އިނގިރޭސި ޕްރިމިއާ ލީގުގައި ޗެލްސީއާ ދެކޮޅަށް ކުޅުނު މެޗުން އާސެނަލް މޮޅު ނުވީ، ނަސީބު ދެރަވުމުގެ ސަބަބުން ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.

ޗެލްސީގެ އަމިއްލަ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި އާސެނަލް އިން ފުރަތަމަ ލަނޑު ޖަހައި ކުރި ހޯދި ނަމަވެސް، ޗެލްސީން ވަނީ ފަހަތުން އަރައި ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ. އޭގެ ކުރިން މެޗުގައި އާސެނަލް އިން ޖެހި ލަނޑެއް، ވީޑިއޯ އެސިސްޓެންޓު ރެފްރީ (ވީއޭއާރު) ވަނީ ކެންސަލް ކޮށްފަ އެވެ.

ޗެލްސީ މެޗަށްފަހު ވާހަކަ ދައްކަމުން އާޓެޓާ ބުނީ، އެ މެޗުގައި އާސެނަލަށް ކުރިމަތިލާން ޖެހުނީ ބަދު ނަސީބާ ކަމަށެވެ. ޗެލްސީ އަކީ މިވަގުތު ވެސް ޔޫރަޕުގައި އޮތް އެންމެ ވަރުގަދަ އެއް ޓީމު ކަމަށާއި، އެ ޓީމާ ދެކޮޅަށް އާސެނަލް ކުޅުނީ މުޅު މެޗު ކޮންޓްރޯލް ކޮށްގެން ކަމަށް ވެސް އާޓެޓާ ބުންޏެވެ. އެހެން ނަމަވެސް، އެ މެޗުން އާސެނަލަށް ނަތީޖާ ނުނެރެވުނު ކަމަށާއި، އާސެނަލަށް ނަސީބު ނެތީ ކަމަށް އާޓެޓާ ބުންޏެވެ. އޭނާ ފާހަގަ ކުރި ގޮތުގައި އެ މެޗުގައި އާސެނަލްގެ ކުޅުންތެރިން ދެއްކީ ވެސް ހިތްހަމަ ޖެހޭ ވަރުގެ ކުޅުމެކެވެ.

މީގެ އިތުރުން އާޓެޓާ ބުނީ މެޗުގެ ނަތީޖާއާ މެދު ހިތްހަމަ ނުޖެހޭ ކަމަށާއި، އެއީ ކަންބޮޑުވާ ނަތީޖާއެއް ކަމަށެވެ. އެ މެޗުގައި އާސެނަލަށް އެއް ލަނޑަށްވުރެ ގިނަ ލަނޑު ޖެހެން ޖެހޭނެ ކަމަށް ވެސް އާޓެޓާ ޤަބޫލު ކުރެ އެވެ. މުޅި މެޗަށް ބަލާއިރު، ލަނޑު ޖެހުމަށް އާސެނަލް އިން ތަނަވަސް ތިން ފުރުސަތެއް ހޯދި ކަމަށާއި، ނަމަވެސް ގޯލުގެ ތެރެއަށް ބޯޅަ ވައްދާލައިގެން ނަތީޖާ ނެރުމުގައި އުނދަގޫތަކެއް ކުރިމަތިވި ކަމަށް އާޓެޓާ ބުންޏެވެ.

ލީގުގައި މިވަގުތު އާސެނަލް އޮތް ހިސާބަށް އިޝާރާތް ކުރަމުން އާޓެޓާ ބުނީ، މިވަގުތު ކަން އޮތް ގޮތަކީ އެއީ ކަމަށާއި، އެ ހަޤީގަތް ބަދަލު ނުކުރެވޭނެ ކަމަށެވެ. ނަމަވެސް ކުރިއަށް އޮތް ބައިނަލްއަޤުވާމީ ބްރޭކަށްފަހު، ޓީމު ފުރިހަމަ ގޮތުގައި ފެންނާނެ ކަމަށް އުންމީދު ކުރެވޭ ކަމަށް ވެސް އާޓެޓާ ބުންޏެވެ. ޚާއްސަކޮށް ޖިސްމާނީ ގޮތުން ވެސް ކުޅުންތެރިން އިތުރަށް ފިޓުވާނެ ކަމަށް ވެސް އާޓެޓާ ވަނީ ފާހަގަކޮށްފަ އެވެ. އޭނާ ބުނީ ހުއްޓުމެއް ނެތި ކުރަމުން އަންނަ މަސައްކަތަކީ އާސެނަލް ރަނގަޅު ހިސާބަކަށް ގެންދިޔުމުގެ މަސައްކަތް ކަމަށާއި، ކުރިއަށް އޮތް ތަނުގައި ވެސް އެ މަސައްކަތް ކުރުމުގައި ދެމި ތިބޭނެ ކަމަށެވެ.

މިވަގުތު އާސެނަލް އޮތީ ލީގު ތާވަލްގެ ހަތަރު ވަނަ މަގާމުގަ އެވެ. އެއީ މިހާތަނަށް ލީގުގައި ކުޅުނު 11 މެޗުން 19 ޕޮއިންޓު ހޯދައިގެންނެވެ. 11 މެޗުގެ ތެރެއިން އާސެނަލް މޮޅުވެފައި ވަނީ ފަސް މެޗުންނެވެ. ހަތަރު މެޗު އެއްވަރުވެފައިވާއިރު، ދެ މެޗަކުން އާސެނަލް ވަނީ ބަލިވެފަ އެވެ.