މާލޭގެ އެއްވެސް ސަރަހައްދަކުން ޕާކިންގ ސްލޮޓު ކުއްޔަށް ނުވަތަ އެނޫންވެސް ގޮތަކަށް ދިނުން ހުއްޓާލުމަށް މާލެ ސިޓީ ކައުންސިލަށް ޓްރާންސްޕޯޓް މިނިސްޓްރީން އަންގައިފިއެވެ.
ޓްރާންސްޕޯޓް މިިނިސްޓްރީން ހޯމަ ދުވަހު ނެރުނު އިއުލާނެއްގައި ބުނެފައިވަނީ، "މާލޭގެ މަގުތަކުގައި އާންމު ބޭނުމަށް އޮންނަ ޖާގަ ކުޑަވެ، މަގުތައް ބޭނުންކުރުމުގައި ދަތިވެފައިވާތީއާއި، އެކި ފަރާތްތަކުން ޒަރޫރީ ބޭނުންތަކަށް އުޅަނދުތަކުގައި މާލޭގެ ތަންތަނަށް ގޮސް، ވަގުތީ ގޮތުން ޕާކުކުރާނެ ޖާގައެއް ނުލިބުމުގެ ދަތިކަން ޙައްލުކުރުމަށް މަގުފަހިކުރުމަށާއި، އެންމެހައި ރައްޔިތުންނަށް ހާމަވާ ގޮތުގައި މަގުތަކުގައިވާ އާންމު ޖާގަތަށް ބޭނުން ހިފޭގޮތަށް ކަންކަން ފަހިކުރުމަށް މިހާރު ފަށާފައިވާ މުހިންމު މަސައްކަތްތަކުގެ ތެރެއިން އަޅާ ފިޔަވަޅެއްގެ ގޮތުން 23 ސެޕްޓެމްބަރު 2024 ވަނަ ދުވަހުން ފެށިގެން، މާލޭ ސިޓީ ކައުންސިލުން، މާލޭގެ އެއްވެސް ސަރަހައްދަކުން ޕާކިންގ ސްލޮޓު ކުއްޔަށް ނުވަތަ އެނޫންވެސް ގޮތަކަށް ދިނުން ހުއްޓާލުމަށް،" އެ ކައުންސިލަށް އަންގާފައިވާކަމަށެވެ.
ޕާކިންގ ޖާގަ ދޫކުރުން ހުއްޓާލަން އެންގި އިރު އެކަން ރަނގަޅު ކުރުމަށް އަޅާ ފިޔަވަޅެއްގެ ތަފްސީލެއް ޓްރާންސްޕޯޓް މިނިސްޓްރީން ހާމަ ކޮށްފައެއް ނުވެއެވެ.
ޓްރާންސްޕޯޓް މިނިސްޓްރީގެ އިއުލާނުގައި އިތުރަށް ބުނެފައިވަނީ، މިހާތަނަށް މާލޭ ސިޓީ ކައުންސިލުން ދޫކޮށްފައިވާ ސްލޮޓުތަކުގެ މުއްދަތު ހަމަވުމުން، އެ ޖާގަތައްވެސް، އެފަދައިން ނުވަތަ އެ ނޫން ގޮތަކަށް ދޫކުނުކުރުމަށް އެ ކައުންސިލަށް އަނގާފައިވާ ކަމަށެވެ.
މިއިއުލާން އާ ގުޅޭ ގޮތުން ހޯމަ ދުަވަހުގެ ރޭ ޓްރާންސްޕޯޓް މިނިސްޓަރ މުހައްމަދު އަމީން ކުރެއްވި ޕޯސްޓެއްގައި ވިދާޅުވެފައިވަނީ، "ރައްޔިތުންނަށް ހަމަހަމަ ގޮތުގައި މަގުތަކުގައިވާ ޢާންމު ޖާގަތަށް ބޭނުން ހިފޭ ގޮތަށް ކަންކަން ތަރުތީބު ކުރުމަށްޓައި، ކުރު އަދި ދުރު ރާސްތާއަށް އަމާޒުކޮށް ކުރެވެން ހުރިކަންކަން ކުރަމުން ގެންދާނެކަމުގެ ޔަޤީންކަން އެންމެހާ ލޮބުވެރި ރައްޔިތުންނަށް އަރުވާ،" ކަމަށެެވެ.
މިނިސްޓަރ އަމީން އެކްސްގައި ކުރެއްވި މި ޕޯސްޓަށް ވަރަށް ގިނަ ފަރާތްތަކުން ވަރަށް ބޮޑަށް ނުރުހުން ފާޅުކޮށް ކޮމެންޓް ކޮށްފައިވާކަން ފާހަގަ ކުރެވެއެވެ.
