ކުރިއަށް އޮތް 6 ވަރަކަށް މަސް ދުވަސްތެރޭގައި ފަންޑު ލިބި، ކަންކަން ރަނގަޅުވާނެ ކަމުގެ ވަރަށް ބޮޑު ޔަޤީންކަމެއް އެބަ އޮތް ކަމަށް ޓުއަރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެއެވެ.
ފައިސަލް ވަނީ ސަރުކާރަށް 11 ވަރަކަށް މަސް ދުވަސް ވެގެން ދިޔަ އިރު އެކި ދާއިރާތަކުން އެހީ ހޯދުމަށް ވަރަށް ބޮޑަށް މަސައްކަތްކޮށްފައިވާ ކަމަށް ވިދާޅުވެފައެވެ. އަދި މިހާރު ވެސް އަވަށްޓެރި ޤައުމުތަކާއި އެހެނިހެން ޤައުމުތަކުން ފައިސާ އާއި އެހީ ހޯދުމަށް ގިނަ މަސައްކަތްތަކެއް ކުރެވެމުންދާ ކަމަށް ފައިސަލް ވިދާޅުވިއެވެ. އަދި މިހާރު ރައީސް ޑރ.މުހައްމަދު މުއިއްޒުގެ އިސް ނެގުމާއި އެކު ކުރަމުންދާ މަސައްކަތްތަކުގެ ތެރެއިން ވަރަށް އުންމީދީ ކަންތައްތަކެއް ހާސިލްވާނެ ކަމަށް ބެލެވޭ ކަމަށް ފައިސަލް ވިދާޅުވިއެވެ. އެގޮތުން ދާދިފަހުން އަވަށްޓެރި އިންޑިއާ އަށް އެ މަނިކުފާނު ކުރެއްވި ދަތުރުފުޅަކީ ވެސް ވަރަށް އުންމީދީ ދަތުރުފުޅެއް ކަމަށް ފައިސަލް ވަނީ ފާހަގަކުރައްވާފައެވެ.
ފައިސަލް ފާހަގަކުރެއްވި ގޮތުގައި ދާދި އަވަހަށް ރާއްޖެ އަށް އެކި ދާއިރާތައް ކުރިއެރުވުމަށް ބޭނުންވާ ފަންޑު ލިބޭނެ ކަމުގެ ބޮޑު ޔަގީންކަމެއް ވަނީ ލިބިފައެވެ. އެހެންނަމަވެސް އެ ފަންޑު ލިބޭ ގޮތެއް ފައިސަލް ހާމަ އެއް ނުކުރައްވައެވެ. ފައިސަލް ވަނީ އެ ފަންޑުތައް ލިބުމުން އުމްރާނީ ގޮތުންނާއި އިގްތިސާދީ ގޮތުން ވެސް ރާއްޖެ ކުރިއަރައިދާނެ ކަމުގެ އުންމީދު އާއްމުންނަށް ދެއްވާފައެވެ.
ފައިސަލް ވަނީ މި އަހަރަކީ ފަތުރުވެރިކަމަށް ކާމިޔާބު އަހަރެއް ކަމަށް ފާހަގަކުރައްވާފައެވެ. 1 މިލިއަން ފަތުރުވެރިންގެ އަމާޒު އެންމެ އަވަހަށް ހާސިލްވީ މި އަހަރު ކަމަށާއި ނޮވެމްބަރ ނުވަތަ ޑިސެމްބަރގެ ނިޔަލަށް 2 މިލިއަން ފަތުރުވެރިން ރާއްޖެ އައުމަކީ އެ މަނިކުފާނު ކުރައްވާ އުންމީދެއް ކަމަށް ފައިސަލް ވަނީ ވިދާޅުވެފައެވެ.
އައްޑޫގެ ކުރިމަގާއި މެދު ވާހަކަދައްކަވަމުން ފައިސަލް ވަނީ އައްޑޫގެ ރައްޔިތުންނާއި އެކުގައި ގާތުން މަސައްކަތް ކުރުމަށް ބޭނުންވާ ކަމަށް ވިދާޅުވެފައެވެ.
