ގާމަގު ކެފޭގައި ރޯވި އަލިފާނުގެ ސަބަބުން މަގުމަތީގައި ތިބި ދެމީހަކަށް ދުމުގެ އަސަރުކޮށްގެން ހޮސްޕިޓަލަށް ގެންގޮސްފިއެވެ.

ފުލުހުން ބުނީ މަގުމަތީގައި ތިބި ދެމީހަކަށް ދުމުގެ އަސަރުކޮށްގެން ހޮސްޕިޓަލަށް ގެންދިޔަ ކަމަށާއި، އެއީ ބިދޭސީ އަންހެނަކާއި، ބިދޭސީ ފިރިހެނަކަށް ކަމަށެވެ.

ސޯސަން މަގު ދޫހިމެރި މަގު ގުޅޭ ދިމާލުގައި ހުރި ގާމަގު ކެފޭގައި އަލިފާން ރޯވެގެން ރިޕޯޓްކޮށްފައިވަނީ މެންދުރު 2:45 ހާއިރުއެވެ. އަދި އަލިފާން ނިއްވުމުގެ މަސައްކަތުގައި އެމްއެންޑީއެފް ފަޔަރ އެންޑް ރެސްކިއު އަދި ފުލުހުން ހަރަކާތްތެރިވެފައިވާއިރު، އަލިފާން ކޮންޓްރޯލް ކޮށްފައިވަނި ފޯމް ޖަހައިގެންނެވެ.

މި ހާދިސާގައި ކެފޭއާއި އިންވެގެން އިން ދެ އިމާރާތަކަށް އަލިފާނުގެ އަސަރުކޮށްފައިވެއެވެ. އަދި ޖެހިގެން އިން އިމާރާތުގައި އަލިފާން ރޯވެ އެ އިމާރާތްވެސް ބޭނުން ނުކުރެވޭ ވަރަށް ވަނީ އަނދާފައެވެ. އަލިފާން ރޯވި ކެފޭ ވެސް ވަނީ ބޭނުން ނުކުރެވޭ ވަރަށް އަނދާފައެވެ.

ދުމުގެ އަސަރުކޮށްގެން ހޮސްޕިޓަލަށް ގެންދިޔަ 2 މީހުން ފިޔަވައި އިތުރު މީހަކަށް މި ހާދިސާގެ ސަބަބުން އަނިޔާއެއް ނުވަތަ ހާނިއްކައެއްވިކަމުގެ މައުލޫމާތު ލިބިފައި ނުވެއެވެ.

އަލިފާން ކޮންޓްރޯލް ކުރެވުނީ ރޯވިތާ ގަޑިއިރެއް ފަހުންނެވެ.