މި ސަރުކާރަކީ ދޮގާއި މަކަރާއި އޮޅޫވާލުމުގެ ސަރުކާރެއް ކަމަށާއި، އަދުގެ ސަރުކާރަކީ މުނާފިގު ސަރުކާރެއް ކަމަށް 'ފުދިއްޖެ، ފުނޑިއްޖެ' ޖަލްސާގައި ވާހަކަ ދައްކަވަމުން ކުރީގެ ރައީސް އިބްރާހިމް މުހައްމަދު ޞާލިހް އަދި އެމްޑީޕީގެ އިސް އެޑްވައިޒަރު ވިދާޅުވެއްޖެއެވެ.
އަންގާރަ ދުވަހުރޭ ގިނަ ބަޔަކު ހާޒިރުވި އާޓިފިޝަލް ބީޗް ގައި އޮތް ޖަލްސާގައި ރައީސް ޞާލިހު ވިދާޅުވީ މިސް ޔުނިވަރސްގައި ރާއްޖޭގެ ޒުވާނަކު ބައިވެރިވީމާ ނުކުމެ ސަރުކާރުގެ ވެރިން ބަހަނާ އާއި ވާހަކަތައް ދެއްކުމަށްފަހު ހަމަ އެއާ ޖެހިގެން ރާއްޖޭގައި ބަރަހަނާކޮށް ބޮޑީބިލްޑިންގ މުބާރާތެއް ބާއްވަން ނިންމި ކަމަށެވެ.
އެމަނިކުފާނު ވިދާޅުވީ އެންމެފަހުން އެކަން ނިމިގެންދިޔަ އިރުގައި، ޒިންމާ އުފުލަންޖެހުނީ ޒުވާނުންތަކެއް ކަމަށާއި، ބޮޑީބިލްޑިންގ އެސޯސިއޭޝަން ލައްވާ މައާފަށް އެދި އެކަން ނިންމާލީ ކަމަށެވެ. މިކަން މިހެން ހިނގިއިރު، ރާއްޖޭގެ ރައީސުލްޖުމްހޫރިއްޔާ ކޮބައިތޯއާއި، ޔޫތް މިނިސްޓަރާއި ސްޕޯޓްސް މިނިސްޓަރާއި އިސްލާމިކް މިނިސްޓަރު ކޮބައިތޯ ވެސް ރައީސް ޞާލިހު ސުވާލު ކުރެއްވިއެވެ.
ރައީސް ޞާލިހު ވިދާޅުވީ އެމަނިކުފާނުގެ ސަރުކާރުގައިވެސް ބޮޑީބިލްޑިންގ މުބާރާތެއް ބޭއްވި ކަމަށާއި، ނަމަވެސް ބަރަހަނާ ނުވެ އެކަން ކުރެވެނު ކަމަށާއި، ރައީސް މައުމޫނުގެ ވެރިކަމުގައިވެސް މިސް ޔުނިވަރސްގެ ބީޗް ސެގްމަންޓް ބޭއްވުނު ކަމަށާއި، ބަރަހަނާވާން ޖެހޭ ހިސާބަށް ކަންކަން ނުދާ ކަމަށެވެ.
ރައީސް ޞާލިހު ވިދާޅުވީ އެކަމަކީ ގަސްދުގައި ރާވައިގެން ކުރި ކަމެއް ކަމަށާއި، ޒުވާނުންނަށް ކޮށްދޭނެ ކަމެއް މި ސަރުކާރުގައި ނެތް ކަމަށެވެ.
