ޑރ މުއިއްޒުގެ ސަރުކާރުން އަލަށް އުފެއްދި މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސްގެ ދަށުން ހިނގަމުންއައި ކޮމިއުނިކޭޝަންސް އޮތޯރިޓީ އޮފް މޯލްޑިވްސް (ކޭމް) އަންގާރަ ދުވަހުން ފެށިގެން މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީގެ ދަށުން ހިންގާ ތަނެއްގެ ގޮތުގައި ރައީސް ޑރ މުހައްމަދު މުއިއްޒު ހަމަޖައްސަވައިފިއެވެ.
ކޭމް، ހޯމް މިނިސްޓްރީގެ ދަށުން ހިނގާ ތަނެއްގެ ގޮތުގައި ހަމަޖެއްސެވިކަން އަންގާ ރައީސް އޮފީހުން ނެރުނު ދެއްނެވުމެއްގައި ބަޔާންކޮށްފައިވަނީ މި ގޮތަށް ހަމަޖައްސަވާފައިވަނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 116 ވަނަ މާއްދާގެ (ހ)އިން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުން ކަމުގައެވެ.
ކޭމް، ހޯމް މިނިސްޓްރީގެ ދަށަށް ބަދަލުކުރެއްވި އިރު، މިހާރުވެސް އެ މިނިސްޓްރީގެ ދަށުން 8 އިދާރާއެއް ހިންގާކަން ފަހަގަކޮށްލެވެއެވެ.
