ފްރާންސް ފުޓުބޯޅަ އިން ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު ކާމިޔާބު ކުރުމަކީ އޭނާގެ އުންމީދެއް ކަމަށް، ބާސެލޯނާ އަށް ކުޅެމުން އަންނަ ސްޕެއިންގެ ޒުވާން ކުޅުންތެރިޔާ ލަމީން ޔަމާލް ބުނެފި އެވެ.

އޭނާ މިހެން ބުނީ ހޯމަ ދުވަހުގެ ރޭ ފްރާންސްގެ ވެރި ރަށް ޕެރިހުގައި އޮތް ބެލެންޑިއޯ އެވޯޑު ޙަފުލާ އަށް ފަހު މީޑިއާއަކާ ވާހަކަ ދައްކަމުންނެވެ. މިއަހަރުގެ ބެލެންޑިއޯ އެވޯޑަށް ނޮމިނޭޓުވި 30 ކުޅުންތެރިންގެ ތެރޭގައި ޔަމާލް ހިމެނުނެވެ. އެވޯޑު ޙަފުލާގައި އެވޯޑުގެ ރޭންކިންގ އިއުލާން ކޮށްފައިވާއިރު، ޔަމާލް ހިމެނުނީ އަށް ވަނައިގަ އެވެ.

މިއަހަރުގެ ބެލެންޑިއޯ އެވޯޑު ޙަފުލާގައި އަހަރުގެ އެންމެ މޮޅު ޒުވާން ކުޅުންތެރިޔާ އަށް ދޭ ކޮޕާ އެވޯޑު ކާމިޔާބު ކުރީ ޔަމާލް އެވެ. ކޮޕާ އެވޯޑު ޔަމާލް ކާމިޔާބު ކުރީ ރެއާލް މެޑްރިޑަށް ކުޅެމުން އަންނަ އާޑާ ގުލާ، މެންޗެސްޓަރ ޔުނައިޓެޑަށް ކުޅެމުން އަންނަ ކޮބީ މައިނޫ، މެންޗެސްޓަރ ސިޓީ އަށް ކުޅެމުން އަންނަ ސަވީނިއޯ އަދި ބާސެލޯނާ އަށް ކުޅެމުން އަންނަ ޕައު ސުބާސީއާ ވާދަކޮށެވެ. ބާސެލޯނާގައި ވެސް މޮޅު ކުޅުމެއް ދައްކާފައިވާ ޔަމާލް ވަނީ ސްޕެއިން އާއެކު މިއަހަރު އޮތް ޔޫރޯ ފުުޓުބޯޅަ މުބާރާތް ވެސް ކާމިޔާބު ކޮށްފަ އެވެ. އެ މުބާރާތުގެ އެންމެ މޮޅު ޒުވާން ކުޅުންތެރިޔަކަށް ހޮވުނީ ވެސް ޔަމާލް އެވެ.

އެވޯޑު ޙަފުލާ އަށް ފަހު މީޑިއާއަކާ ވާހަކަ ދައްކަމުން ޔަމާލް ބުނީ، އޭނާގެ ފުޓުބޯޅަ ކެރިއަރުގައި ވީ އެންމެ އަވަހަކަށް ބެލެންޑިއޯ އެވޯޑު ކާމިޔާބު ކުރަން ބޭނުންވާ ކަމަށެވެ. އަދި ބެލެންޑިއޯ އެވޯޑު ކާމިޔާބު ކުރުމަކީ އޭނާގެ ވިސްނުމުގައި އަދި އޭނާގެ އަމާޒުގައި އޮތް ކަމެއް ކަމަށް ވެސް ޔަމާލް ބުންޏެވެ. އެހެންކަމުން އެކަން ޙާސިލު ކުރުމަށްޓަކައި ކުރަން ޖެހުނު ކޮންމެ ކަމެއް ކުރާނެ ކަމަށް ވެސް ޔަމާލް ވަނީ ބުނެފަ އެވެ. އަދި މިއަހަރުގެ ކޮޕާ އެވޯޑު ލިބުމުން އުފާވެފައި ހުރި ކަމަށް ވެސް ޔަމާލް ބުންޏެވެ.

އުމުރުން 17 އަހަރުގެ ޔަމާލް އަންނަނީ ބާސެލޯނާ އަދި ސްޕެއިންގައި ވެސް މޮޅު ކުޅުމެއް ދައްކަމުންނެވެ. ބާސެލޯނާގެ ސީނިއާ ޓީމުން ޔަމާލް އަށް ފުރުސަތު ލިބުނީ 2023 ވަނަ އަހަރު އެވެ. އޭނާ ވަނީ މިހާތަނަށް ބާސެލޯނާ އަށް ކުޅެދިން 65 މެޗުގައި 13 ލަނޑު ޖަހައިފަ އެވެ. ހަމަ އެ އަހަރު ޔަމާލް އަށް ވަނީ ސްޕެއިން ޤައުމީ ޓީމުން ވެސް ޖާގަ ލިބިފަ އެވެ. ޤައުމީ ޓީމަށް އޭނާ ވަނީ މިހާތަނަށް 17 މެޗު ކުޅެދީ ތިން ލަނޑު ޖަހައިފަ އެވެ.