މޯލްޑިވްސް ނޭޝަނަލް ޑިފެންސް ފޯރސްގެ ކުރީގެ ޗީފް އޮފް ޑިފެންސް ފޯރސް، މޭޖަރ ޖެނެރަލް އަޙްމަދު ޝިޔާމްގެ ބައްޕަ އެމްއެންޑީއެފްގެ ވީ.އައި.ޕީ އިމާރާތެއްގައި ދިރިއުޅުއްވި މައްސަލައިގައި އުފުލާފައިވާ ދައުވާ ސާބިތުނުވާކަމަށް ކްރިމިނަލް ކޯޓުން ޙުކުމްކޮށްފިއެވެ.
މި މައްސަލައިގައި ޝިޔާމްގެ މައްޗަށް އުފުލާފައިވަނީ ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ކުށުގެ ދައުވާއެވެ.
ކްރިމިނަލް ކޯޓުން އިއްވި ޙުކުމުގައި ބުނެފައިވަނީ، މި މައްސަލައިގައި ޝިޔާމް ރަސްމީ ހައިސިއްޔަތު ނަހަމަ ގޮތުގައި ބޭނުންކޮށްފައިވާކަމަށް ދައުލަތުން ބުނާ ސަބަބަކީ ވީއައިޕީ ގޭގައި އާންމުކޮށް މީހުން ބައިތިއްބާ މުއްދަތަށްވުރެ ދިގު މުއްދަތަކަށް ޝިޔާމްގެ ބައްޕަ އެތަނުގައި ބެހެއްޓުން ކަމަށާއި، ނަމަވެސް އެތަން ބޭނުން ކުރި އެހެން ފަރާތްތަކުން ތަން ބޭނުން ކުރި މުއްދަތެއް އެނގޭކަށް ނެތް ކަމަށެވެ.
އޭގެ އިތުރުން، ޝިޔާމްގެ ބައްޕަ އެތަނުގައި ބެހެއްޓުމަށްޓަކައި ތަން ބޭނުން ކުރުމަށްޓަކައި ޒަމާނުއްސުރެ އަމަލު ކުރަމުން ދިޔަ އުސޫލުތަކާ ޚިލާފުވެފައިވާކަން އެނގެން ނެތް ކަމަށާއި، ވަކި މުއްދަތަކަށްވުރެ ދިގުކޮށް އެތަނުގައި ބަހައްޓާފައި ހުރުމުގެ މައްޗަށް އެކަނި ބަލައިގެން އުސޫލަކާ ޚިލާފުވި ގޮތެއް ދައުލަތަށް ބުނެދެވިފައިނުވާކަމަށްވެސް ޙުކުމުގައި ވެއެވެ.
އެހެންކަމުން މި މައްސަލައިގެ ހެކިތަކަށް ބަލާއިރު، ޝިޔާމްގެ ބައްޕަ ކެއިން ބުއިމަށް އެމްއެންޑީއެފްގެ ބަޖެޓުން ޚަރަދުކޮށްފައިވާކަން އެނގެން ނެތް ކަމަށާއި، އެތަނުގެ އެހެން ވަސީލަތްތައް ބޭނުން ކޮށްފައިވަނީވެސް އެހެން ވީއައިޕީ ފަރާތްތަކަށްވެސް އަމަލު ކުރާ އުސޫލުންކަމަށްވާއިރު، ޝިޔާމްގެ ބައްޕައަށްވީތީ ވަކި ޚާއްސަ އުސޫލަކުން އަމަލުކޮށްފައިވާކަން އެނގެން ނެތްކަމަށްވެސް ޙުކުމުގައިވެއެވެ.
ކ.ވިލިނގިލީގައި ހުންނަ ކޯސްޓްގާޑުގެ މެރިޓަމް ރެސްކިއު ކޯޑިނޭޝަން ސެންޓަރުގައި މީހުން ބޭތިއްބުމަށްވެސް ލިޔެކިއުމުން ވަކި އުސޫލެއް ނޯންނަ ކަމަށާއި، ނަމަވެސް އެތަނުގައި ލީޑަރޝިޕްގެ ހުއްދައާއެކު މީހުން ތިބޭކަމަށް މައުލޫމާތު ލިބިފައިވާކަމަށް މި މައްސަލައިގައި ހެކިބަސް ދިން މީހުންވެސް ވަނީ ބުނެފައެވެ.
ކްރިމިނަލް ކޯޓުން ވަނީ މި ދައުވާ އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތުނުވާކަމަށް ޙުކުމް ކޮށްފައެވެ.
ކްރިމިނަލް ކޯޓުގައި މި ޙުކުމް ކުރެއްވީ ގާޒީ އާމިނަތު އަޒްލިފާއެވެ.
