އިޓަލީވިލާތުގެ ހެދުން ވިއްކާ އެންމެ ބޮޑު އެއް ކުންފުނީގެ ފިހާރަ ''އޯވީއެސް'' މާލޭގައި ހުޅުވައިފިއެވެ.

އިޓަލީގެ ފެޝަން ދާއިރާގައި ފާހަގަކޮށްލެވޭ ބްރޭންޑެއް ކަމުގައިވާ އޯވީއެސް އަކީ، ޒަމާނީ ސްޓައިލްގެ ފޮނި ރޫހެއް އެކުލެވޭ، އަދި އަގުހެޔޮކަމާއި ޓްރެންޑީ ވަންތަކަމުގެ ޚާއްސަ މިސްރާބެއް ގެންގުޅޭ ކުންފުންޏެކެވެ. 1972 ވަނަ އަހަރު މިލާނުގައި އުފެދުނު މި ބްރޭންޑަކީ، ތަފާތު ރަހަތަކަށް އަމާޒުކޮށްފައިވާ ޝިކް އަދި ވަރސައިޓަލް ކަލެކްޝަންތަކުން މަޝްހޫރުވެ، ބައިނަލްއަގުވާމީ ފެޝަން މައިދާނުގައި މުހިންމު ދައުރެއް އަދާކުރާ ބްރޭންޑެކެވެ.

މެދުޒިޔާރާތް މަގުގައި ހުޅުވީ އިޓަލީގެ މަޝްހޫރު އޯވީއެސްގެ ފިހާރައިން ހަފުތާ ވަންދެން 20 ޕަސެންޓާ ހަމައަށް ޑިސްކައުންޓް ލިބޭނެއެވެ. މިއީ ރާއްޖޭގައި ހުޅުވި އެ ކުންފުނީގެ ފުރަތަމަ ފިހާރައެވެ. މި ފިހާރައިގެ ތިރި ޚާއްސަކޮށްފައި ވަނީ އަންހެނުންގެ ހެދުމަށެވެ. މަތީބުރި ޚާއްސަކޮށްފައިވަނީ ކުޑަކުދިންގެ ހެދުމަށެވެ. އޯވީއެސްގެ ފޭރަމަކީ ކޮލިޓީ ރަނގަޅު، ޑިޒައިން ރީތި ހެދުން ތަކެކެވެ.

މިއީ ހުރިހާ ގޮތަކުން ވެސް ތަފާތު ބްރޭންޑެކެވެ. އެގޮތުން ޑިޒަނަރެއް މެދުވެރިކޮށް ޕިއަންބޯގެ ޚާއްސަ ކަލެކްޝަނެއް ވަނީ ނެރިފައެވެ. މި ޑިޒައިން ވެސް ވަނީ އާއްމުންގެ މެދުގައި މަގުބޫލުވެފައެވެ.

މީގެ އިތުރުން އޯވީއެސްއިން ހެދުން އުފެއްދުމުގައި ބޭނުންކުރަނީ ރީސައިކަލްކޮށްފައިވާ ނުވަތަ އޯގޭނިކް ގޮތުގައި އުފައްދާ ކޮޓަންއެވެ. ދެމެހެއްޓެނިވި ގޮތުގައި ތަކެތި އުފެއްދުމުގެ މަސައްކަތް ފަށާފައިވަނީ 2021 ވަނަ އަހަރުން ފެށިގެންނެވެ. ފެޝަން ޓްރާންސް ޕޭރެންސީ އިންޑެކްސްގައި ޖެހިޖެހިގެން 3 ފަހަރަށް އެ ކުންފުނިން ވަނީ އެއްވަނަ ހޯދާފައެވެ.

ބައިގަރުނު ކުރިން ތައާރަފުވި އޯވީއެސްއިން އަންނަނީ ދުނިޔޭގެ އެކިކަންކޮޅުތަކުގައި އެ ބްރޭންޑްގެ ވިޔަފާރިތައް ހިންގަމުންނެވެ. އެގޮތުން ޔޫރަޕާއި ލެޓިން އެމެރިކާ އަދި އޭޝިއާގެ 35 ގައުމެއްގައި 1285 ފިހާރަ ހިންގައެވެ.

އޯވީއެސް ފިހާރަ ހުޅުވާފައި ހުންނާނީ ހުކުރު ދުވަސް ފިޔަވާ އެހެން ދުވަސްތަކުގެ ހެނދުނު 10:00ން ހަވީރު 6:00އަށެވެ. ރޭގަނޑު ހުޅުވާފައި ހުންނާނީ 8:00ން 10:30 އަށެވެ. އަދި ހުކުރު ދުވަސްތަކުގައި ފިހާރަ ހުޅުވާފައި ހުންނާނީ ހަވީރު 4:00ން 6:00 އަށް އަދި ރޭގަނޑު 8:00ން 10:30 އަށެވެ.