު ޖެހިއިރު، ދެ ވަނަ ހާފުގައި ދެ ވަނަ ލަނޑެއް ޖެހި އެވެ. މި ހާފުގައި ޑެންމާކުން ވެސް ވަނީ ލަނޑެއް ޖަހައިފަ އެވެ.

މެޗު ފަށައިގެން 15 ވަނަ މިނެޓުގައި ސްޕެއިން އަށް ލީޑު ނަގައިިދިނީ މިކޭލް އޮޔާޒަބާލް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ އަޔޯޒީ ޕެރޭޒް އެވެ. އޭގެ ފަހުން ވެސް މެޗުގެ ފުރަތަމަ ހާފުގައި ސްޕެއިން އަށް ވަނީ އިތުރު ލަނޑު ޖަހާނެ ފުރުސަތުތަކެއް ވެސް ލިބިފަ އެވެ. މެޗުގެ ދެ ވަނަ ހާފު ފަށައިގެން ތޭރަ ވަނަ މިނެޓުގައި ސްޕެއިންގެ ދެ ވަނަ ލަނޑު ޖެހީ އަޔޯޒީ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޑެނީ އޮލްމޯ އެވެ. މެޗުގައި ޑެންމާކުގެ ހަމައެކަނި ލަނޑު 84 ވަނަ މިނެޓުގައި ޖެހީ ގުސްޓާވް އައިސަކްސަން އެވެ.

މޮޅާއެކު ސްޕެއިން އެއް ވަނައިގައި އޮތީ ކުޅުނު ފަސް މެޗުން 13 ޕޮއިންޓު ހޯދައިގެންނެވެ. ހަތަރު މެޗުން އެ ޓީމު މޮޅުވެފައިވާއިރު، އެއް މެޗުން ވަނީ އެއްވަރުވެފަ އެވެ. ސްޕެއިން އަތުން ބަލިވި ޑެންމާކު އޮތީ ފަސް މެޗުން ހަތް ޕޮއިންޓާ އެކު ދެ ވަނައިގަ އެވެ.