ސްޕެއިންގެ ބާސެލޯނާ އަށް ކުޅެމުން އަންނަ ޕޮލެންޑުގެ ފޯވާޑު ރޮބާޓް ލެވަންޑޯސްކީ އަށް ލިބިފައިވާ އަނިޔާއެއްގެ ސަބަަބުން، ޤައުމީ ޓީމާ ނުގުޅެން އޭނާ ނިންމައިފި އެވެ.

ބައިނަލްއަޤުވާމީ ބްރޭކަށް ކުލަބު ފުޓުބޯޅައިގެ މެޗުތައް މެދު ކަނޑާލާފައިވާއިރު، ލެވަންޑޯސްކީ ޤައުމީ ޓީމާ ނުގުޅޭނެ އެވެ. އެއީ އޭނާގެ ބުރަކައްޓަށް ލިބިފައިވާ އަނިޔާއެއްގެ ސަބަބުން ކަމަށް ރިޕޯޓުތައް ބުނެ އެވެ. ނަމަވެސް އެއީ އެހާ ސީރިއަސް އަނިޔާއެއް ނޫން ކަމަށާއި، ގާތް ގަނޑަކަށް ދިހަ ވަރަކަށް ދުވަހުގެ ތެރޭގައި އެ އަނިޔާ އިން ލެވަންޑޯސްކީ ރިކަވާ ވާނެ ކަމަށް އަންދާޒާ ކުރެވޭ ކަމަށް، ބާސެލޯނާގެ މެޑިކަލް ޓީމާ ހަވާލާދީ މީޑިއާ ތަކުގައި ވަނީ ބުނެފަ އެވެ.

ލެވަންޑޯސްކީ އަށް އެ އަނިޔާ ލިބުނީ ސްޕެނިޝް ލީގުގައި ބާސެލޯނާ އިން ރެއާލް ސޮސިއެޑާޑާ ދެކޮޅަށް ކުޅުނު މެޗުގަ އެވެ. ސޮސިއެޑާޑުގެ ދަނޑުގައި ކުޅުނު އެ މެޗުން ބާސެލޯނާ ބަލިވީއިރު، ލެވަންޑޯސްކީ ވަނީ މެޗު ފުރިހަމަ ކޮށްފަ އެވެ. އޭގެ ފަހުން ހޯމަ ދުވަހު ބާސެލޯނާ އިން ހާމަކޮށްފައިވާ ގޮތުގައި ލެވަންޑޯސްކީގެ ބުރަކައްޓަށް ކޮންމެ ވެސް ވަރެއްގެ އަނިޔާއެއް ލިބިފައިވެ އެވެ.

ޤައުމީ ޓީމާ ނުގުޅެން ލެވަންޑޯސްކީ ނިންމާފައިވާއިރު، މި ބްރޭކުގައި ޕޮލެންޑުން ދެ މެޗެއް ކުޅޭނެ އެވެ. އެއީ ޔުއެފާ ނޭޝަންސް ލީގުގައި މި މަހުގެ 16 ވަނަ ދުވަހު ޕޯޗުގަލްއާ ދެކޮޅަށް ކުޅޭ މެޗާއި، އަދި 19 ވަނަ ދުވަހު ސްކޮޓްލެންޑާ ދެކޮޅަށް ކުޅޭ މެޗެވެ. ލެވަންޑޯސްކީ ކުޅެމުން އަންނަ ބާސެލޯނާ އިން އުންމީދު ކޮށްގެން އޮތީ ބައިނަލްއަޤުވާމީ ބްރޭކަށްފަހު އަލުން ކުލަބުގެ ކުޅުން ފަށާފައިރު، ލެވަންޑޯސްކީ މުޅިން ފިޓުވާނެ ކަމަށެވެ.