ބާސެލޯނާ އަށް ކުޅެމުން އަންނަ ސްޕެއިންގެ ސެންޓްރަލް މިޑްފީލްޑަރު ގަވީގެ އެއްބަސްވުން އައު ކުރެވޭނެ ކަމަށް، އެ ކުލަބުގެ ޑައިރެކްޓަރު ޑެކޯ ބުނެފި އެވެ.
ބާސެލޯނާގެ ސީނިއާ ޓީމުން ގަވީ އަށް ފުރުސަތު ލިބުނީ 2021 ވަނަ އަހަރު އެވެ. އޭގެ ފަހުން މިދިޔަ އަހަރު އޭނާ ވަނީ ބާސެލޯނާ އާއެކު ސޮއި ކޮށްފައިވާ އެއްބަސްވުން އައު ކޮށްފަ އެވެ. އެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަަލަށެވެ. އެއްބަސްވުމުގައި ބާކީ ދެ އަހަރެއްހާ މުއްދަތު އޮތް ނަމަވެސް، ބާސެލޯނާ އިން ބޭނުން ވަނީ އޭނާގެ އެއްބަސްވުން އައު ކުރުމަށެވެ. އެކަމާ ގުޅުން ހުރި މަޝްވަރާތައް ބާސެލޯނާ އިން ގަވީ އާއެކު ކުރަމުން އަންނަ ކަމަށް މީޑިއާ ތަކުގައި ވަނީ ރިޕޯޓުކޮށްފަ އެވެ.
އެކަމާ ގުޅޭ ގޮތުން ވާހަކަ ދައްކަމުން ޑެކޯ ބުނީ، ބާސެލޯނާ އާއެކު އައު އެއްބަސްވުމުގައި ސޮއި ކުރާ މަންޒަރު އޭނާ އަށް ތަސައްވަރު ކުރެވޭ ކަމަށާއި، ގަވީގެ މުސްތަޤުބަލު ބާސެލޯނާގައި އޮތް މަންޒަރު ވެސް އޭނާ އަށް ފެންނަ ކަމަށެވެ. ޚާއްސަކޮށް ބާސެލޯނާގައި ގަވީ މޮޅު ކުޅުމެއް ދައްކަމުން އަންނަ ކަމަށް ޑެކޯ ފާހަގަ ކުރި އެވެ. އޭނާ އަކީ ޚާއްސަ ކުޅުންތެރިޔެއްކަން ފާހަގަކޮށް ގަވީ ބުނީ، ގަވީ އަކީ ތަޖުރިބާހުރި މޮޅު ކުޅުންތެރިޔެއް ކަމަށެވެ. ޒުވާން އުމުރުގައި ގަވީ ދައްކަމުން އަންނަނީ، 26 އަހަރު ނުވަތަ 27 އަހަރުގެ ކުޅުންތެރިޔަކު ދައްކަމުން އަންނަ ފެންވަރުގެ ކުޅުމެއް ކަމަށް ވެސް ޑެކޯ ބުންޏެވެ.
މީޑިއާ ތަކުގައި ބުނެފައިވާ ގޮތުން، ގަވީ ބާސެލޯނާގެ އެއްބަސްވުން އައު ކުރުމަކީ ގާތް ކަމެކެވެ. އޭނާ ވަނީ މިހާތަނަށް ބާސެލޯނާ އަށް ކުޅެދިން 117 މެޗުން ހަތް ލަނޑު ޖަހައިފަ އެވެ. ބާސެލޯނާ އާއެކު ދެ ތައްޓެއް ކާމިޔާބު ކޮށްފައިވާ ގަވީ އަކީ، އެ ޓީމުގައި އެންމެ މުހިންމު ދައުރެއް އަދާ ކުރަމުން އަންނަ އެއް ކުޅުންތެރިޔާ އެވެ.
