ލުބުނާނުގެ ޙިޒްބުﷲ ޖަމާއަތައް ބޭނުންވެއްޖެ ހިނދެއްގައި "ތަމްރީނު ލިބިފައިވާ އެތައް ހާސް ހަނގުރާމަވެރިން" ފޮނުވުމަށް ތައްޔާރަށް ތިބިކަމަށް ޔަމަނުގެ އަންސާރުﷲ ޖަމާއަތުން ބުނެފިއެވެ.
އަންސާރުﷲގެ މީޑިއާ އޮތޯރިޓީގެ ނައިބު ރައީސް ނަސްރުދީން އާމިރު މިކަން ހާމަކޮށްފައިވަނީ ފަލަސްތީނުގެ ޝިހާބު ނިއުސް އޭޖެންސީއަށް ދިން ބަސްދީގަތުމެއްގައެވެ.
ހުސްވި އަހަރު އޮކްޓޯބަރު 7 ގައި އިޒްރޭލުން ޣައްޒާ ސްޓްރިޕްގައި ހިންގަން ފެށި ނަސްލު ނައްތާލުމުގެ ހަނގުރާމައަށް ރައްދު ދިނުމުގެ ގޮތުން، ޔަމަނުގެ ހަތިޔާރުއެޅި ބާރުތަކުން ގެންދަނީ އިޒްރޭލުން ހިފާފައިވާ ފަލަސްތީނުގެ ބިންތަކުގައި ތިބި އިޒްރޭލު ސިފައިންނަށާއި އަސްކަރީ ވަސީލަތްތަކަށް ގިނަ ހަމަލާތައް ދެމުންނެވެ.
ހަމަ މި މޭރުމުން ޙިޒްބުﷲއިން ވެސް ވަނީ ހަނގުރާމައިގެ އަނިޔާ ލިބެމުންދާ ޣައްޒާގެ ރައްޔިތުންނަށް މަދަދުވެރިވުމުގެ ގޮތުންނާއި އިޒްރޭލުން ލުބުނާނުގެ ބިމަށް ދެމުންދާ ހަމަލާތަކަށް ރައްދު ދިނުމުގެ ގޮތުން އެތައް ސަތޭކަ ހަމަލާ ދީފައެވެ.
އަންސާރުﷲގެ އޮފިޝަލް ހިޒްބުﷲ އަށް އެހީތެރިވުމަށް ހަނގުރާމަވެރިން ފޮނުވަން ތައްޔާރަށް އެ ޖަމާއަތުން އޮތް ކަމަށް ބުނިއިރު ތެލްއަވީވުން ގެންދަނީ ލުބުނާނާ ދެކޮޅަށް ފުޅާ ދާއިރާއެއްގައި ހަނގުރާމައެއް ފަށާފާނެ ކަމަށް ބުނެ ބިރުދައްކަމުންނެވެ.
