ޔުއެފާ ޗެމްޕިއަންސް ލީގުގައި މެންޗެސްޓަރ ސިޓީއާ ދެކޮޅަށް ކުޅުނު މެޗުން ޕޯޗުގަލްގެ ސްޕޯޓިން މޮޅުވެއްޖެ އެވެ.

ސްޕޯޓިންގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 4-1 އިންނެވެ. އެއީ މެޗުގައި ސިޓީން ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރައި ހަތަރު ލަނޑު ޖަހައިގެންނެވެ.

މެޗު ފަށައިގެން ހަތަރު ވަނަ މިނެޓުގައި ސިޓީން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ފިލް ފޮޑެން އެވެ. ނަމަވެސް ފުރަތަމަ ހާފުގެ 38 ވަނަ މިނެޓުގައި ސްޕޯޓިން އަށް ނަތީޖާ ހަމަހަމަ ކޮށްދިނީ ވިކްޓަ ގްޔޯކޭސް އެވެ. މެޗުގައި ސްޕޯޓިންގެ ފަހު ތިން ލަނޑު އެ ޓީމުން ޖެހީ ދެ ވަނަ ހާފުގަ އެވެ.

އެގޮތުން ދެ ވަނަ ހާފު ފަށައިގެން ދެ ވަނަ މިނެޓުގައި މެކްސިމިލިއާނޯ އަރައުހޯ އެވެ. އޭގެ ތިން މިނެޓު ފަހުން ސްޕޯޓިންގެ ތިން ވަނަ ލަނޑު ގްޔޯކޭސް ޖެހީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. މެޗުގެ 69 ވަނަ މިނެޓުގައި ސިޓީގެ އާލިން ހާލަންޑަށް ލަނޑު ޖަހަން ލިބުނު ފުރުސަތުގައި އޭނާ ފޮނުވާލި ޕެނަލްޓީ ކާމިޔާބުވާ ގޮތެއް ނުވި އެވެ. މެޗުގައި ސްޕޯޓިންގެ ހަތަރު ވަނަ ލަނޑު 80 ވަނަ މިނެޓުގައި ގްޔޯކޭސް ޖެހީ ޕެނަލްޓީ އަކުންނެވެ. އެއާއެކު އޭނާ ވަނީ މެޗުގައި ތިން ލަނޑު ޖަހައި ހެޓްރިކް ހަމަކޮށްފަ އެވެ.

މިއާއެކު އެންމެ ފަހުން ސިޓީ ކުޅުނު ތިން މެޗުން ވެސް އެ ޓީމު މި ވަނީ ބަލިވެފަ އެވެ. ކަރަބޯ ކަޕްގައި ޓޮޓެންހަމާ ދެކޮޅަށް ކުޅުނު މެޗުން ބަލިވީއިރު، އޭގެ ފަހުން އިނގިރޭސި ޕްރިމިއާ ލީގުގަައި ބޯންމައުތާ ދެކޮޅަށް ކުޅުނު މެޗުން ވެސް ވަނީ ބަލިވެފަ އެވެ. ސިޓީ އަތުން ހޯދި މޮޅާއެކު ސްޕޯޓިން ދެ ވަނައިގައި އޮތީ މިހާތަނަށް ކުޅުނު ހަތަރު މެޗުން 10 ޕޮއިންޓު ހޯދަައިގެންނެވެ. ބައްޔާއެކު ސިޓީ އޮތީ، ހަތަރު މެޗުން ހަތް ޕޮއިންޓާ އެކު ހަ ވަނައިގަ އެވެ.