ފަތުރުވެރިކަމުގެ ދާއިރާގެ ވިޔަފާރިތަކުން ވީހާވެސް އަވަހަކަށް ރަޖިސްޓްރީވުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިލްތިމާސްކޮށްފިއެވެ.

ބުރާސްފަތި ދުވަހު އެމްއެމްއޭއިން ބުނީ ފަތުރުވެރިކަމުގެ ދާއިރާގައި ހަރަކާތްތެރިވާ ވިޔަފާރިތަކުގެ ތެރެއިން ޓީޖީއެސްޓީ ދައްކާ ފަރާތްތަކުން ބޭރުފައިސާއާ ބެހޭ ގަވާއިދުގެ ދަށުން ވީހާވެސް އަވަހަށް އެ އޮތޯރިޓީގައި ރަޖިސްޓާވާން ޖެހޭ ކަމަށެވެ. އަދި ބޭރުފައިސާއާ ބެހޭ ގަވާއިދުގެ ދަށުން، އެ އޮތޯރިޓީގައި ރަޖިސްޓާވާން ޖެހޭ އެންމެ ފަހު ތާރީޚަކީ 30 އޮކްޓޫބަރު 2024 ކަމަށް އެމްއެމްއޭއިން ބުނެއެވެ.

މީގެ އިތުރުން އެމްއެމްއޭއިން ބުނީ ރަޖިސްޓާވާން ޖެހޭނީ އެމްއެމްއޭ އެފްއެކްސް ރެޖިސްޓްރޭޝަންޕޯޓަލްގައިވާ ރަޖިސްޓްރޭޝަން ފޯމް މެދުވެރިކޮށް ކަމަށެވެ. އަދި އެކަމާ ގުޅޭގޮތުން އިތުރު މައުލޫމާތު ސާފުކުރުމަށް 3012121 އަށް ގުޅުމަށް ނުވަތަ އީމެއިލް އެޑްރެހަށް [email protected] މެއިލް ކުރުމަށް ވަނީ އެދިފައެވެ.

ފަތުރުވެރިކަމުގެ ދާއިރާގެ ވިޔަފާރިތަކުން ވީހާވެސް އަވަހަކަށް ރަޖިސްޓްރީވުމަށް އެމްއެމްއޭއިން އިލްތިމާސްކޮށްފައިވާއިރު، މިމަހުގެ އެއްވަނަ ދުވަހުން ފެށިގެން ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ހޮޓާތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ ރޭޓުން ބޭންކަކަށް ރުފިޔާއަށް މާރުކުރަން ޖެހޭ ގޮތައް ގަވާއިދެއް އެކުލަވާލާފައެވެ.

އެމްއެމްއޭ އިން ބުނެފައިވާ ގޮތުގައި މި ގަވާއިދުގެ ސަބަބުން ރާއްޖޭގެ ބޭންކިން ނިޒާމަށް ވަންނަމުންދާ ބޭރު ފައިސާގެ ނިސްބަތް އިތުރުވެ އަދި ބޭންކިން ނިޒާމުން ވިޔަފާރިތަކަށާއި އާންމުންގެ ބޭނުންތަކަށް ފޯރުކޮށްދޭ ބޭރު ފައިސާގެ ނިސްބަތް އިތުރުކުރުމަށް މަގުފަހި ވެގެންދާނެއެވެ.