ކެނދިކުޅުދޫ ދާއިރާގެ ކުރީގެ މެންބަރު އަހުމަދު އީސައަށް މަރުގެ އިންޒާރު ދެވަނަ ފަހަރަށް ދީފިއެވެ.
ބުދަ ދުވަހުގެ ރޭ ކުރިއަށް ގެންދިޔަ ފަލަސުރުހީ ޕްރޮގްރާމްގައި ވާހަކަ ދައްކަވަމުން އަހުމަދު އީސަ ވިދާޅުވީ ރައީސް ޑރ.މުހައްމަދު މުއިއްޒުގެ މިސަރުކާރުގައި ދެވަނަ ފަހަރަށް މަރުގެ އިންޒާރު ލިބިފައިވާ ކަމަށެވެ.
އަހުމަދު އީސަ ވިދާޅުވީ މީގެ ހަމަސް ކުރިން މަރުގެ އިންޒާރު ދިނުމުން ހެއްކާއެކު މައްސަލަ ހުށަހެޅި ނަމަވެސް އެމަައްސަލައާ ގުޅިގެން ތަހުގީގު ކުރިއަށްދާ ކަމެއް ނުވަތަ ނުދާ ކަމެއް ނޭނގޭ ކަމަށާއި، އެމައްސަލާގެ އިތުރު މައުލޫމާތު ފުލުހުން ހިއްސާކޮށްފައިނުވާ ކަމަށެވެ.
އަހުމަދު އީސަ ވިދާޅުވީ ދެވަނަ ފަހަރަށް މަރުގެ އިންޒާރު ދީފައިވަނީ ބުދަ ދުވަހުގެ މެންދުރުގެ ވަގުތު ކަމަށާއި، މީހުންތަކުގެ ތެރޭގައި ކަމަށެވެ. އެހައި ގަދަކޮށް މަރުގެ އިންޒާރު ދޭނީ އެމީހުންގެ ފަހަތުގައި ވަރުގަދަ ނުފޫޒުގަދަ އެހެންބަޔަކު ތިބުމުން ކަމަށް އޭނާ ވިދާޅުވިއެވެ.
މީގެ އިތުރުން އަހުމަދު އީސަ ވިދާޅުވީ މިއީ ގޭންގް ސަރުކާރެއް ކަމަށާއި، ރައީސް މުއިއްޒު ގޭންގްތަކަށް އެއްބާރުލުން ދެއްވާ ކަމަށެވެ. އަދި މަރުގެ އިންޒާރު ދޭމީހުން ހޯދައި، އެމީހުން ޝަރީއަތާ ހިސާބަށް ނުގެންދާ ސަބަބާއި ގުޅޭގޮތުން އަހުމަދު އީސަ ވަނީ ސުވާލު އުފައްދާފައެވެ.
ރާއްޖެޓީވީން އަޅުގަނޑު މިރޭ ޕްރޮގްރާމަށް އަރާ ވާހަކަ ޓްވީޓް ކުރެއްވި ހިސާބުން އަޅުގަނޑަށް މަރުގެ އިންޒާރު އައިސްފި އެނގޭތޯ. ދެން އެކަމާ އަޅުގަނޑު ވަރަށް ބޮޑަށް މުއިއްޒަށާއި، ހޯމް މިނިސްޓަރަށް ދެބޭފުޅުންނަށް ވަރަށް ބޮޑަށް ޝުކުރު އަދާކުރަން ބޭނުންވޭ. އެއީ އަޅުގަނޑަށް ވަރަށް ސާފުކޮށް އެނގޭ ރައީސް މުއިއްޒު، ހޯމް މިނިސްޓަރު އިހުސާން އަޑީގައި ތިއްބަވައިގެން އެބޭފުޅުން އެއްބާރުލުން ދެއްވައިގެން ގެންގުޅުއްވާ ގޭންގްތަކުންކަން. އަޅުގަނޑުމެންނަށް މަރުގެ އިންޒާރުދީ އެމްޑީޕީގެ ލީޑަރ ޝިޕްގައި ތިބި އިސްބޭފުޅުން ގަޔަށް އަތްލައި މިހުރިހާ ކަމެއް މިކުރަނީ. އަޅުގަނޑަށް މުއިއްޒު ސާބިތުކޮށްދެއްވައިފި މުއިއްޒަކީ ގޭންގް ލީޑަރެއްގެ ގޮތުގައި.ކެނދިކުޅުދޫ ދާއިރާގެ ކުރީގެ މެންބަރު އަހުމަދު އީސަ
މި މައްސަލައާ ގުޅިގެން ފުލުހުންގެ ބަހެއް ވަނީ ލިބޭގޮތް ނުވެފައެވެ.
